CRTVG

Buscar

Reabre ao tráfico este venres a N-120, entre Ourense e Os Peares, despois de 20 días pechada por desprendementos

Publicado o 28/11/2019 18:31
Reabre ao tráfico este venres a N-120, entre Ourense e Os Peares, despois de 20 días pechada por desprendementos

O Ministerio de Fomento habilitará, a partir deste venres, un carril para o paso alternativo de vehículos á altura do quilómetro 563,1 da N-120, o que permitirá reabrir ao tráfico o tramo desta estrada entre Ourense e Os Peares, despois de 20 días pechada por desprendementos. Diso informou o ministerio nun comunicado, no que lembra que este tramo permanecía cortado por seguridade despois dos desprendementos no noiro da marxe esquerda producidos o pasado 8 de novembro a consecuencia da choiva.

Fomento destacou que, desde entón, traballouse de forma continua na limpeza, saneamento e estabilización do citado noiro. Os labores continuarán até poder reabrir os dous sentidos de circulación á altura do quilómetro 563. Coa reapertura do citado carril, deixarán de estar implantados os desvíos que se habilitaron para vehículos lixeiros (utilizando a N-120a) e para os vehículos pesados que se desviaban desde Monforte de Lemos por Chantada cara a Ourense (utilizando a VG 2.1 e a N-540).

O ministerio sinalou que destinará nas próximas semanas un total de 1,4 millóns de euros a traballos de reparación do firme na estrada N-120 nas provincias de Lugo (entre os quilómetros 480 e 526) e Ourense (entre os quilómetros 439 e 471, e entre os quilómetros 564 e 574). As obras, centradas nos tramos con maiores necesidades de conservación, darán comezo nos próximos días, en canto as condicións climatolóxicas o permitan.