​Co peche da hostalería, o mellor marisco está a chegar ás prazas a un prezo máis baixo do habitual. Por iso moitos aproveitan para mercar agora e gardar para o Nadal. O problema é que non todos saben como cocelo ou conxelalo.

Esta é unha oportunidade que podemos aproveitar sabendo escoller, en primeiro lugar, as pezas máis frescas do posto.

Despois de limpalo con auga toca cocelo cunha regra básica: o vivo vai en auga fría, o morto en auga quente. O do sal e o loureiro vai no gusto.

Cómpre non cocelo de máis para que non seque nin perda sabor. Un minuto o camarón, 20 a centola, cada marisco ten o seu punto.

Se o imos conxelar hai que escorrelo, deixar que arrefríe e envolvelo nun pano mollado.

Case todos os mariscos conxelan ben, pero coa ameixa hai que ter precaución:

"Se a conxelas cruda non a podes desconxelar no momento de facela", di unha vendedora.

Xa na mesa cómpre despezalo cun coitelo afiado e saborealo sen salsas nin adornos porque o sabor do mar non precisa complementos.