CRTVG

Buscar

Puigdemont ofrécese como número dous de Junqueras para as europeas

Publicado o 13/11/2018 10:58
Puigdemont ofrécese como número dous de Junqueras para as europeas

O ex-presidente da Generalitat Carles Puigdemont ofreceuse hoxe para ser o número dous do presidente de ERC, Oriol Junqueras, nunha candidatura unitaria do soberanismo nas próximas eleccións europeas.

En declaracións a Catalunya Ràdio, Puigdemont recalcou que se fose posible configurar unha lista independentista conxunta "o liderado de Junqueras é indiscutible".

Puigdemont sinalou que non quere ser candidato ás europeas, pero abriu por primeira vez a porta para concorrer aos comicios de maio: "A única maneira de que eu sexa candidato é ir de dous de Oriol Junqueras", afirmou. "Habemos de tentar facelo", insistiu Puigdemont, que non pechou a porta para integrar á ex-portavoz parlamentaria da CUP Anna Gabriel -que fuxiu a Suíza- como número tres desa hipotética lista unitaria: "Por que non?", preguntou.

ERC xa proclamou a Junqueras, en prisión preventiva no cárcere de Lledoners (Sant Joan de Vilatorrada, Barcelona), como cabeza de lista para as eleccións ao Parlamento Europeo, mentres que JxCat, o espazo político de Puigdemont, aínda debe decidir como concorre a estes comicios e que candidatos presenta.

Segundo o ex-presidente catalán, con esta candidatura conxunta "dariamos unha potencia enorme ao discurso dos dereitos fundamentais". Esta unidade, ao seu xuízo, tamén debería cristalizar nunha lista conxunta do independentismo en Barcelona, onde "un dos primeiros obxectivos é tentar ser a lista máis votada", para ter máis opcións de conseguir a alcaldía.

No plano humano, enviou un "abrazo fraternal" e todo o seu "apoio e afecto persoal e político" a Junqueras, con quen ten "dificultades obvias" de comunicación, aínda que intercambian mensaxes a través de "intermediarios".

Sobre se a fundación da Crida Nacional per a República implicará engulir ao PDeCAT, asegurou que este novo partido "non vai contra ninguén, é complementario con todo o mundo", e busca "darlle á sociedade catalá un espazo, unha plataforma" cunha "estratexia compartida de máxima unidade para facer fronte a un adversario moi poderoso", porque "a unidade facer a forza".

Puigdemont destacou que non ve "desunión" na sociedade catalá, senón unha "sólida unidade civil" que, ao seu xuízo, debería plasmarse nunha estratexia unitaria do soberanismo, aínda que xustificou as desavinzas que houbo entre JxCat e ERC en varios momentos da lexislatura dadas as "circunstancias excepcionais", con "liderados en prisión e no exilio".

Noticias web

13/11/2018