En Portugal tamén toman moi en serio as restricións que van seguir, sobre todo nas praias. Hai moita xente pensando en pasar alí as vacacións e as autoridades planifican a tempada a fondo. 

Hai moita expectación, non só fóra do país, aquí mesmo, en Portugal, o comité que decide as restricións nas praias está sendo presionado para que conten xa como vai ser iso de ir aos areais en tempos de pandemia.

Quizais o detalle máis curioso xa transcendeu, e é que as praias portuguesas van ter un semáforo que nos dirá como de cheo está o areal e se nos paga a pena baixar do coche para ir. O comité de saúde anunciará a semana que vén a distancia exacta que se vai ter que manter entre bañistas, ademais doutras normas básicas.

Turismo de Portugal prepara unha forte campaña de información para nacionais e estranxeiros para que se cumpran as regras e non haxa que recuar na desescalada. O luns que vén abren as terrazas de bares e restaurantes e aquí si que xa sabemos as normas: levar máscara, dous metros de separación entre mesas e desinfectar o negocio 6 veces ao día.