CRTVG

Buscar

Os forenses atoparon o perfil xenético de César Adrio na roupa de Ana Enjamio

Publicado o 12/12/2019 13:40

César Adrio chegaba aos xulgados vigueses para sentar no banco dos acusados por cuarto día consecutivo. Esta mañá escoitou as conclusións dos forenses que realizaron a autopsia ao cádaver de Ana Enjamio, en colaboración co Instituto de Toxicoloxía, que analizou as pezas de roupa que levaba a vítima. O seu informe conclúe que nesa roupa apareceron restos de dous perfís xenéticos, un o de Ana Enjamio e o outro do acusado, César Adrio.

As forenses explicaron que as feridas que presentaba a vítima foron realizadas cunha arma branca e que as recibiu en vida. A maior parte delas estaban na parte superior do tórax e no peito esquerdo. Algunhas perforáronlle o corazón provocándolle a morte e outras chegaron a romper tecido óseo. O corpo da falecida tiña feridas nas mans que evidencian o intento de defenderse e hematomas que demostran que o seu agresor lle taponou os orificios respiratorios para impedir que pedise auxilio. Os forenses sitúan a hora da morte entre as cinco e media e as sete da mañá.

Respecto a César Adrio, o informe só reflicte pequenas feridas nas mans e a análise psiquiátrica conclúe que non presenta patoloxía ningunha e que se comporta de modo frío, calculador, controlando sempre as súas respostas.

Na xornada de hoxe tamén prestaron declaración axentes da Policía Científica, que destacaron o extremadamente curtas que levaba as uñas o acusado cando tomaron mostras das súas mans. Antes testificou o propietario do taller onde César Adrio arranxou o seu vehículo. Confirmou a entrega do coche sen acabar a reparación o venres dezaseis de decembro porque ao acusado lle urxía.

Ademais, os membros do xurado puideron ver o contido das gravacións das cámaras de seguridade dunha gasolineira próxima á casa de Ana Enjamio que, supostamente, recolleron a imaxe do coche de César Adrio, ás cinco da mañá, o día dos feitos.

 

Noticias web

12/12/2019