CRTVG

Buscar

Os centros universitarios galegos agrúpanse baixo a marca CIGUS, que será a "Galicia Calidade da investigación"

Publicado o 04/12/2020 17:55

Os centros de investigación galegos agrúpanse baixo a marca 'CIGUS', unha etiqueta que, a modo de "Galicia Calidade da investigación", servirá para a súa identificación e promoción a nivel estatal e internacional. Este venres, a Cidade da Cultura de Santiago acolleu a entrega das acreditacións a oito centros de investigación do tres universidades galegas, un acto ao que asistiu o presidente da Xunta, Alberto Núñez Feijóo, acompañado polo conselleiro de Educación, Román Rodríguez, e os reitores da USC, UVigo e UDC.

Estas acreditacións foron outorgadas a oito centros "de referencia" que proxectan o traballo científico que se fai en Galicia máis aló da comunidade, segundo resaltou Núñez Feijóo na súa intervención, que serviu para clausurar o acto. En concreto, a distinción irá a parar a tres centros da Universidade de Vigo -AtlanTTic, Centro de Investigación Mariña e o Centro de Investigacións Biomédicas (CINBIO)-, un da Universidade da Coruña -Centro de Investigación en TIC (CITIC)- e catro da Universidade de Santiago de Compostela (USC) -Centro Singular de Investigación en Tecnoloxías Intelixentes (CiTIUS), o Centro de Investigación en Medicamento Molecular e Enfermidades Crónicas (CiMUS), Centro Singular de Investigación en Química Biolóxica e Materiais Moleculares (CiQUS) e o Instituto Galego de Física e Altas Enerxías (IGFAE)--. Representantes de cada centro recolleron os certificados que os acreditan como centros de referencia da investigación científica en Galicia.

Ante o titular da Xunta e o conselleiro, directores e responsables destas entidades apelaron a manter o compromiso e dotar de recursos á investigación na Comunidade galega como vía para afrontar os retos do presente e futuro apostando polo coñecemento e o talento que sae das universidades. Na súa intervención, o presidente da Xunta resaltou que recoñecer os centros investigadores supón un "acto de autoafirmación, de autoestima como galegos", especialmente en "un momento tan díficil" como o actual, marcado pola pandemia e coa ciencia xogando un papel de "relevancia" como "nunca tivo" ata a data.

Para Núñez Feijóo, "se algo trouxo bo a pandemia foi o respecto pola ciencia" e darse conta do seu "protagonismo" á hora de garantir o desenvolvemento das sociedades e a supervivencia das persoas, polo que valorou o traballo "discreto" e "constante" que leva a cabo nos centros investigadores galegos. De cara á súa protección e promoción fóra de Galicia, a Administración galega lanza o selo identificativo 'CIGUS', que pretende actuar, en palabras do presidente autonómico, como "a Galicia Calidade da investigación".

Feijóo apuntou que, con isto, Galicia súmase a Euskadi, Madrid e Cataluña, as comunidades "punteiras" a nivel investigador e as únicas que dispoñen de etiquetas para agrupar aos seus centros.

 

Noticias web

04/12/2020