CRTVG

Buscar

Çolak, feliz por "volver á casa"

Publicado o 02/01/2020 13:06

• O acordo entre Deportivo e Abanca, pendente só de firma

Emre Çolak, novo xogador do Deportivo, mostrouse feliz na súa presentación por "volver á casa" tras ano e medio no Al-Wehda de Arabia Saudita, ao que foi traspasado polo club galego, e autodescartouse para o primeiro partido do ano, ante o Numancia, ao non estar en condicións óptimas para afrontalo.

O xogador turco, que disputou como branquiazul as tempadas 2016/17 e 2017/18, regresa ao Deportivo ata a conclusión da presente tempada.

"Estou moi feliz por estar aquí, de volta a casa. Oxalá volva dar o mellor de min para o equipo", indicou o xogador en rolda de prensa, na que estivo asistido por un intérprete.

Relatou que estaba "a adestrar e tiña algunhas ofertas" cando o Deportivo, a través do asesor en fichaxes co novo Consello de Administración, Richard Barral, chamoulle para que "axudase" ao equipo.

"Despois desa chamada non o pensei máis e decidín volver á miña casa. Téñolle moito respecto á cidade, ao club, esta é a miña casa. Vou dar o mellor de min", insistiu.

O futbolista considerou que o seu primeiro partido será o de Copa do Rey co Unionistas de Salamanca a próxima semana e non o de Soria.

"Estou ben a nivel físico, pero falta un pouco adestrar co equipo. Oxalá poida estar preparado o máis pronto posible", desexou.

Çolak, que en España só xogou en Primeira División, admitiu que non coñece "moito a categoría", pero si a cidade e o equipo e dixo, en castelán e sen tradución, que é "galego".

O futbolista mostrouse convencido das posibilidades do Deportivo para evitar o descenso a Segunda B tras finalizar a primeira parte da tempada como último clasificado a sete puntos da permanencia.

Tamén se referiu á posibilidade de que o Deportivo incorpore ao costarriqueño Celso Borges, co que Çolak compartiu vestiario na Coruña.

"Estivemos en contacto en Turquía, pero non falei nada con el sobre a súa fichaxe (polo Dépor). Oxalá veña", asegurou.

Do seu paso por Arabia, dixo que "foi un pouco difícil" e afirmou descoñecer "por que" non tivo continuidade alí. 

O acordo entre Deportivo e Abanca, pendente só de firma

O acordo entre o Deportivo e a entidade financeira está pendente de firma, segundo avanzou este xoves o presidente interino do club galego, Juan Antonio Armenteros.

"Esperamos asinar o contrato esta tarde e, en canto estea, explicarémolo", sinalou o dirixente que se fixo cargo do club a semana pasada e finalizará o seu mandato o día 14.

Armenteros forma parte do equipo de Fernando Vidal, que por agora é o único que se postulou para coller as rendas da entidade na próxima Asemblea de Accionistas.

Vidal anunciou a súa candidatura na anterior Xunta Xeral, a que se celebrou a mediados de decembro, e nela manifestou que tiña un acordo coa entidade financeira.

Tamén adiantou entón que o banco estaba disposto a capitalizar parte da súa débeda (superior aos 50 millóns de euros) con accións da entidade deportivista, o que, na práctica, supoñerá, probablemente, que Abanca pase de principal acredor a máximo accionista do club.

A curto prazo, o acordo entre as dúas partes tamén aspira a ampliar o tope salarial do Deportivo para poder acometer fichaxes.

Reforzar o persoal é un dos propósitos do novo Consello de Administración para tentar evitar o descenso a Segunda B.