CRTVG

Buscar

O Goberno aproba o fondo para electrointensivas con 600 millóns

Publicado o 26/06/2020 15:21

O Consello de Ministros deu luz verde á creación do fondo de reserva de garantía para entidades electrointensivas, co que se pretende apoiar a gran industria na compra de enerxía verde a través de contratos de compra e venda de electricidade a longo prazo ('PPA', polas súas siglas en inglés). 

A ministra portavoz do Goberno, María Jesús Montero, destacou que este era un fondo "moi demando" polo sector e que se considera "imprescindible", xa que é "un factor importante para facilitar o desenvolvemento destas operacións".

A ministra de Industria, Comercio e Turismo, Reyes Maroto, anunciou a súa aprobación para o Consello de Ministros do pasado martes, aínda que finalmente foi este venres cando recibiu a 'luz verde' polo Goberno. Este fondo garante a cobertura do Estado ás operacións de compravenda de enerxía eléctrica a medio e longo prazo que realicen consumidores electrointensivos e senta as bases para que a relación entre o consumidor electrointensivo e a compañía eléctrica "teña un marco onde se vincule a plantas de enerxías renovables que promoven este tipo de fontes de enerxía sustentable", dixo Montero.

En concreto, o fondo para a industria electrointensiva estará dotado con 200 millóns de euros anuais, para cubrir como máximo 600 millóns de investimento en tres anos. Montero subliñou que coa autorización deste fondo se cumpre "o compromiso político" de apoio ao sector industrial, que este Goberno puxo de manifesto coa aprobación en decembro de 2018 do real decreto lei en que se comprometeu "a dar impulso á competitividade económica" da industria e introduciu a figura do consumidor electrointensivo.

Primeiro paso para o estatuto das electrointensivas

A portavoz do Goberno afirmou que este fondo supón "un paso primeiro" para chegar á aprobación do Estatuto do Consumidor Electrointensivo "nas próximas semanas". De todas as maneiras, reiterou que agora mesmo o custo da electricidade "non é un problema" para a gran industria, xa que durante a pandemia do coronavirus o prezo baixou "a niveis históricos e é moito máis barata que fai catro meses".

Noticias web

26/06/2020