CRTVG

Buscar

O Estado deberá indemnizar a Audasa por recortar a compensación por suprimir as peaxes do Morrazo e A Barcala

Publicado o 25/02/2020 18:00

• O Supremo estima o recurso da concesionaria da AP-9

• Audasa estima en case 5 millóns de euros as perdas

• Os usuarios pregúntanse como reclamar o pagamento das portaxes a Audasa durante as obras en Rande

 

O Estado deberá indemnizar a Audasa por recortar a compensación por suprimir as peaxes do Morrazo e A Barcala

A Sala III do Tribunal Supremo ditaminou a favor de Audasa no seu contencioso contra o Estado e a Xunta e recoñeceulle o dereito a ser indemnizada pola modificación que en 2017 se realizou do sistema de retribución da 'peaxe na sombra' implantado en 2006 en dous tramos da AP-9 en Rande e A Barcala, co obxectivo de que fosen gratuítos para os usuarios. Con iso, o Alto Tribunal estima o recurso presentado pola empresa, polo que insta a anular a modificación aprobada por Real Decreto en 2017, a volver implantar o sistema de cálculo acordado en 2006 e a indemnizar á empresa polos danos causados.

Audasa estima en case 5 millóns de euros (4,91 millóns) as perdas que lle ocasiona esta modificación só nun ano e a 482 millóns o prexuízo que suporía no conxunto do período que resta de concesión da vía (até 2048), no caso de que non se volva ao sistema de pago orixinal de 2006. A compañía, a través da súa filial Audasa, logra esta sentenza favorable apenas un día despois de recibir unha en contra, a que un Xulgado Mercantil de Pontevedra emitiu o luns contra polo cobro "abusivo" de peaxes nesta mesma autoestrada durante as incidencias ocasionadas polas obras de ampliación da Ponte de Rande.

Neste caso, o Supremo acepta o recurso de Audasa ao considerar que a regulación sobre concesións de autoestradas "impide variar o réxime de retribución do contratista" cando, entre outros supostos, "se faga depender a retribución de elementos distintos ao inicialmente determinado, isto é, a peaxe, e con independencia de quen o pague, se o usuario ou as administracións".

O contencioso ten a súa orixe en 2006. Nese ano, o Estado central, Itínere e a Xunta de Galicia acordaron que dous tramos da AP-9, os que unen Vigo-O Morrazo e A Coruña-A Barcala, quedasen libres de peaxe directa para os usuarios e pasasen a ter 'peaxe en sombra'. Isto é, a partir de entón, a Administración Central e a Xunta se encargaban de pagar ao 50% a Audasa a peaxe anual polo tráfico que anualmente contabilizasen estes trazados.

Con todo, en 2017, o Goberno de entón considerou que, desde que quedaron libres de peaxe, estes tramos rexistraban tráficos moi superiores aos que se terían contabilizado no caso de que se mantivese o pago de taxas.

"Para a Administración, iso supuña que a concesionaria estaba a rexistrar un enriquecemento inxusto".

Por iso, aprobou mediante Real Decreto modificar o sistema de cálculo do tráfico polo que pagar a peaxe. A partir de entón, xa non lle pagaría en función do tráfico real, senón polo que se rexistrou en 2005, o ano previo ao levantamento da peaxe, tras aplicarlle a variación á alza ou á baixa que experimentase o do resto da autoestrada de pago.

A filial do grupo Itínere recorreu esta medida ao considerar que se "vulnerou o principio de inalterabilidad dos contratos" e que non había desequilibrio económico financeiro na concesión, polo que "non había motivo para modificar a concesión por inexistencia de causa para iso".

Noticias web

25/02/2020