CRTVG

Buscar

O BNG gaña as eleccións en Pontevedra pero necesita o PSOE para gobernar

Publicado o 27/05/2019 02:21

O nacionalista Miguel Anxo Fernández Lores queda sen a súa ansiada maioría absoluta en Pontevedra. O BNG gañou as eleccións, pero necesitará ao PSOE para garantir a súa investidura e, probablemente, a gobernabilidade do municipio. Co escrutinio ao 100%, o BNG obtivo 16.500 votos (39,79%), un resultado que se traducirá en once dos vinte e cinco concelleiros da corporación, a dúas da maioría absoluta e un menos dos que os nacionalistas lograron en 2015.

A caída do BNG en Pontevedra limítase a apenas medio milleiro de votos, pero suficiente para dificultar as súas opcións de seguir gobernando a cidade en solitario. O PP, que apostou nestas municipais polo edil Rafa Domínguez, logrou recuperar gran parte do respaldo perdido fai catro anos. Un total de 12.440 pontevedreses (30%) apoiaron a candidatura popular, case dous mil máis que nas municipais de 2015, que lle permiten incrementar a súa presenza na corporación de sete a nove concelleiros. No seu caso, a subida electoral foi de case tres puntos. O PSOE, pola súa banda, tamén mellora o seu resultado pasando de tres a catro edís, ao conseguir 5.707 votos (13,92%) dos cidadáns de Pontevedra. Tino Fernández será, por tanto, clave para a investidura de Lores e podería reeditarse un goberno en coalición, fórmula coa que ambos os partidos gobernaron doce do últimos vinte anos. Cidadáns, que durante gran parte do escrutinio quedaba fóra da corporación, logrou reter o seu único edil, que pasará a ser Goyo Revenga.

O partido de Albert Rivera repetiu practicamente o seu resultado de fai catro anos e lograron 2.142 votos (5,17%). Peor sorte correu Marea Pontevedra que, definitivamente, se despide da corporación tras catro anos. Lastrado pola candidatura paralela de Podemos, os de Luís Rei perderon a metade do apoio popular conseguido en 2015 e quedáronse cuns insuficientes 1.492 votos (3,60%), pouco máis que os 1.260 votos (3,04%) logrados por Podemos. Fóra da repartición de concelleiras quedáronse tamén Vox, que superou o milleiro de votos (2,48%); Compromiso por Galicia con 203 votos (0,49%) e o noveno partido en discordia, Ciudadanos por Galicia con 105 votos (0,25%).

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí