CRTVG

Buscar

A OCDE rebaixa o crecemento mundial ao seu nivel máis baixo desde a crise e advirte da incerteza política española

Publicado o 19/09/2019 13:36

A Organización para a Cooperación e o Desenvolvemento Económicos (OCDE) revisa á baixa as perspectivas de crecemento mundial para o 2019 e o 2020 ata o nivel máis baixo nunha década para a economía mundial en xeral e para a europea en particular. A ralentización débese, segundo este organismo, á ameaza dun brexit duro, á guerra comercial nos EUA e na China e á debilidade de Alemaña.

A OCDE, con sede en París, tamén fala, en concreto, da incerteza política que se vive en España, coa perspectiva da celebración de novas eleccións o próximo 10 de novembro, ao considerar que todo o que engada desestabilización a unha conxuntura internacional debilitada non é bo.

"Tendo en conta o estendida que está esta incerteza actualmente, calquera cousa que a eleve non é unha boa noticia", dixo Laurence Boone.

Aínda que a economista xefa da OCDE, ao remate da presentación do informe, aclarou: "España resiste bastante ben, bastante mellor que a zona media da zona euro, pero non nos gusta a idea de que haxa incerteza. Non nos gusta en xeral, aínda que polo momento España non nos inquieta".

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

19/09/2019