CRTVG

Buscar

Irlanda do Norte prorroga o confinamento e Inglaterra endurece as multas contra as festas

Publicado o 21/01/2021 20:09

A provincia británica de Irlanda do Norte seguirá confinada ata o próximo 5 de marzo, despois de que as restricións impostas tras o Nadal non lograsen frear o aumento de casos de covid-19.

O ministro norirlandés de Sanidade, Robin Swann, sinalou este xoves que as escolas e os comercios non esenciais seguirán pechados, mentres que se recomenda manter o teletraballo, unhas medidas que, segundo algúns observadores, poderían mesmo estenderse ata Semana Santa.

Así mesmo, as forzas da orde aumentarán a vixilancia para asegurar o cumprimento das restricións, que prohiben, por exemplo, as reunións familiares, agregou o ministro.

A ministra de Interior británica, Priti Patel, anunciou este xoves novas multas de 800 libras (900 euros) para tratar de frear as festas de máis de 15 persoas en Inglaterra, onde o Goberno decretou un confinamento polo que só se pode saír de casa por motivos esenciais.

O Reino Unido rexistrou este xoves 1.290 novas mortes por coronavirus, unha cifra moi alta aínda que por baixo do récord de 1.820 que comunicou a xornada anterior, así como outros 37.892 contagios. Nos últimos sete días, o número de falecidos incrementouse nun 14,1 % respecto a a semana anterior, a pesar de que as infeccións decreceron un 23,6 %. Redúcense tamén lixeiramente os hospitalizados no conxunto do Reino Unido, ata 38.676, uns 500 menos que o mércores, dos que 3.953 requiren asistencia mecánica para respirar.

Noticias web

21/01/2021

Máis sobre actualidade