En varios puntos da Coruña apareceron espallados patinetes eléctricos de alugueiro. Detrás deste servizo está unha aplicación para móbil dunha empresa con sede en Madrid que podería enfrontarse a unha sanción por carecer de permiso para ocupar os espazos públicos. A Policía Local está a investigar o caso. 

Os patinetes eléctricos de aluguer que apareceron nas rúas da Coruña funcionan cunha aplicación para móbil que desbloquea o patinete. En total a Policía Local localizou 50 unidades espalladas por diferentes puntos da cidade.

Trátase da mesma empresa á que o Concello de Vigo lle pediu que retirara os patinetes das rúas a semana pasada. Na Coruña, os patinetes están ancorados aos chamados aparcabicis, bens públicos de competencia municipal para os que a empresa carece de permiso de uso.

A Policía Local xa contactou coa empresa, con sede virtual en Madrid, á que lle requeriu toda a documentación. Se non dispón da autorización pertinente, o concello podería proceder á apertura dun expediente sancionador.