CRTVG

Buscar

Atopan un corpo en Cerdido, preto de onde desaparecera Yago de la Puente

Publicado o 27/08/2020 13:40

Os restos humanos estaban nun terreo do lugar da Casanova, no concello de Cerdido. Atopounos un home contra as oito da tarde deste mércores, cando estaba rozando.

Tras a alerta a zona quedou acordoada e preparouse o terreo para que accederan os especialistas policiais e xudiciais que interveñen nese tipo de situacións.

A difusión da nova levou a pensar desde o primeiro momento que poderían ser os restos de Yago de la Puente, o coruñés de 28 anos desaparecido desde mediados de xullo de 2019. O mozo regresaba do Festival de Ortigueira e, polo que aseguraron algunhas testemuñas, o seu rastro perdeuse na zona da estación de Cerdido.

Dende onde o viron por última vez ata onde apareceron os restos óseos hai menos de dous quilómetros de distancia.

Desde a desaparición de Yago pasaron máis de 400 días. As análises e pescudas dos especialistas serán as que determinarán se os restos achados corresponden ou non a Yago.

 

Noticias web

27/08/2020