CRTVG

Buscar

Inaugurada en Rozas a torre de control máis avanzada de España, nun centro que certificará drons para Europa

Publicado o 18/12/2019 15:10

A torre de control máis avanzada tecnoloxicamente de España foi inaugurada este mércores no aeródromo de Rozas, no municipio de Castro de Rei (Lugo), logo da súa rehabilitación e dotación de equipamento. Esta torre completa así o Centro de Investigación Aeroportada de Rozas (CIAR), que aspira a converterse nun organismo de referencia en Europa para a certificación de avións non tripulados.

No acto de inauguración, o presidente da Xunta, Alberto Núñez Feijóo, destacou que a Xunta destinará un total de 15 millóns de euros nos seus orzamentos do ano que vén para "seguir apoiando este polo aeroespacial". Nesta cita tamén estivo presente, entre outros, o secretario de Estado de Defensa, Ángel Olivares.

O custo desta infraestrutura ascende a cinco millóns de euros -1,57 millóns licitados a través de compra pública innovadora-, nunha torre que aúna seguridade, instrumentación e supervisión de operación. O centro de Rozas conta cunha área de 313 hectáreas, unha pista de 1.200 metros de longo por 45 de ancho e un hangar de 40 por 40 metros. De tal forma, ofrecerá un servizo integral innovador para a realización de plataformas aéreas, cunha tecnoloxía que permitirá ás empresas dar servizos de alta cualificación.

O proxecto do centro de Rozas conta cun orzamento de 165 millóns, dos cales están executados uns 96 millóns, segundo datos do Goberno galego. Máis de 380 persoas traballan nesta iniciativa, coa previsión de que se acaden os 500 empregados de alta cualificación. A Xunta, o Ministerio de Ciencia e o Instituto Nacional de Técnica Aeroespacial colaboran nun proxecto no que hai máis de 50 empresas e centros de coñecemento, con Indra, Babcock e Boeing como empresas tractoras.

Esta torre de control enmárcase dentro do programa de infraestruturas da Civil UAVs Initiative, que contén outros como: O de I+D (con 115 millóns para 22 proxectos); o Programa Solucións (para incorporar ferramentas en drones para dar resposta a retos como a xestión forestal ou a saúde cardiovascular no Camiño); o Programa Emprendemento (coa creación dunha aceleradora sectorial); a Business Factory Aero (para promover a creación de pemes) e o de vocacións científico-tecnolóxicas para promover a vocación dos máis novos.

Así, realízanse drons que servirán para tarefas como a loita contra os incendios forestais e a localización de persoas desaparecidas, mentres se traballa noutras liñas como a realización de embarcacións non tripuladas. Todo iso, mentres o sector aeroespacial galego creceu ao redor dun 8% no último ano, o cal está formado por 40 empresas e 1.200 profesionais.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

18/12/2019