CRTVG

Buscar

Feijóo pide ao Goberno central "concreción" para apoiar o Xacobeo 2021

Publicado o 15/01/2020 12:49

O xefe do Executivo galego, Alberto Núñez Feijóo, esixiu este mércores "concreción" e "colaboración" por parte de Goberno central no seu apoio á celebración do Xacobeo en 2021.

Núñez Feijóo presidiu este mércores a firma do acordo de patrocinio con Vegalsa-Eroski para o Xacobeo 2021 mediante o que a compañía achega preto dun millón de euros para a cita xacobea.
Na rolda de prensa na que tamén participaron o conselleiro de Cultura e Turismo, Román Rodríguez e o director xeral do grupo empresarial, Joaquín González, o presidente incidiu na relevancia que o Xacobeo terá para a economía e cultura galega.

Núñez Feijóo asegurou que o Goberno galego afronta este 2020 como a antesala do primeiro Xacobeo da década polo que desde este mesmo mes de xaneiro puxéronse a traballar con toda a "ilusión" para lograr unha celebración á altura deste "feito histórico". Unha cita para a que, subliñou, será imprescindible a colaboración do Goberno central.

"É unha oportunidade na que esperamos a colaboración do recente Goberno central. Volvemos insistir, temos as portas abertas para esa colaboración e os meses van pasando" sen que o Ministerio de Cultura revele cal será a súa actuación referente ao Ano Xacobeo, lamentou.

En base a iso, o presidente da Xunta reforzou o seu chamamento á colaboración do Executivo estatal; "necesitamos concreción do Goberno central porque os camiños non afectan só a Galicia se non a todos os españois que residen por onde pasa os camiños que chegan a Compostela", lembrou.

Fronte a un respaldo que aínda non chegou por parte do Ministerio, Feijóo celebrou o patrocinio de Vegalsa-Eroski que, desta forma súmase a outras compañías como Hijos de Rivera e Gadis que tamén rubricaron un acordo de similares características.

O presidente galego puxo en valor que a Xunta lograse comprometer "a unha das grandes cadeas alimentarias" que hai "en Galicia" e cuxo acordo permitirá "comezar a década cun paso decidido do que queremos que sexa Galicia na próxima década" e ata o Xacobeo de 2032.

Este tipo de acordos permiten que o Ano Santo vaia a ser o "mellor escaparate de Galicia" durante o próximos dez anos polo que é especialmente relevante deseñar unha programación acertada que sirva de carta de presentación para todos os viaxeiros que decidan coñecer Galicia.

Todo iso, sen limitar o Xacobeo a unha iniciativa unicamente da Xunta, polo que traballarán para que a celebración "non sexa un proxecto gobernamental senón un proxecto de país" no que son de vital importancia as colaboracións empresariais deste tipo.

As firmas galegas comparten os valores da marca Galicia que evidencia, dixo Feijóo, que "somos o pobo da hospitalidade e da concordia".

Nese sentido, a reunión do Goberno galego de mañá xoves estudará o balance da actividade da promoción turística de Galicia tras un ano no que se consolidou a boa saúde do turismo na comunidade e que reflectirá que entre 2009 e 2019 se incrementou nun 26 por cento polo número de viaxeiros que chegaron a Galicia.

Pola súa banda, o director xeral de Vegalsa-Eroski, Joaquín González destacou que a súa compañía, a través deste patrocinio afianza o seu "compromiso coa comunidade" sendo este un obxectivo que día a día tamén tentan reflectir os establecementos cos que contan.

Para iso ao longo dos próximos meses desenvolverán diferentes accións divulgativas e educativas "vinculadas á nosa terra" mediante as que poñer en valor o Camiño de Santiago.

Este obxectivo supón un "orgullo" para a marca que celebra, do mesmo xeito que fixo en anteriores ocasións, participar activamente na promoción do Xacobeo.

Finalmente comprometeuse coa Xunta a continuar nesta senda de colaboración: "Dígolles que conten connosco para calquera iniciativa que posicione Galicia no mundo", concluíu. 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí