CRTVG

Buscar

Diverxencias no taboleiro político arredor de Esquerra Republicana

Publicado o 21/12/2019 20:21

Carmen Calvo considera que os españois "merecen que haxa investidura este mesmo ano". Confía no paso decisivo de Esquerra Republicana para facilitar un novo goberno e "devolver a política" ao ámbito do político en Cataluña. Nese sentido, dixo que están "soportando unha herdanza do PP" e que agora toca intentalo pola vía do diálogo

"Imos ver en que termos rematan hoxe o seu congreso. Nós facemos os nosos e, nese sentido, canto antes teñamos unha investidura máis axiña iremos para seguir tomando moitas decisións que teñen que ver co día a día deste país, pero que teñen que ver tamén co futuro de Cataluña", declarou a vicepresidenta do Goberno en funcións.

Desde a oposición, o PP anuncia accións legais polo que eles consideran "un mitin político de Junqueras" gravado no cárcere e difundido no congreso de Esquerra. Pola súa parte, Ciudadanos segue insistindo en que Sánchez debe optar polos constitucionalistas fronte ao desafío independentista.

"Anunciolles que o Partido Popular vai estudar as accións legais que sexan pertinentes, porque non se pode permitir que a reponsable do cárcere de Lledoners permitira un mitin político dun dos reos", sinalou o vicesecretario de Comunicación do PP.

Isto é o que declaraba Melisa Rodríguez, voceira da xestora de Ciudadanos: "Nós estamos poñendo sobre a mesa que hai unha vía, a vía dos 221 escanos, que ten que explorar, porque a teor das declaracións do señor Junqueras, dixo onte que están lexitimados máis ca nunca para volvelo facer".

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

21/12/2019