CRTVG

Buscar

Detido o Fitipaldi de Rubiás por apuñalar dous homes en Lugo

Publicado o 11/06/2020 13:56

Dous homes quedaron feridos, un deles de gravidade, nunha liorta que se produciu ás portas dun pub no barrio lugués da Piringalla. Segundo as testemuñas, os implicados chegaron a lanzarse cadeiras e un deles sacou un estilete de 19 centímetros de lonxitude, co que apuñalou as dúas vítimas. A máis grave, que tiña perforado un pulmón, tivo que ser trasladada nunha ambulancia ao hospital Lucus Augusti.

Manuel Arias, voceiro da comisaría de Lugo: "Parece ser que se montou unha liorta, non se sabe exactamente por que, e un deles despois de ser agredido saíu fóra e puido chamar as patrullas que estaban traballando. Presentadas alí, déronse de conta de que xa se producira unha segunda agresión, aínda máis grave, posto que lle perforaron un pulmón a esta segunda persoa. Primeiro déuselles asistencia médica aos presentes e, unha vez se indagou de onde xurdira o conflito e quen asestara esas coiteladas, pois foi detido".

O home detido resultou ser Marcos Fernández Pena, coñecido como o Fitipaldi de Rubiás, que conta cun amplo historial delituoso. Ademais, os axentes detiveron un segundo presunto agresor, que está pendente de pasar a disposición da xustiza.

Manuel Arias, voceiro da Comisaría de Lugo: "É unha persoa moi coñecida. Levaba bastante tempo en prisión. Na comisaría fíxose o correspondente atestado e pasou a disposición xudicial. Froito desa investigación, hai un segundo detido. Unha das persoas implicadas tamén está detida nestes momentos, nos calabozos. Tamén se lle vai tomar declaración e pasará a disposición xudicial nas próximas horas".

O coñecido delincuente lugués, de 43 anos de idade, xa leva cumpridos máis de dez anos de cadea por diferentes feitos. A súa última condena produciuse en 2012, cando o Tribunal Supremo lle impuxo dez anos e nove meses de prisión por acoitelar un mozo, atacar unha enfermeira e intentar dispararlle a un policía para fuxir do antigo Hospital Xeral.

Noticias web

11/06/2020