En Alemaña confinaron máis de 360.000 persoas por mor do rebrote do coronavirus no matadoiro de carne.Ese foco de contaxio suma xa máis de 1.500 infectados, o que levou as autoridades a tomar a decisión no epicentro do rebrote. O peche vaise prolongar ata polo menos o vindeiro 30 de xuño. É a primeira vez que unha rexión volve ás restricións despois de que Alamaña comezara a desescalada.

As autoridades do estado federado alemán de Renania do Norte-Westfalia ordenaron o peche parcial da vida pública por unha semana para o distrito da cidade de Gütersloh, onde se rexistrou un rebrote de coronavirus con 1.553 casos confirmados relacionados cun matadoiro.

Nunha conferencia de prensa, o xefe do Goberno rexional, Armin Laschet, anunciou esta medida, da que dixo que "desde o punto de vista das cifras", en principio, sería innecesaria, xa que máis aló do rebrote na empresa cárnica Tönnies, o número de contaxiados no distrito afectado é de 24.

"Iso permitiríanos dicir que o foco está localizado, pero imos dar un paso máis e ordenar o peche da vida pública para o distrito de Gütersloh", co obxectivo de "acougar" e "obter claridade" sobre a situación xeral.

A idea é poder determinar nesta semana coa realización de test masivos ata que punto se pode estender o coronavirus entre a poboación, precisou.

Parte dos afectados son traballadores procedentes de Romanía e Bulgaria, aos que Laschet garantiu unha "atención coidadosa", atendendo ás dificultades que supoñen a súa situación de corentena, lonxe das súas familias.

Agregou que se trata do primeiro distrito afectado pola reintrodución de medidas restritivas desde que estas comezaron a levantase gradualmente en Alemaña ao longo do mes de maio, o que supón un regreso á situación de varias semanas atrás.

Dixo que é consciente da "enorme carga" que supón para a poboación a reintrodución de restricións.

"Sabemos que no distrito o número de contaxios non aumentou e, aínda así, esiximos da xente que acepte o peche da vida pública", dixo, e asegurou que se trata dunha "medida temporal" e " profiláctica" que estará vixente unha semana e poderá levantarse se a situación o permite.

Con todo, advertiu, as medidas restritivas tamén poderán prolongarse se se considera necesario.

Agregou que aí onde as cifras aumentan e existe unha ameaza, hai que actuar con decisión e regresar ás medidas introducidas en marzo para conter a pandemia, á vez que subliñou a necesidade de facer o posible para que este rebrote non se estenda máis alá do distrito afectado.