O comité de empresa e a dirección de Alcoa volverán reunirse mañá -día 12 de xaneiro- para tratar de alcanzar un acordo que permita a desconvocatoria da folga indefinida que comezou no complexo industrial de San Cibrao a principios de outubro, dado que hoxe as partes non chegaron a un entendemento despois de horas de reunión telemática. 

A reunión comezou ás dez da mañá e continuou pola tarde, despois dun receso ao mediodía, ata que pasadas as 18:00 horas o comité de empresa comunicou que o encontro terminara e que as negociacións proseguirán mañá. 

"Mañá volveremos sentarnos a negociar ás nove da mañá. Fixemos unha última proposta, para tentar desbloquear a situación, que está moi bloqueada", recoñeceu o presidente do comité de empresa, José Antonio Zan, en declaracións aos medios de comunicación ao finalizar a reunión. 

Acompañado por outros membros do comité, Zan insistiu en que a proposta da representación dos traballadores inclúe "suspender a folga", a cambio dunha serie de condicións que Alcoa debería cumprir para chegar a esa paz social. 

A cambio da desconvocatoria da folga, que segundo cálculos da multinacional xa provocaría máis de dez millóns de euros en perdas -dado que non se permite a saída de aluminio da fábrica de San Cibrao-, "Alcoa sentaría a negociar" a venda da factoría á SEPI e tamén se comprometería por escrito a non parar ningunha das series. 

Ademais, dixo Zan, "mantería o persoal para a produción diaria e o mantemento das instalacións". 

A reunión telemática que ambas as partes celebraron o pasado xoves -día 7 de xaneiro- tamén terminou sen que se cerrase un acordo para suspender a folga indefinida, condición que a multinacional pon para reiniciar a negociación de cara a unha posible venda da planta mariñá.