CRTVG

Buscar

Alcoa San Cibrao agarda unha caída do 90% dos seus ingresos tras a última poxa eléctrica

Publicado o 19/12/2019 17:50

• Alerta que producir aluminio en España é agora "inviable"

A redución do 60% na poxa da potencia de servizos de interrumpibilidad para consumidores industriais de enerxía no primeiro semestre de 2020 provocou unha caída do 90% nos ingresos de Alcoa por interrumpibilidade, o que fai "inviable" para a multinacional a produción de aluminio primario en España.

Así o trasladou a compañía nun comunicado, despois da validación formal do resultado da poxa por parte da Comisión Nacional de Mercados e a Competencia (CNMC), que se saldou coa adxudicación dos 1.000 megawatts (MW) que se puñan en xogo para os grandes consumidores de electricidade por un importe total de 4,38 millóns de euros, despois de que o prezo medio de asignación sufrira un recorte do 90% fronte á última poxa realizada.

Para a empresa, esta redución no valor obtido na poxa "empeora a situación da planta de aluminio de San Cibrao (Lugo), ao avanzar que terá un impacto inmediato nos seus custos de enerxía a partir do próximo 1 de xaneiro. Alcoa alerta así de que estes custos de enerxía en España "agudizan aínda máis" a posición non competitiva respecto dos países veciños da Unión Europea, onde considera que os respectivos gobernos "estableceron marcos enerxéticos estables para que esta industria teña un custo enerxético predicible e competitivo".

Alcoa participou nesta poxa co obxectivo de obter o maior valor posible dos servizos de interrompibilidade para a súa planta de aluminio de San Cibrao (Lugo), único produtor de aluminio primario en España na actualidade. Con todo, a multinacional resalta que o resultado da poxa achega á planta de Alcoa en San Cibrao un valor "significativamente inferior" ao dos servizos de interrumpibilidade de poxas anteriores.

Segundo un gráfico que achega a compañía, o prezo da electricidade nesta planta de aluminio en Lugo durante o primeiro semestre do próximo ano será de 58,6 euros o megawatts hora (MWh), fronte a 54,3 euros en 2019 ou 54,5 en 2018, por mor da caída dos ingresos por interrompibilidade.