Na sección sexta da Audiencia Provincial da Coruña con sede en Santiago de Compostela compareceron os dous albaneses acusados de delito continuado de roubo con forza en 11 vivendas de Ourense e Pontevedra. A falta dun intérprete de albanés obrigou a adiar a celebración do xuízo. 

Os dous homes de nacionalidade albanesa estan acusados dun delito continuado de roubo con forza en 11 vivendas das provincias de Pontevedra e Ourense, durante o mes de novembro de 2018, apoiados por outros tres concidadáns fuxidos e declarados en rebeldía. Á última hora da mañá quedaba suspendido o xuízo ante a falta dun intérprete de albanés solicitado polos acusados.

A fiscalía pide para ambos os dous penas de 6 anos de cadea polos delitos de roubo con forza en casa habitada, e tres anos máis para un dos acusados por falsidade documental. Ademais deberán facer fronte a unha indemnización que suspera os 80.000 euros polos obxectos roubados e os danos causados nas vivendas. Penas que poderían reducirse no caso de que aceptaran o acordo de conformidade.

A nova data do xuízo quedou fixada para primeiros de decembro, se ben quedaría visto para sentenza antes no caso de aceptación do acordo.