CRTVG

Buscar

CRTVG Viva

Novas CRTVG

As radios públicas autonómicas reforzan o seu labor no mundo dixital

24/02/2021

Aumentan as visitas, número de descargas, usuarios únicos e reproducións dos seus programas de radio online e podcasts en 2020
 
A Radio Galega obtivo en 2020 a súa mellor marca histórica. As canles dixitais incrementaron máis dun 10 % o seu impacto global e a súa aposta polos podcast foron claves para acadar grandes datos de audiencia dixital

As radios públicas autonómicas reforzan o seu labor no mundo dixital

Santiago, 24.02.2021.-  As radios son unha parte fundamental dos servizos audiovisuais públicos autonómicos englobados na Federación de Oganismos de Radio e Televisión Autonómicos (FORTA). Nos últimos tempos, este medio tivo que reinventarse e ir adaptándose aos constantes cambios, á nova maneira de consumir e ao crecemento de Internet. Durante o 2020, as radios reforzaron a súa aposta polo mundo dixital, o cal se viu reflectido no éxito e crecemento dos seus contidos online.

2020 foi o ano da información de servizo público. No medio dunha pandemia sen precedentes, os medios públicos galegos responderon dando o máximo servizo público da súa historia, e este traballo viuse recompensado pola sintonía e fidelidade da audiencia. Todas as canles da Corporación melloraron a súa audiencia en 2020. CRTVG pechou o ano cunha cota media anual do 10,6 %, (TVG 9,9 % e a G2 0,7 %, un crecemento dun 6 % respecto de 2019). A Radio Galega obtivo a súa mellor marca histórica, e as canles dixitais incrementaron máis dun 10% o seu impacto global, cun crecemento interanual do portal crtvg.gal do 16 % no número de sesións.

Os cambios na programación de Radio Galega e Radio Galega Música (RGM), e a súa aposta polos destacados e podcast foron claves para lograr uns grandes datos de audiencia dixital en 2020.

En Radio, RGM creceu un 16 % con respecto a 2019 e os podcast de Radio Galega, un 9 %. Os directos disparáronse o catro últimos meses do ano, do mesmo xeito que o seguimento en redes sociais. E RGM iniciou 2021 con cifras altas de consumo, sen deixar de crecer desde abril de 2020 e un pico de consumo en novembro pasado (27.665 usuarios únicos).

Máis visitas, descargas e usuarios nas emisoras de Forta

Pola súa parte, Canal Sur Radio pechou o ano 2020 con 7.039.624 visitas na súa web (un millón de páxinas máis que o ano anterior) e 1,6 millóns de usuarios únicos, o que supoñen 600.000 usuarios máis que en 2019.  

Catalunya Ràdio obtivo 43 millóns de reproducións de audio, a través da súa web, app, podcast e asistentes de voz. Iso representa un incremento do 17 % respecto ao 2019.

Durante este ano, Onda Madrid logrou un crecemento, non só de usuarios, que ascenden a 3.455.141, un 59 % máis que o ano anterior. O número de páxinas vistas da emisora chega ás 7.255.171, o que supón un 41 % de crecemento fronte á tempada anterior.

300.000 persoas conectáronse á radio en directo de À Punt a través da web, as aplicacións móbiles ou dispositivos intelixentes, e consumíronse máis de 120.000 contidos á carta.

As radios do grupo EITB (Euskadi Irratia, Radio Euskadi, Radio Vitoria, Gaztea, Eitb Irratia e Euskal Kantak) continúan crecendo en Internet, con máis de 410.000 usuarios únicos ao mes e cunha audiencia nas súas emisións online de 50.000 usuarios únicos.

Os programas de Radio Castilla-La Mancha obtiveron máis de 350.000 visitas na súa web corporativa en 2020; case 1 millón de reproducións de podcast, como ‘El Dragón invisible’ ou o programa ‘808 Radio’, especializado en música electrónica, que aglutina preto de 300.000 reproducións.

Onda Regional de Murcia está en continua expansión en internet: durante o 2020 a súa web rexistrou unha media de 100.000 usuarios únicos por mes triplicando as cifras do ano anterior, e ao redor de 4,5 millóns de accesos, o que se traduce en máis de 16 millóns de clics entre visitas, descargas e reproducións dos seus contidos, un dato que supón dobrar a cifra de 2019.

Neste sentido, o impacto de Aragón Radio foi sobresaliente durante o último ano, ao superar os 4,5 millóns de audios descargados (o que supón un crecemento do 22 %), un millón máis que o ano anterior.

IB3 Ràdio incrementou a súa presenza online a través de diferentes formatos e canles. Así, a canle balear logrou que os seus usuarios consumisen máis de 234.131 contidos á carta a través das plataformas dixitais. Durante o 2020, un total de 162.697 persoas conectáronse á radio en directo a través da páxina web, a App e a plataforma de podcasting de Ivook e Spotify.

As emisoras en RRSS

Ademais, a presenza das radios públicas en redes sociais é cada vez máis notoria. As emisoras atoparon nas plataformas o aliado perfecto para achegarse ao público máis novo -e máis esixente- captando a atención de novos oíntes.

A Radio Galega obtivo un crecemento do 7 % en Facebook e do 17 % en Twitter, mentres que Aragón Radio conta cunha activa comunidade de seguidores en redes que ascende a máis de 145.000 persoas.

Canal Sur Radio aumentou a presenza das súas emisoras en RRSS: por exemplo, Canal Fiesta Radio ten 388.385 seguidores e é a emisora da casa con maior presenza, converténdose en TT todos os días en Twitter.

Catalunya Ràdio destaca a súa evolución no panorama dixital: entre as súas canles de Youtube, Instagram TV ou Spotify, o número de reproducións ascende a un total de 3 millóns.

As canles de EiTB teñen gran presenza en plataformas como Spotify, Ivoox ou iTunes, así como en Facebook, Twitter e Instagram. Os contidos de Radio Castilla-La Mancha, pola súa banda, superaron as 150.000 reproducións en Youtube durante o 2020. A presenza de ORM en redes sociais tamén creceu de maneira exponencial nos últimos anos, principalmente en Twitter e Facebook, onde a radio autonómica conta con preto de 50.000 seguidores.

As temáticas máis demandadas

Entre as temáticas de máis éxito para os oíntes das radios públicas autonómicas atópanse os programas informativos e os espazos deportivos, mantendo sempre unha presenza relevante os programas de humor e de música.

Entre os andaluces e os valencianos os programas máis destacados son os de humor. Destacan principalmente os programas de actualidade entre os cataláns, vascos e murcianos.

O deporte é outra temática moi demandada, exemplo diso son os programas de Castilla-La Mancha, Canal Sur, Radio Euskadi e Radio Galega. Precisamente, os eventos deportivos do último trimestre incrementaron considerablemente o número de usuarios únicos, tanto nas canles dedicadas ao deporte como na propia emisión de Radio Galega e Televisión de Galicia.

Tamén son os que máis crecen os programas deportivos de Onda Madrid, À Punt Aragón Radio. Ademais, os madrileños apostan por un novo contido que se consome maioritariamente a través da web, relacionado coas ofertas de emprego e que resolve dúbidas laborais por parte do SEPE.

ler máis

A Banda da Loba, protagonista dun novo concerto do ‘Galicia Emerxe’, esta noite na G2

24/02/2021

Xiana Lastra, Andrea Porto, Marcela Porto, Inés Mirás e Estela Rodríguez son as artífices deste grupo, que mestura pop, blues, folk, rock e sons tradicionais

A Banda da Loba, protagonista dun novo concerto do ‘Galicia Emerxe’, esta noite na G2

Santiago, 24.02.2021.-   A Banda da Loba é o novo grupo que se sobe esta noite ao escenario do ciclo ‘Galicia Emerxe’ e que ofrece a G2 a partir das 23.25 horas. Esta formación galega, integrada por cinco mulleres que uniron as súas traxectorias individuais para crear un proxecto colectivo, mestura nas súas propostas pop, blues, folk, rock e sons tradicionais, creando un estilo musical singular e heteroxéneo. Cunha duración de 40 minutos, este concerto estará dispoñible na web dos medios públicos galegos unha vez finalizada a súa emisión pola segunda canle da Galega e o sábado poderase ver na TVG (10.40 h) amais de escoitarse tamén en Radio Galega Música (22.00 h).

Xiana Lastra, Andrea Porto, Marcela Porto, Inés Mirás e Estela Rodríguez publicaron o primeiro e recoñecido álbum de A Banda da Loba, ‘Bailando as rúas’, en 2017. No seu repertorio, inclúen temas propios e outros baseados nas letras de autores galegos como Celso Emilio Ferreiro e Manuel María ou Rosalía de Castro, e os poemas contemporáneos de Rosalía Fernández e Celia Parra.

No ciclo ‘Galicia Emerxe’, conformado por un total de 50 concertos de destacados artistas e grupos galegos, gravados no Museo Centro Gaiás da Cidade da Cultura, contarase nas vindeiras semanas coa música de Sés, Luar na Lubre, Wöyza, Budiño, Rodrigo Romaní, Novedades Carminha, Triángulo de Amor Bizarro, Susana Seivane, Uxía, Eladio y los Seres Queridos e De Vacas, entre outros.

A CRTVG asinou un convenio coa Axencia Galega de Industrias Culturais (Agadic) para difundir o ciclo ‘Galicia Emerxe’ no exercicio do seu papel como servizo público e co afán de apoiar o sector musical e de contribuír a visibilizar o seu traballo.

ler máis

Este mércores, fútbol por radiogalega.gal

23/02/2021

A primeira cita deportiva que ofrece a emisora pública é o derbi galego entre o Rácing de Ferrol e o Celta B

Este mércores, fútbol por radiogalega.gal

Santiago, 23.02.2021.-  Outro mércores de fútbol o que poderán vivir os oíntes da Radio Galega a través da páxina web radiogalega.gal, aplicacións móbiles e tamén pola conta de Twitter galiciangoles. Desde as cinco menos cinco da tarde, Paco Santos presenta máis de cinco horas de retransmisións.

A primeira cita é na Malata, co derbi Rácing de Ferrol-Celta B da Segunda División B. Raúl Villares e Roberto Carlos Carballo trasladarán a emoción do fútbol nun encontro que afecta tamén aos outros equipos galegos implicados na pelexa por ascender ou permanecer.

Desde as sete e media, o interese pasará pola Terceira División con tres citas: o derbi local Fabril-Silva, o Bergantiños-As Pontes e o Paiosaco-Fisterra. Ademais, o programa estará pendente do balonmán feminino coa disputa do Guardés-Málaga da máxima categoría, no pavillón da Sangriña.

Na FM, os oíntes poderán estar informados do que pasa nesta xornada ás 20.30 horas no espazo de deportes de 'A Crónica' e, a partir das 23.00 horas, 'Ao contraataque' falará cos principais protagonistas.

ler máis

A CRTVG colabora co programa educativo '21 días co galego e +' para promover o galego fóra das aulas

22/02/2021

O magazine ‘Galicia por Diante’ da Radio Galega conversará cada día con alumnos e e profesores dun dos dez colexios participantes

O proxecto #DígochoEu visitará virtualmente eses centros de ensino, comezando este xoves co IES Taboada Chivite de Verín

'21 días co galego e +' é un programa de Política Lingüística, que busca favorecer o uso do galego oral entre a xente nova

A CRTVG colabora co programa educativo '21 días co galego e +' para promover o galego fóra das aulas

Santiago, 22.02.2021.- A CRTVG colabora desde hoxe no programa educativo ’21 días co galego e +’, que leva a cabo a Secretaría Xeral de Política Lingüística para promover o uso do galego oral entre a xente nova, dentro e fóra dos centros de ensino. Ata o 14 de marzo, o espazo da Radio Galega ‘Galicia por Diante’ e o proxecto #DígochoEu da CRTVG serán cómplices desta nova edición para favorecer o uso e perfeccionamento da nosa lingua en todos os ámbitos e, mesmo dun xeito divertido, mellorar o coñecemento sobre o galego. Nesta iniciativa, en que participan dez centros das catro provincias galegas da ESO, de bacharelato e de FP, o alumnado comprométese co seu profesorado a falar soamente en galego as 24 horas do día durante os 21 días de duración.

Cada día, o magazine ‘Galicia por Diante’ da RG (tamén nas fins de semana) acollerá unha sección con algún dos dez centros de ensino participantes, en que se tratarán temas relacionados coa lectura, a lingua e os colexios, entre outras cuestións. Desde o martes 23 e a partir das 13.00 horas, durante uns dez minutos, conversarase en directo cunha representación dun colexio, que estará formada por unha alumna, un alumno e unha/un docente. Na fin de semana, esta conversa desenvolverase ás 10.45 horas. A RG presentoulle esta iniciativa aos seus oíntes este luns, cunha entrevista conxunta coa promotora da mesma Pilar Ponte e o secretario xeral de Política Lingüística, Valentín García, e coa participación de Víctor F. Freixanes, presidente da Real Academia Galega.

Charlas virtuais do #DígochoEu nos dez colexios participantes

Pola súa parte, o proxecto #DígochoEu visitará virtualmente o xoves o IES Taboada Chivite de Verín, nunha sesión que atenderán arredor dun cento de estudantes. Os xornalistas Carlos Amado e Esther Estévez retoman, aínda que sexa virtualmente, os encontros cos centros escolares para difundir os obxectivos de #DígochoEu, espallar o uso do galego e promover o seu uso correcto. En total, realizaranse dez charlas ao longo das vindeiras semanas.

#DígochoEu é xa o proxecto sobre lingua máis seguido na historia dos medios públicos galegos. Con marcas de seguimento na web e nas redes sociais, o espazo chegou esta semana a máis de 10 millóns de visualizacións en TikTok, onde a seguen 80.000 persoas. Esta conta foi creada a finais de setembro e os seus vídeos acadaron desde entón 1,1 millóns de likes. Cun formato moi divertido e dinámico, a xornalista Esther Estévez convida a falar mellor en galego nun breve vídeo diario, de tan só 1 minuto. #DígochoEu naceu en xaneiro de 2020 dentro da web dos servizos informativos e hoxe pode verse na web crtvg.gal, en g24.gal, así como nas contas de Instagram (@g24noticias), Twitter (@g24noticias), Facebook (g24noticias), Youtube (youtube.com/tvg) e TikTok (tiktok.com/@digochoeu) e no Telexornal da TVG. Dirixido polo xornalista Carlos F. Amado, #DígochoEu conta coa revisión do servizo de asesoramento lingüístico da CRTVG da man de Rocío Pérez, quen tamén participará nas sesións.

Dez centros de ensino participan en ‘21 días co galego e +’

Este programa ten a súa orixe en ‘21 días co galego’, unha experiencia didáctica que botou a andar no IES da Pobra do Caramiñal no ano 2013, da man da profesora Pilar Ponte. A Secretaría Xeral de Política Lingüística quixo dar un paso máis e exportou a iniciativa a outros centros educativos, no marco do Plan de dinamización da lingua galega na mocidade. Na edición de 2021 son dez os centros de ensino galegos, que desenvolven os contidos do programa: IES Perdouro de Burela, IES As Mariñas de Betanzos, IES de Carral, CPR A Inmaculada de Lugo, IES Lamas de Abade de Santiago, IES Ramón Cabanillas de Cambados, IES Sánchez Cantón de Pontevedra, IES Lauro Olmo do Barco de Valdeorras, IES Santa Irene de Vigo e IES Taboada Chivite de Verín.


ler máis

O portal web da CRTVG, líder das canles autonómicas en canto a minutos de consumo no mes de xaneiro

19/02/2021

Os medios públicos galegos incorpóranse á auditoría de medios en liña que realiza OJD para certificar a difusión dos sitios web en España

O portal web da CRTVG, líder das canles autonómicas en canto a minutos de consumo no mes de xaneiro

Santiago, 19.02.2021.-    A web da TVG é líder das autonómicas en canto minutos de consumo en xaneiro. O portal web da Corporación de Radio e Televisión de Galicia (CRTVG), e tamén o de Telemadrid, incorporouse á auditoría de medios en liña que realiza OJDinteractiva, división de OJD que certifica a difusión dos sitios web en España. As dúas canles únense deste xeito ao grupo de televisións autonómicas que xa eran controladas (EiTB, Canal Sur, Corporación Medios de Castilla-La Mancha, RTVCanarias, RTVCeuta e La RiojaTV) e  confírmanse como webs destacadas en cada comunidade autónoma polo tráfico rexistrado en xaneiro, quedando integradas na clasificación de ‘Entretenimiento-Broadcast’.

Segundo estes datos certificados, o portal www.crtvg.gal obtivo de media diaria 38.000 usuarios en xaneiro, que realizaron 50.000 visitas, con 117.000 páxinas vistas; e rexistrou unha duración media por visita de 6:37 minutos, o que indica un gran consumo de contidos audiovisuais e o maior dato entre as autonómicas. O informe reflicte tamén que a páxina de inicio recolle de media o 10% das impresións totais do medio. É salientable que o 24 de xaneiro, crtvg.gal acadou un récord diario de usuarios (72.614), visitas (98.000) e páxinas vistas (205.000).

No que respecta á procedencia xeográfica das visitas de xaneiro, un 89% corresponden a tráfico de España, un 47% desde a propia Galicia, seguida de usuarios de Madrid e Cataluña. Un 75% dese tráfico chega desde de dispositivos móbiles, nun 24% con orixe nas redes sociais.

ler máis

Valencia-Celta, Lugo-Logroñés e a Segunda B, protagonistas do ‘Galicia en goles’ esta fin de semana

18/02/2021

Os afeccionados ao hóckey a patíns poderán seguir tamén, en directo, o partido que xogará este venres o Liceo contra o Voltregá

Valencia-Celta, Lugo-Logroñés e a Segunda B, protagonistas do ‘Galicia en goles’ esta fin de semana

Santiago, 18.02.2021.- O equipo deportivo da Radio Galega inicia a programación da fin de semana o venres ás oito e media da tarde coa análise do que serán os partidos destacados do sábado e domingo, ademais de seguir o Liceo-Voltregá de hóckey a patíns.

O sábado, desde as 3 da tarde, a atención estará centrada no Valencia-Celta, da Primeira División, e no derbi provincial Rácing de Ferrol-Deportivo da Coruña, da Segunda B, na Malata. Outro encontro de rivalidade, Ourense CF-Arenteiro, destaca na Terceira Galega.

Xa o domingo, ás 12, o interese pasará polo Celta B-Salamanca, de Segunda B, o Estradense-Ribadumia, de Terceira, e o encontro de fútbol sala entre o Parrulo e o Levante, na Malata. A partir das 3, o derbi de Segunda B entre o Pontevedra e o Compostela, en Pasarón, xunto á visita do Coruxo a Guijuelo e a xornada de Terceira centrarán a sesión de tarde. Desde as oito e media, o Lugo-Logroñés, de Segunda División A, ocupará a última faixa do ‘Galicia en goles’.
    
Durante a fin de semana, a Radio Galega emite outros espazos de temática deportiva. O sábado, á 1 do mediodía, Alfonso Pardo visita o concello coruñés de Coirós para dar voz no ‘Convivir’ ao taekwondo e o kick boxing. Ás 11 da noite, Rodrigo Pérez actualiza o mundo do motor no ‘Gas a fondo’, mentres ás once e media da noite Toni López conversa no ‘Galicia en Toquio’ coa tiradora de esgrima Judith Rodríguez.

O domingo, ás 11 da noite, os afeccionados ao fútbol teñen tamén unha cita con Pedro Pablo Alonso na mesa de debate de ‘Ao contraataque’.

ler máis

O proxecto #DígochoEu da CRTVG, Premio Paraugas de Comunicación 2020

12/02/2021

Carlos Amado, xornalista e director deste divertido e dinámico espazo, recolleu o galardón nunha gala virtual celebrada este venres

Presentado pola xornalista Esther Estévez, coa revisión do servizo de asesoramento lingüístico da CRTVG da man de Rocío Pérez, #DígochoEu fixo un ano o pasado 1 de xaneiro

O proxecto #DígochoEu da CRTVG, Premio Paraugas de Comunicación 2020

Santiago, 12.02.2021.-    #DígochoEu, o proxecto educativo da CRTVG arredor da lingua galega, recibiu esta noite o Premio Paraugas de Comunicación 2020 na categoría de Mellor Execución de Idea. O xornalista Carlos Amado, director do espazo, recolleu o galardón nunha gala virtual celebrada este venres. #DígochoEu impúxose aos proxectos ‘Hoy es un anuncio, mañana no’, de Astrágalo Studio, e ‘Queixo Tetilla: outra forma de ver a vida’, de Idea Creatividad y Comunicación aos que tamén felicitamos e saudamos desde aquí.

ler máis

Chega á TVG 'Sen Fronteiras', un novo formato de entretemento coproducido coa televisión pública portuguesa

10/02/2021

Presentado polo galego Javier Varela e a lusa Beatriz Gosta, o programa percorrerá lugares de Galicia e Portugal co mesmo topónimo e comprobará se os nomes teñen a mesma orixe

En cada viaxe, coñecerase o que comparten galegos e portugueses e as tradicións, a cultura ou a gastronomía de cada vila

Chega á TVG 'Sen Fronteiras', un novo formato de entretemento coproducido coa televisión pública portuguesa

Santiago, 10.02.2021.-    As televisións públicas galega e portuguesa seguen a estreitar lazos e este sábado chega á programación da TVG a súa última colaboración coa Rádio e Televisão de Portugal (RTP): ‘Sen Fronteiras’, un espazo televisivo para coñecerse mellor e que descubrirá semana a semana o parecidos que somos a ambos os dous lados da raia.

En ‘Sen Fronteiras’, que se emitirá arredor das 20.30 h, os televidentes descubrirán diferentes lugares galegos e portugueses co mesmo topónimo. O galego Javier Varela e a portuguesa Beatriz Gosta farán de guías e viaxarán a estas vilas para comprobar se estes topónimos teñen a mesma orixe. Así, por exemplo, este sábado Beatriz estará en Ribeira e Javier en Ribeira da Pena e, nas seguintes semanas, na Pontenova e Ponte da Lima, en Vimianzo e Vimoso, en Baiona e Baiâo e na Pobra do Brollón e Póvoa do Varzim, entre outros moitos lugares.

Os presentadores tamén coñecerán as súas tradicións, a súa cultura, a súa gastronomía, as súas festas e as súas xentes. Ambos os dous descubrirán as vilas en primeira persoa e contarán o que máis lles sorprende e lles gusta de cada lugar. ‘Sen Fronteiras’, que tamén será emitido na RTP1, está producido pola galega M International Audiovisual e a produtora portuguesa SPI, froito das relacións xurdidas no V Foro de Coprodução Galicia-Portugal, encontro audiovisual galaico-portugués celebrado a finais de 2019 en Arnoia (Ourense) impulsado por Agadic e o ICA portugués.

Intensa relación co audiovisual portugués

A CRTVG mantén unha intensa relación de colaboración coa Radio Televisión Portuguesa (RTP), en que se enmarcan diversos desenvolvementos entre Galicia e Portugal dos que nos últimos anos resultaron coproducións e programas conxuntos con moi boa acollida nos dous países. Entre os máis recentes, programas conxuntos como ‘Aquí Portugal’ ou series como ‘Auga Seca’, da que actualmente se está a gravar a segunda temporada entre Vigo e Lisboa, despois do éxito da primeira nas dúas canles. Outro proxecto de ficción de marcado carácter transfronteirizo foi a serie xuvenil emitida en 2019, ‘Verão M’, que fora rodada entre o norte de Portugal e localizacións galegas e que acontece a ambos os dous lados da raia.

ler máis

Os temas máis destacados do 'Diario Cultural', xa dispoñibles no Instagram do programa da Radio Galega

08/02/2021

A nova conta diarioculturalrg incluirá tamén avances das propostas dos colaboradores e outros contidos culturais da emisora, como os podcast dos espazos de música galega e as distintas edicións do ciclo de concertos ‘Galicia Emerxe’

Os temas máis destacados do 'Diario Cultural', xa dispoñibles no Instagram do programa da Radio Galega

Santiago, 08.02.2021.-   A Radio Galega pon en marcha este luns a conta de Instagram diarioculturalrg, en que se colgarán os temas máis destacados do programa ‘Diario Cultural’ a través das publicacións e stories desta rede social.

Así mesmo, as voces expertas do programa, que integran a súa ampla nómina de colaboradores, farán vídeos de avance das súas propostas semanais, polo que os seguidores do ‘Diario Cultural’ poderán coñecer de antemán os temas que se se tratarán en cada intervención.

Esta nova conta de Instagram tamén acubillará outros contidos culturais da Radio Galega e Radio Galega Música, como o lanzamento dos podcast dos programas de música galega que se emiten cada semana e as distintas edicións de ‘Galicia Emerxe’, ciclo de concertos de destacados artistas e grupos galegos, que se ofrecen cada semana a través das dúas canles da TVG, da web crtvg.gal e de Radio Galega Música.

ler máis

A TVG retransmitirá o Campionato do Mundo de Motocrós ata o ano 2022

08/02/2021

Despois do éxito das emisións en 2020, a Galega renovou con Infront Moto Racing o acordo para dous anos máis

Os afeccionados galegos poderán seguir toda a actualidade do motocrós na G2 e tamén nas canles dixitais

A TVG retransmitirá o Campionato do Mundo de Motocrós ata o ano 2022

Santiago, 08.02.2021.-   Televisión de Galicia retransmitirá o Campionato do Mundo de Motocrós (MXGP) ata o ano 2022, despois de facerse cos seus dereitos na renovación do contrato con Infront Moto Racing, a entidade organizadora deste evento deportivo.
    
A renovación do acordo por dous anos máis chega despois do éxito das retransmisións de 2020 na grella da TVG. En febreiro do ano pasado, a Galega converteuse na única televisión en España en ofrecer, en aberto e en directo, o Campionato do Mundo de Motocrós, coa estrea do lucense Jorge Prado, bicampión do mundo de MX2, na máxima categoría MXGP. Neste 2021 e o vindeiro 2022, os afeccionados galegos poderán seguir na Televisión de Galicia a traxectoria de Prado, un dos mellores talentos actuais da escena internacional do motocrós.

Os xornalistas deportivos da canle pública comentarán os domingos, en directo, a celebración dos grandes premios. E tamén as redes sociais da CRTVG prestarán unha atención especial a cada unha das probas do torneo.

ler máis