CRTVG

Buscar

CRTVG Viva

Novas CRTVG

Dúas novas xornadas da Liga de traiñeiras e o Campionato do Mundo de Motocrós, esta fin de semana, en vivo, na G2

14/08/2020

As competicións de remo celebraranse en augas guipuscoanas e a quinta proba de MXGP, no circuíto de Kegums, Letonia

Dúas novas xornadas da Liga de traiñeiras e o Campionato do Mundo de Motocrós, esta fin de semana, en vivo, na G2

Santiago, 14.08.2020.-  As transmisións deportivas desta fin de semana comezan na G2 coa dobre cita que vivirán nas augas da localidade guipuscoana de Zarautz as mellores embarcacións de traiñeiras femininas e masculinas. Dúas xornadas en que se disputará unha das regatas máis agardadas do Cantábrico a Zarauzko XLIII e XII Ikurriña da Eusko Label Liga e da Euskotren Liga, respectivamente.

Os afeccionados ao mellor remo poderán gozar o sábado destas competicións, desde as 17.35 h, horario en que se celebra primeiro a xornada feminina, para continuar ás 18.00 h coa quenda da Liga ACT. Do mesmo xeito, o domingo, emitiranse tamén ambas regatas, en directo, a partir das 11.35 horas, as mulleres e, ao mediodía, os homes. Na competición masculina, liderada polos remeiros de Bermeo, as embarcacións galegas Cabo de Cruz e Ares ocupan o sétimo e o décimo primeiro posto da táboa, respectivamente.

O domingo, será tamén o momento do mellor motociclismo na G2, que ofrecerá unha nova cita do Campionato do Mundo de Motocrós. Ás 14.00 horas poderase ver a Race 1 da quinta proba e, a partir das 15.00 h, en directo, a Race 2. De novo, esta proba de MXGP, que conta coa participación do lucense Jorge Prado, celebrarase no circuíto de Kegums, en Letonia, pechando así o triple gran premio co que a organización do torneo busca recuperar parte do tempo perdido por mor da Covid-19.

ler máis

A Galega conmemora o centenario do nacemento de Díaz Pardo

13/08/2020

Na faixa do ‘prime time’, do 17 ao 21 de agosto, ofrecerá espazos en que o humanista e intelectual galeguista reflexiona sobre a súa vida e a súa traxectoria artística
 
O propio día do aniversario, o sábado día 22, a TVG emitirá unha entrevista exclusiva e inédita concedida por Isaac Díaz Pardo pouco antes do seu falecemento

A Galega conmemora o centenario do nacemento de Díaz Pardo

Santiago, 13.08.2020.-  A CRTVG programará durante a próxima semana, entre o 17 e o 22 de agosto, unha serie de espazos diarios para conmemorar o centenario do nacemento de Isaac Díaz Pardo (22 de agosto de 1920). En horario de ‘prime time’, a G2 ofrecerá desde o luns algúns dos programas realizados pola canle pública en que o intelectual galeguista, pintor, ceramista, deseñador, editor e empresario conversa e reflexiona sobre a súa vida e a súa traxectoria profesional. O propio sábado día 22, a TVG emitirá na faixa da sobremesa a derradeira entrevista concedida por Isaac Díaz Pardo, dous meses antes da súa morte.

Esta programación especial comezará na G2 o próximo luns e estenderase ata o venres, en horario de noite. Cada xornada, tras a emisión do ‘Telexornal Serán’, poderán verse distintos programas realizados pola Galega en que o Díaz Pardo era o protagonista. Neles, o humanista fai un percorrido pola súa vida, lembra a súa formación multidisciplinar, ou fala sobre o seu labor na empresa de Sargadelos e sobre o Instituto Galego de Información, entre outros temas.

Así, o luns 17, a G2 recuperará o programa ‘Os almorzos do hostal’ (2004), onde Díaz Pardo falaba sobre a súa vida, e ao día seguinte emitirase unha entrega de ‘Por amor á arte’ (1999), en que ademais de facer demostracións da súa versatilidade artística, o intelectual galego lembrará a súa formación no taller do seu pai e falará de Sargadelos, a primeira empresa da península en introducir o deseño industrial e formas mecánicas de produción. El mesmo deseñou o mobiliario, edificios e patentou tamén máquinas e fornos.
    
No ‘Volver ao rego’ (2006) do mércores poderase velo nunha conversa, nun ton distendido, co presentador Xosé Luís Barreiro. O xoves, ‘Díaz Pardo: o artista total’ (2002) fai un repaso pola súa vida, coas intervencións de Xavier Seoane, Antón Sobral e Manuel Rivas, entre outras testemuñas. E o venres á noite emitirase unha entrega de ‘Pegadas na memoria’ (2010), en que o intelectual reflexiona sobre a súa traxectoria vital e artística.

O día do seu aniversario, o sábado día 22, rematará a programación especial dedicada a este gran visionario, coa emisión en TVG, na faixa da sobremesa, dunha entrevista exclusiva e inédita concedida por Isaac Díaz Pardo á canle pública, dous meses antes da súa morte.

Radio Galega e web

Pola súa parte, o ‘Diario Cultural’ da Radio Galega ofrecerá na edición do venres, ás 14.30 horas, un monográfico sobre Díaz Pardo. Tamén a web da Corporación incluirá a próxima semana unha sección, dispoñible na portada da páxina e no apartado #Cultura365, en que se recollerán as intervencións na TVG de Díaz Pardo nas súas variadas facetas creativas e intelectuais. Do mesmo xeito, as redes sociais achegarán tamén contidos diarios e, o sábado, unha peza biográfica para lembrar a súa figura e obra.

ler máis

O imaxinario fantástico galego de 'Lúa Vermella', película participada pola TVG, competirá no 23 Festival de Málaga

10/08/2020

O filme do cineasta Lois Patiño participará na sección ZonaZine do certame que, tras aprazarse pola pandemia, celebrarase entre o 24 e o 30 de agosto

A historia real do Rubio de Camelle, un mergullador que rescatou máis de 40 cadáveres de naufraxios, mestúrase nesta cinta con outros seres míticos e lendas do mar

O imaxinario fantástico galego de 'Lúa Vermella', película participada pola TVG, competirá no 23 Festival de Málaga

Santiago, 10.08.2020.-   Televisión de Galicia está de parabéns, xa que unha nova película participada polos medios públicos, ‘Lúa Vermella’, acaba de ser seleccionada para competir nun destacado certame cinematográfico. Despois da súa premiére internacional na Berlinae, competirá na sección ZonaZine da 23 edición do Festival de Málaga, que finalmente se celebrará entre o 24 e o 30 de agosto. O director da cinta, o cineasta galego Lois Patiño, e parte destacada do seu equipo presentarán a película o 25 de agosto no Teatro Echegaray.

En ‘Lúa Vermella’, o cineasta galego introdúcese na Galicia do mar, onde a realidade e a lenda se funden. O filme ambiéntase nunha localidade da costa galega onde o tempo parece que se detivo. As persoas están paralizadas aínda que as súas voces poden oírse: falan de fantasmas, de meigas, de monstros. Ao lugar chegan tres mulleres na busca do Rubio, un mariñeiro que desapareceu no mar.

No elenco destaca o Rubio de Camelle, un mergullador que rescatou máis de 40 cadáveres de naufraxios e que se interpreta a el mesmo, e Ana Marra, Carmen Martínez e Pilar Rodlos, que dan vida a un trío de meigas. A historia real do Rubio envólvese, así, por seres que habitan o imaxinario fantástico galego.

A longametraxe do galardoado Lois Patiño, que obtivo entre outros o premio ao Mellor Director Emerxente no Festival de Locarno con ‘Costa da Morte’ e gañou o Festival de San Francisco á Mellor Curtametraxe con ‘Noite sem distância’, participou ata agora con ‘Lúa Vermella’ en Ficunam (México) e nos Festivais de Shanghái (China), Jeonju (Corea) e Cartaxena de Indias – Ficci (Colombia), e ten previsto continuar o seu percorrido no IndieLisboa (Portugal) e na Mostra Internazionale do Nuovo Cinema de Pesaro (Italia), entre outros certames.

Producida por Zeitum Films e Amanita Studio, ‘Lúa Vermella’ contou tamén co apoio da Xunta de Galicia e Agadic.

ler máis

Finaliza a rodaxe de 'Welcome to ma maison', documental participado pola TVG e dirixido por Andrés Goteira

08/08/2020

O director da premiada ‘Dhogs’ narra neste novo traballo as desventuras de Igor Fernández, actor que deixa a un lado a interpretación para centrarse na investigación cinematográfica

Finaliza a rodaxe de 'Welcome to ma maison', documental participado pola TVG e dirixido por Andrés Goteira

Santiago, 08.08.2020.-  Finalizou a rodaxe de ‘Welcome to ma maison’ (‘Benvidos á miña cabeza’), documental participado pola TVG e novo traballo do galego Andrés Goteira, despois de varios meses de parada por mor da crise sanitaria. O director e guionista de ‘Dhogs’ (2017), o filme máis galardoado na historia dos Premios Mestre Mateo, realiza agora unha longametraxe documental íntima e con partes ficcionadas baseada nas desventuras do actor Igor Fernández.

Producido por Gaitafilmes, ‘Welcome to ma maison’ está protagonizado por Igor Fernández, un actor  que, tras un colapso emocional, decide afastarse da interpretación por un tempo e centrarse na investigación cinematográfica. Igor comeza a escribir un libro que versa sobre a linguaxe non verbal das mans na filmografía do director danés Nicolas Winding Refn. Desde entón, desexa encontrarse co seu idolatrado director, abrirse en canal con el e escribir un capítulo final para o seu libro. Para completar esta viaxe real e figurada de Igor Fernández, Andrés Goteira mantivo encontros con distintos referentes seus, amigos do director danés e expertos cinematográficos, que reflexionan sobre a linguaxe xestual no cine.

ler máis

'María Solinha', película participada pola TVG, competirá este mes no Scandinavian International Film Festival 2020

05/08/2020

O filme de Ignacio Vilar intervirá, xunto con outras sete longametraxes, na sección oficial do certame finlandés, entre o 22 e o 26 de agosto

A lenda desta muller icónica chegará en agosto a unha corentena de localidades galegas con proxeccións ao aire libre e en formato autocine

'María Solinha', película participada pola TVG, competirá este mes no Scandinavian International Film Festival 2020

Santiago, 05.08.2020.-   A película ‘María Solinha’, producida por Vía Láctea Filmes e a TVG, foi seleccionada para competir na sección oficial do Scandinavian International Film Festival 2020 (SCIFF 2020), cita cultural de gran relevancia, que se celebra en Helsinki do 22 ao 26 de agosto. Tras gañar o mes pasado o seu primeiro gran premio internacional no Taormina Film Fest, de Sicilia, esta nova longametraxe de Ignacio Vilar competirá neste certame da cidade finlandesa con sete longametraxes do Reino Unido, Turquía, Ucraína, Bulgaria, Rusia, a República Checa e Finlandia.

ler máis

As autonómicas póñense mans á obra para axudar o cine, a música e demais artes culturais

04/08/2020

A CRTVG está desenvolvendo desde abril un plan de medidas de apoio ao audiovisual e acaba de anunciar a súa participación en sete novos proxectos cinematográficos

As autonómicas póñense mans á obra para axudar o cine, a música e demais artes culturais

Santiago de Compostela, 04.08.2020.- Desde o inicio da crise provocada pola Covid-19, os medios de comunicación englobados en FORTA traballaron en diferentes iniciativas para apoiar os sectores máis afectados pola crise, como o turismo e a industria audiovisual. Ademais, as televisións autonómicas traballan tamén para apoiar o sector cultural dos seus territorios, que se viu especialmente afectado pola crise a raíz do peche de cines e teatros, así como pola cancelación de festivais e concertos. 

ler máis

A TVG acapara o 90% dos espazos máis vistos en Galicia no mes de xullo

03/08/2020

Foi, igual que en maio e xuño, a canle máis vista entre os espectadores novos de 13 a 24 anos

Dos 25 programas máis vistos en Galicia neste mes, 22 son espazos da Galega

A TVG acapara o 90% dos espazos máis vistos en Galicia no mes de xullo

Santiago, 03.08.2020.- A Galega foi en xullo a canle de televisión xeneralista máis vista entre os mozos de 13 a 24 anos, nun mes en que se acadou un 10,1% de cota no conxunto día, e un 10,2% no prime time e no que seguiron crecendo as audiencias dos seus informativos, que seguen a ser líderes entre os galegos.

Deste xeito, e por terceiro mes consecutivo, mantense a renovación do público da TVG nunhas faixas de idade en que o consumo de TDT é cada día máis complicado de conseguir ante a cada vez máis ampla oferta dixital.

Na clasificación dos 25 programas máis vistos en Galicia neste mes, 22 son informativos da TVG, co ‘Telexornal mediodía’ como o más visto. De media, cada un destes espazos chegou a 119.000 telespectadores por informativo (a seguinte canle, Tele5, acada 91.000). En xullo, estes informativos medraron en audiencia: o matinal ‘Bos días’, con 4,7 puntos de cota máis; o ‘Galicia noticias’ con 8 décimas máis que en xuño; o ‘Telexornal mediodía’ medrou 1,1 puntos de cota; e ‘A revista fin de semana’, 4,1 puntos máis.

A TVG é de novo a canle pública máis vista en Galicia e no que respecta ás televisións autonómicas reunidas en FORTA, a Televisión de Galicia mantén valores superiores á media destas canles en 2 puntos máis de cota.

ler máis

A TVG estrea o programa 'O son da ribeira' para amosar e poñer en valor a tradición musical da cultura mariñeira

02/08/2020

Cada semana escollerase unha canción representativa, que na primeira entrega será 'O meu amor mariñeiro', da que se escoitarán múltiples versións e se coñecerá a súa orixe

A TVG estrea o programa 'O son da ribeira' para amosar e poñer en valor a tradición musical da cultura mariñeira

Santiago, 02.08.2020.-    A cultura mariñeira ten unha conexión moi forte coa cultura musical, xa que ás xentes do mar lles gusta cantar e facer música. Non existe porto de mar onde non se poidan atopar formacións musicais, profesionais ou de afeccionados. E a maioría destas formacións son de música tradicional, aínda que existen moitos outros estilos musicais.

'O son da ribeira', o novo programa que a TVG estrea este luns ás 00.15 h, pretende poñer en coñecemento da audiencia todo este tesouro musical da cultura mariñeira. Neste espazo, realizado por Producións Celta para a Televisión de Galicia, as agrupacións musicais do mundo do mar presentarán a súa música, ao tempo que se fará visible a relación desta música cos diferentes traballos do mar.

Para facelo, escollerase cada semana unha canción representativa dun porto e investigarase sobre a súa orixe e a súa influencia na vida da vila, amosando diferentes versións dese mesmo tema ou buscando unha serie de cancións que en conxunto poidan constituírse como unha mostra do que se podería chamar o cancioneiro dun porto, dunha comarca mariñeira ou dun oficio do mar.

Na súa estrea, o programa, dirixido e presentado por X. H. Rivadulla Corcón, achegarase á canción 'O meu amor mariñeiro’, que define dous dos sentimentos máis fondos dos homes e mulleres do mar: o amor polo mar e a liberdade que este lles proporciona.

'O son da ribeira' achegarase ao porto de Sada para escoitar unha versión deste tema interpretada por Cristina Fernández, que precisamente está casada cun mariñeiro, Manolo Presas, un patrón de cerco que leva toda unha vida no mar. Outra versión da canción correrá a cargo da Coral Polifónica Brisas do Mar, de Camariñas, formada por mariñeiros, mariscadoras e os seus familiares. E tamén haberá unha terceira, a que cantarán os membros do grupo de Pontedeume Faltriqueira a bordo dun barco navegando polo golfo Ártabro.

Ademais, o espazo da TVG falará co autor da canción, Xosé Luis Rivas 'Mini', membro do grupo Fuxan os Ventos, para o que escribiu a música de 'O meu amor mariñeiro'. Explicará que a letra está baseada nun poema do portugués Manuel Alegre, poeta nado en 1936 e que goza dun gran prestixio literario en Portugal, cunha numerosa obra publicada en poesía e narrativa.

ler máis

'Vidago Palace', a primeira serie coproducida pola TVG e a RTP, chega a HBO España

01/08/2020

Esta estrea, o 1 de agosto, súmase á chegada da serie ‘Auga Seca’ tamén a HBO en abril e ao éxito internacional de ‘O sabor das margaridas’, en Netflix desde 2019

Con estas accións, a CRTVG segue estendendo a lingua e o audiovisual galegos nos mercados internacionais

'Vidago Palace', a primeira serie coproducida pola TVG e a RTP, chega a HBO España

Santiago, 01.08.2020.-    A serie da Televisión de Galicia e a canle pública portuguesa RTP ‘Vidago Palace’ estréase este sábado 1 de agosto en HBO España. Drama romántico de seis capítulos, foi a primeira coprodución galego-portuguesa das canles públicas e agora pode verse en HBO. Desde o 31 de maio está dispoñible en HBO Portugal, onde se estreou con grande éxito de público e desde hoxe, en España.

Producida pola galega Portocabo e aportuguesa Hop Filmes, ‘Vidago Palace’ transcorre nun luxoso escenario, o hotel e spa aberto en Vidago a comezos do século XX para recibir os persoeiros máis notables da sociedade europea e nun contexto marcado polos Xogos Olímpicos de Berlín, a ditadura de Salazar en Portugal, o inicio da Guerra Civil en España e a voda de Carlota de Vimiero con César Augusto da Silva, o evento máis agardado do verán. Mais Pedro, o fillo dun empregado do hotel, e Carlota, logo do seu primeiro encontro, tecerán a súa propia historia. ‘Vidago Palace’ é a historia dunha muller e un home dispostos a se enfrontar a todo para poderen vivir o seu amor.

Mentres que o portugués Henrique Oliveira foi o responsable da creación e dirección da serie, no guión tamén participaron Pepe Coira e Araceli Gonda, traendo parte da historia á fronteira entre Galicia e Portugal no verán do 1936. Con Micaela Lupu, Pedro Barroso e David Seijo como protagonistas, no elenco atópanse destacadas actrices e actores galegos como Antonio Mourelos, Eva Fernández, David Novas, David Amor, Sheyla Fariña ou Xosé Antonio Touriñán. Ademais, figuran no equipo recoñecidos profesionais do audiovisual galego, como Alfonso Blanco na produción executiva, Ana Míguez na produción, Xavi Font como creador da banda sonora ou Antonio Pereira na dirección de arte.

Esta estrea en HBO súmase a outras accións recentes, como a chegada da serie ‘Auga Seca’ tamén a HBO en abril, coas que a CRTVG segue estendendo a lingua e o audiovisual galegos polos mercados internacionais. ‘Auga Seca’ foi a segunda produción da TVG que leva o galego a unha plataforma dixital, despois de ‘O sabor das margaridas’, todo un éxito internacional en Netflix desde 2019.

Ademais, outras producións de Televisión de Galicia seguen o seu percorrido internacional, como ‘Matalobos’, que foi vendida á plataforma dos EUA e América Latina Ocean New Media, a través da distribuidora Videoplugger; ‘Hotel Almirante’, que tamén chegará a través desta mesma distribuidora a unha plataforma SVOD con sede nos EUA e ao servizo de homevideo MHZ Choice; e ‘Tres camiños’, produción internacional participada pola TVG que poderá verse en Amazon Prime Video a comezos de 2021. E, no ámbito do público infantil, a serie ‘As aventuras de Minchi’, que se verá nunha plataforma OTT na China.

ler máis

O Campionato de España de traiñeiras, esta fin de semana, en directo na G2

31/07/2020

A LXXIII edición desta competición coincide co 125 aniversario da Sociedade Deportiva de Remo Pedreña

O Campionato de España de traiñeiras, esta fin de semana, en directo na G2

Santiago, 31.07.2020.-   Este domingo, os afeccionados ao deporte acuático estarán acompañados polos medios públicos galegos, que ofrecerán, en directo pola G2, a LXXIII edición do Campionato de España de Traiñeiras.

ler máis