CRTVG

Buscar

CRTVG Viva

Novas TVG

O especial 'Cando me namorei de Juan' achégase esta noite aos grandes amores de Juan Pardo

11/08/2020

Descubrirá a faceta máis persoal dun dos nosos cantantes máis internacionais e afondará nas súas paixóns e na súa estreita relación con outras artistas e fans

O especial 'Cando me namorei de Juan' achégase esta noite aos grandes amores de Juan Pardo

Santiago, 11.08.2020.- A nova proposta de entretemento da Televisión de Galicia para o martes á noite arranca hoxe coa emisión do primeiro dunha serie de especiais, de temática variada, que afondarán na vida de persoeiros, eventos ou mesmo certames curiosos, que sobresaen en Galicia. Nesta ocasión, Juan Pardo será o gran protagonista de ‘Cando me namorei de Juan’ (22.00 horas), espazo que descubrirá a faceta máis persoal dun dos cantantes galegos máis internacionais.

‘Cando me namorei de Juan’ afondará nas paixóns do artista, coñeceranse os seus amores de familia e xuventude, a súa estreita relación con outras famosas ou a predilección que sentían por el as fans de calquera xeración.

Xornalistas coñecidas, como Rosa Villacastín e María Teresa Campos, axudarán a relatar os seus primeiros romances no eido artístico, como foi a súa relación con Rocío Dúrcal. Falarase sobre o seu amor pola familia e, en concreto, polas súas fillas Lys e Teba, e co relato da súa ex-muller Emy de la Cal reconstruirase a súa historia.

Moi querido entre o público e entre as famosas, ‘Cando me namorei de Juan’ repasará tamén a boa sintonía que o artista mantivo coas variadas compañeiras coas que compartiu escenario ao longo da súa traxectoria artística, como foron Luz Casal, Mari Trini, Paloma San Basilio, Rocío Jurado e Ana Kiro, entre outras moitas.

ler máis

Os espectadores da TVG coñecerán tres novas historias de emprendedores no rural, en 'Cos pés na terra'

10/08/2020

Marta e Chus presentarán esta noite os seus cosméticos ecolóxicos, Lucía e Manuel amosarán os seus cultivos cheos de sabor e Carlos falará das súas vivencias desde a súa forxa

Os espectadores da TVG coñecerán tres novas historias de emprendedores no rural, en 'Cos pés na terra'

Santiago, 10.08.2020.- Os espectadores de ‘Cos pés na terra’ (22.05 h) van coñecer esta semana unha mestura bonita, a do leite que sae das vacas de Marta coas plantas que cultiva Chus e todo para elaborar uns cosméticos ecolóxicos do máis innovador.

O programa da TVG tamén ten hoxe unha cita con Lucía e Manuel, dous rapaces que atoparon no campo o seu futuro cuns cultivos cheos de sabor e cor e galiñas de razas pouco coñecidas en Galicia.

Finalmente, o equipo de ‘Cos pés na terra’ visitará a Carlos, un home con vontade de ferro. O ferro que traballa na súa forxa e moldea golpe a golpe para fabricar ferramentas.

ler máis

'Aquí hai verán' achega hoxe tradición, gastronomía e boa música, desde Ribeira, Arnoia, Sada e A Coruña

09/08/2020

Os espectadores poderán asistir ás celebracións coruñesas do Carme na Barbanza, á Festa Modernista, ás de María Pita e á do popular pemento ourensán

'Aquí hai verán' achega hoxe tradición, gastronomía e boa música, desde Ribeira, Arnoia, Sada e A Coruña

Santiago, 09.08.2020.-  O ‘Aquí hai verán!’ (22.10 h) trasladaralles aos espectadores, unha semana máis, o ambiente que se respira en Galicia durante a época estival. Para comezar, o programa estará no Carme de Ribeira, unha cita que se celebra coas festas do verán deste municipio. Este ano, a tradicional misa tivo lugar ao aire libre no Malecón, e ademais da tradición tamén se puido gozar do directo das Tanxugueiras.

Na seguinte parada, o espazo saboreará boa gastronomía na Festa do Pemento de Arnoia, celebrada dun xeito diferente, pero deixando claro por que os de Arnoia son os mellores pementos da zona. En lugar de xantares populares, durante esa fin de semana foron os locais da localidade os que ofreceron a degustación do produto estrela.

No ‘Aquí hai verán!’ regresarase aos “felices anos 20” grazas á Feira Modernista de Sada, unha festa que contou cun pícnic popular, pasacalles, concertos... e todo isto ataviados coas mellores galas daquela época.

E ademais irase de festa para coñecer o ambiente que se respira na Coruña durante as súas festas de María Pita. Verase de que maneira se celebran estes días festivos na cidade herculina e para isto farase un percorrido polas súas rúas onde se falará coas súas xentes. Este domingo, a partir das 22:00 horas na TVG, deixarase claro unha vez máis, que si, que ‘Aquí hai verán!’ en Galicia.

ler máis

'Bamboleo' ofrecerá esta noite as actuacións da granadina Rosa López e do grupo de trap galego Verto

08/08/2020

O espazo presentado por Xosé Manuel Piñeiro contará tamén coa presenza no escenario do grupo Álkar

'Bamboleo' ofrecerá esta noite as actuacións da granadina Rosa López e do grupo de trap galego Verto

Santiago, 08.08.2020.-  A granadina Rosa López acode esta noite a ‘Bamboleo’ (22.00 h), o programa de entretemento da TVG da noite do sábado. Máis dun millón de discos vendidos avalan a carreira dunha das artistas máis queridas do noso país. A cantante achegará algunhas das súas cancións máis coñecidas, ademais do seu novo sinxelo, ‘Vacío’.

O espazo da TVG presentado por Xosé Manuel Piñeiro ofrecerá tamén as actuacións do grupo Álkar e da banda independente de música pop e trap galego Verto, que ofrece ritmos urbanos e bailables cun abano de letras que van desde a crítica e o humor acedo ao repertorio íntimo de temas. A actualidade recente, como o confinamento pola pandemia, tamén se reflicte nos seus temas, concretamente en ‘Pegadiño a ti’, que interpretarán esta noite no programa.

No escenario tamén estarán Fanny Méndez, interpretando ‘Hello’, de Adele, e Santi Castro, co tema ‘Hoy tengo ganas de ti’, de Alejandro Fernández, para competir ambos os dous no ‘Agora ou nunca’.

Ademais, coma sempre, ‘Bamboleo’ ofrecerá as seccións ‘A ITV do amor’, onde un concursante terá que adiviñar cal é a verdadeira parella dunha persoa a partir de certas probas; ‘A jrileira’, con Christian e Dani competindo no karaoke coa canción ‘Sarandonga’, de Lolita, e ‘Dirtidansi’, coa participación da parella formada por Antoni e Melanie.

ler máis

As mellores competicións de traiñeiras e de motocrós, esta fin de semana na G2

07/08/2020

As embarcacións galegas Ares e Cabo de Cruz compiten o sábado en Hondarribia e, ao día seguinte, en Ondarroa
  
O domingo, en directo, terceira proba do Campionato do Mundo de MXGP desde Letonia
  

As mellores competicións de traiñeiras e de motocrós, esta fin de semana na G2

Santiago, 07.08.2020.-  Nova cita esta fin de semana na G2 coa Liga Eusko Label, tras desenvolverse a semana pasada o Campionato de España de Traiñeiras. A mellores embarcacións de traiñeiras, entre as que se atopan as galegas Ares e Cabo de Cruz, compiten mañá na 33ª edición de Hondarribia (18.00 h) e, o domingo, na 36 Bandeira de Ondarroa (12.00 h). Novena e décima xornada da competición masculina, liderada ata o momento polos remeiros de Bermeo. Media hora antes de ambas citas, ás 17.35 h e ás 11.35 h, a segunda canle da Galega ofrecerá as correspondentes citas da liga feminina Euskotren.  

Amais, o domingo, os amantes das motos terán a oportunidade de seguir en directo, ás 14.00 h e ás 15.00 horas, unha nova proba do Campionato do Mundo de Motocrós desde Letonia.

ler máis

'Inimitables' ten saudade de Andrés do Barro e ofrece este venres unha homenaxe moi especial ao músico

07/08/2020

Eladio y los seres queridos, Faltriqueira, Vizcaíno, Marcos Mella e Débora, Os Peregrinos e Roger de Flor interpretarán algunhas das súas cancións de máis éxito

'Inimitables' ten saudade de Andrés do Barro e ofrece este venres unha homenaxe moi especial ao músico

Santiago, 07.08.2020.- O 'Inimitables' (22.00 h)deste venres é un programa moi especial, que celebra o aniversario da publicación do disco 'Me llamo Andrés Lapique do Barro' e, á vez, dun músico. Neste disco, 3 cancións en galego chegaron por primeira vez ao número 1 nas listas de éxitos españolas: 'O tren', 'Corpiño xeitoso' e 'San Antón'. Ninguén logrou o que logrou Andrés do Barro. O feito de que varias cancións en galego chegaran a número un nas listas tivo un grande impacto na normalización do idioma galego, nesa sociedade española de principios dos 70, que sempre mirara o noso idioma con desconfianza e superioridade. De feito, a música en lingua galega atopou en Andrés o seu primeiro e único éxito de masas.

ler máis

Monia Borges ten a posibilidade de alcanzar o 'Pase de ouro' en 'A liga dos cantantes extraordinarios' esta noite

06/08/2020

No programa de hoxe estrearase unha nova sección, 'A Liga Exhibition Center', en que os concursantes interpretan temas propios fóra de concurso

Monia Borges ten a posibilidade de alcanzar o 'Pase de ouro' en 'A liga dos cantantes extraordinarios' esta noite

Santiago, 06.08.2020.-  A sexta gala de 'A liga dos cantantes extraordinarios' (22.00 h) chega esta noite á TVG nunha momento en que os concursantes comezan a tomar posicións no concurso. A xornada de hoxe estará cargada de sorpresas, e nela non faltarán, como é habitual, a música, o talento e o humor.

No programa de hoxe, Monia Borges (Marbella) ten a posibilidade neste programa de alcanzar o 'Pase de ouro'. Un pasaporte directo para a final que consegue o que triunfe en tres galas. Para iso deberá vencer a David Seara (Finisterre), Yennia (La Fórmula), Fran Castellanos (Saudade), Rita Barreiro (Charleston), Irene Iglesias (Panorama), Marga Vilar e o gañador do duelo de entrada entre Alba Navarro (Satélites) e Kris Somad (Capitol).

Ademais, estréase unha nova sección: 'A Liga Exhibition Center', en que os concursantes interpretan temas propios fóra de concurso. Hoxe é a quenda de Nando Llon (Génesis), que actuará coa súa canción 'Chejou o vran'. A isto hai que unirlle as actuacións do xurado interxeracional. Os representantes da bancada dos Netos, os Monoulious DOP, abren a festa con 'Move os pés' e a voceira dos Avós, Pili Pampín, aceptará un dúo co colaborador César Romero.

En 'A liga dos cantantes extraordinarios' haberá esta noite dúas horas de música en directo, coas mellores voces da verbena galega aderezadas con moito humor.

ler máis

Carolina e Lalo celebran esta noite as súas vodas de prata por todo o alto en 'Casamos!'

05/08/2020

Con dous fillos fantásticos e despois de superar momentos moi duros no seu camiño, a familia e os amigos acompañaranos neste gran día

Carolina e Lalo celebran esta noite as súas vodas de prata por todo o alto en 'Casamos!'

Santiago, 05.08.2020.- A historia de amor de Carolina e Lalo, os protagonistas desta semana do programa ‘Casamos!’ (22.10 h), é unha historia de vida. Coñecéronse moi novos e axiña casaron para poñerse mans á obra coa idea de formar a familia que sempre soñaran.
    
Con dous fillos fantásticos e despois de superar momentos duros no seu camiño, Carolina e Lalo deciden celebrar por todo o alto as súas vodas de prata. A familia e os amigos acompañaranos no seu gran día, unha gran festa do amor, da que serán testemuñas os espectadores da Televisión de Galicia.

ler máis

O programa 'Come a comarca' despide a tempada amosando os segredos gastronómicos de Compostela

04/08/2020

Co seu equipo de cociñeiros preparará vieira curada, xarrete guisado e coulant de torta de Santiago

O programa 'Come a comarca' despide a tempada amosando os segredos gastronómicos de Compostela

Santiago, 04.08.2020.-  No derradeiro programa da temporada, o equipo de cociñeiros de ‘Come a comarca’ (22.05 h) visita Santiago de Compostela para coñecer os segredos da súa gastronomía e aprender a facer o seu menú máis tradicional, composto por vieira curada, xarrete guisado e coulant de torta de Santiago.

Alén Tarrío, do Pampín Bar, será o encargado de guiar os concursantes pola gastronomía da comarca de Santiago. Estes irán ao restaurante Don Quijote, un clásico da cociña tradicional en Santiago, para aprender a cociñar a vieira. En Ames, os  concursantes van coñecer o proxecto Fisterra Bovine World, onde hai razas de vaca de todo o mundo. Para coñecer os trucos do cociñado do xarrete guisado visitarán o restaurante Cierto Blanco, en Teo. E, por último, no restaurante Madia Leva de Santiago de Compostela aprenderán a facer un coulant da sobremesa máis típica e internacional de Galicia: a torta de Santiago.

Unha vez desvelados os segredos das tres receitas, os cinco cociñeiros afeccionados do programa enfrontaranse nun concurso popular, na praza do Obradoiro, aos mellores cociñeiros da comarca facendo eses pratos: Manuel Neiro, do restaurante AC/DC (Santiago de Compostela), María Fernández, do restaurante O Imprevisto (Boqueixón) e Juan Buchet, do Petiscos Gastrobar (Bertamiráns). Coma sempre, un xurado popular será quen puntúe as súas habilidades nos fogóns.

ler máis

'Cos pés na terra' estará hoxe cun pastor de ovellas e con dous veterinarios reconvertidos en queixeiros

03/08/2020

Os espectadores tamén coñecerán a historia dun rapaz que decidiu cultivar e recoller ao grande os produtos máis variados (22.05 h)

'Cos pés na terra' estará hoxe cun pastor de ovellas e con dous veterinarios reconvertidos en queixeiros

Santiago, 03.08.2020.-   Hoxe, en 'Cos pés na terra', toca afundirse nas profundidades da sabedoría queixeira de María e Miguel, dous veterinarios reconvertidos en queixeiros cos que lle imos dar voltas á súa especialidade: o queixo de pasta branda.

Os espectadores do programa tamén teñen unha cita para contar ovellas. Non se trata de durmir, senón de pastorear os centos de ovellas de Luís Miguel, un rapaz de Cospeito que decidiu quedar a traballar na súa vila sempre en boa compaña.

O espazo da TVG tamén estará este luns con Javier, un rapaz que decidiu cultivar e recoller ao grande os produtos máis variados, uns labores que fan do seu día a día un intercambio cultural cos seus traballadores.

ler máis