CRTVG

Buscar

CRTVG Viva

Novas TVG

A actriz Mariam Hernández e os xornalistas Susana López e Emilio Guillín pintarán a mona esta noite no 'Land Rober Tunai Show'

15/04/2021

Volve un dos xogos máis agardados polo público, o ‘Que me estás contando?’, coas palabras máis peculiares, divertidas e argalleiras

A actriz Mariam Hernández e os xornalistas Susana López e Emilio Guillín pintarán a mona esta noite no 'Land Rober Tunai Show'

Santiago, 15.04.2021.-  O programa ‘Land Rober Tunai Show’ (21.55 h) recibe este xoves a visita da actriz Mariam Hernández, que vai poñer a proba a súa intuición en ‘Que gardas aí?’. Para isto contará coa axuda dos xornalistas Susana López e Emilio Guillín, do programa ‘Fun polo Aire’, e do pintamonas Víctor Fábregas.

Por outro lado, os espectadores verán as artimañas dos galegos para conseguir que lles cambien a vacina que lles toca. Volve ademais un dos xogos máis agardados polo público do programa. As palabras máis peculiares, divertidas e argalleiras serán protagonistas no ‘Que me estás contando?’.

ler máis

Unha familia pequena e tranquila intercámbiase durante unha semana en 'A miña familia pola túa' pola diversidade doutra numerosa e moi artística

14/04/2021

Os protagonistas desta nova aventura son Javi, Alba, Nico e Edu, que conviven no denominado ‘piso travesti’ en Candeán, e Zaida e a súa nai, de Arcade

Unha familia pequena e tranquila intercámbiase durante unha semana en 'A miña familia pola túa' pola diversidade doutra numerosa e moi artística

Santiago, 14.04.2021.-    'A miña familia pola túa’ (22.25 h) pon este mércores fronte a fronte unha familia pequena e tranquila, composta por nai e filla, e outra numerosa, con membros moi variados, onde a tranquilidade non existe. Ambas familias deberán intercambiar parte dos seus membros durante unha semana.

A familia de Javi é numerosa, diversa e francamente curiosa. Vive con Alba, a súa irmá, en Candeán e comparte boa parte do seu tempo con Nico e Edu nun ‘piso travesti’, un espazo onde membros de diversas compañías artísticas quedan para crear, vestirse ou preparar as súas actuacións. Porque estes rapaces, ademais de amigos, son drag queens. Aos seus 23 anos, Javi vive cos pais e a súa irmá Alba en Vigo. Esa é a familia de sangue, pero, grazas ás súas expresións artísticas, o rapaz formou outro niño nun piso habitado polos membros dunha compañía teatral. É por iso que sempre está rodeado de xente coa que non comparte apelido, pero ten trato de irmáns. Gústalle a música, o folclore galego e xogar cos roles de xénero a través do seu álter ego de drag pandeireteira. Pola contra, odia o deporte e ás veces defínese como insoportable. Aguantará unha semana cunha muller que podería ser a nai?

Zaida e a súa nai comparten piso en Arcade. A nai rexenta un salón de peiteado e ela agarda a que remate un ERTE para volver traballar. Con 32 anos, esta rapaza considérase unha princesa desas que habitan as películas de debuxos animados. Mantén boa relación co exmozo e a súa parella actual é un fanático do deporte. Por mor dunha enfermidade crónica, Zaida precisa orde e levar unha boa alimentación. Isto último enche as súas redes sociais e grazas a elas pode ser un exemplo a seguir para outras persoas. Chegará sendo Brancaneves e rematará como a bruxa do conto? Que pasará no momento en que se impoñan as novas normas?

ler máis

A Televisión de Galicia, líder de audiencia e líder entre as canles autonómicas

13/04/2021

O Estudo Xeral de Medios, feito público este martes, confirma un incremento do 28,9 % de cota de luns a venres e lidera a FORTA

A TVG lidera todas as faixas de informativos e o entretemento da noite. O ‘Telexornal mediodía’ de 14:30 a 15:00 horas acada o 51 %

As emisoras públicas da Radio Galega, con 284.000 oíntes, acadan o seu máximo histórico nesta primeira onda do EXM do ano

A Televisión de Galicia, líder de audiencia e líder entre as canles autonómicas

Santiago, 13.04.2021.-    A Televisión de Galicia segue a ser líder de audiencias en Galicia, segundo a primeira onda do Estudo Xeral de Medios deste 2021, coñecida este martes, cun liderado tanto de luns a venres, cun 19,2 % de cota, como se se analizan os sete días da semana (18,3 % de luns a domingo).

ler máis

Co novo programa 'Cousas da casa', a TVG organizará os fogares máis desordenados de Galicia

13/04/2021

Co lecer, o humor e a sorpresa como ingredientes clave, neste entretido docushow, a organizadora profesional Vanessa Travieso axudará os protagonistas a se desfaceren de cousas que xa non utilizan e a aproveitaren mellor o espazo.

Esta noite (22:20 h) enfrontarase ao reto de poñer orde no armario dunha instagramer de Vigo, no estudio dunha pintora de Poio e no piso pequenoo dunha nai e unha filla en Santiago.

Co novo programa 'Cousas da casa', a TVG organizará os fogares máis desordenados de Galicia

Santiago, 13.04.2021.-   O estado do noso fogar é un reflexo directo do noso estado emocional e estilo de vida. Por iso, manter o lugar onde vivimos ordenado e en condicións óptimas pode ser o mellor punto de partida para un cambio máis profundo no persoal. Desfacerse de cousas que xa non utilizamos, aproveitar mellor o espazo que temos ao noso arredor e aprender as rutinas que nos permiten ‘limpalo’ do innecesario son os principais obxectivos do novo programa ‘Cousas da Casa’, que a TVG estrea esta noite.

Co entretemento, o humor e a sorpresa como ingredientes clave, esta nova aposta para a noite dos martes é un entretido docushow con pingas de reality, onde a coach Vanessa Travieso, especializada na organización e a orde, entrará nos fogares máis desordenados de Galicia para poñer organización nas súas vidas e súas casas, poñendo orde no caos e reconverténdoos así en lugares e persoas máis ‘sas’ e emocionalmente máis felices.

‘Cousas da Casa’ toma como principal referencia o famoso libro ‘La magia del orden’, de Marie Kondo, considerada pola revista ‘Time’ como unha das 100 persoas máis influentes do mundo, que vendeu máis de 5.000.000 de exemplares desta obra, publicada en máis de 30 países e traducida a máis de 24 linguas. Nela, Kondo afonda no seu método, unha arte que pretende conseguir unha vida máis feliz e harmoniosa a través da reorganización do fogar ou do espazo de traballo.

Por que gardamos con tanto celo obxectos sen valor aparente? Por que acumulamos? É unha calidade innata ou adquirida? Cal é a orixe do apego ás cousas que gardamos? Todas estas preguntas e moitas outras serán respondidas a medida que a experta do programa vaia abrindo as portas dos sentimentos dos protagonistas e as das súas casas, revisando armarios, cuartos, adegas... Seguro que atopará tesouros e marabillas, pero tamén tristeza, lembranzas e ausencias non superadas nas tres historias que cada semana presentará ‘Cousas da Casa’.

Unha vez presentados os protagonistas, a coach chegará á casa dos implicados e fará unha primeira análise da historia, deixando aflorar os seus sentimentos e inquedanzas antes de poñerse mans a obra. A continuación, os protagonistas terán que ir desfacéndose e ir analizando todos os obxectos e as razóns (ou falta de razóns) polas cales foron acumulados. Para iso, contarán cunha ‘desapiadada’ patrulla composta por familiares e amigos, algúns relacionados directamente con algún obxecto a descartar, que farán máis doado o mal trago de guindar lembranzas ao lixo. Chegados ata aquí, abordarase a parte máis didáctica do programa: a reorganización e redecoración da casa segundo as ideas da experta. Neste punto, os espectadores poderán tomar nota de trucos, metodoloxías e rutinas para mellorar a relación coa contorna.

Na estrea de ‘Cousas da Casa’, Vanesa Travieso enfrontarase en Vigo ao enorme reto de poñer orde no armario de Belén Moldes, actriz, modelo ‘curvi’ e instagramer de moda. A presión de Belén para lucir sempre á última nas redes sociais tradúcese nun cuarto cheo de roupa ata os topes. Vanesa descubrirá que o vestidor desta moza é un caos absoluto en que o armario está baleiro e o chan cuberto de prendas. A organizadora profesional terá que empregar todas as súas armas de coach e un extra de paciencia para manexar a irrefreable personalidade de Belén.

Mentres, en Santiago de Compostela, os espectadores coñecerán a Mar Ordiedes. Ela e a súa nai pasaron recentemente dunha casa grande a un piso pequeno onde teñen que compartir o cuarto de baño e precisan axuda para lograr equilibrio entre as cousas da nai, que ocupan todos os mobles, e as da filla, que continúan nun pequeno neceser.

O último reto de hoxe está en Poio, no estudio dunha pintora abstracta moi creativa, pero tamén caótica. Lúa Gándara precisa facer do seu obradoiro un espazo agradable e inspirador que sexa ademais menos atractivo para os bechos.

ler máis

A G2 estrea 'Memorias rotas', documental sobre a tortura e execución do Batallón Galicia na Guerra Civil española

13/04/2021

Os nenos e nenas que foron testemuñas daqueles sucesos, nunca xulgados, contan o doloroso destino que padeceron o comandante Moreno e os seus compañeiros

A G2 estrea 'Memorias rotas', documental sobre a tortura e execución do Batallón Galicia na Guerra Civil española

Santiago, 13.04.2021.-  A Galega estrea esta noite na G2 o documental ‘Memorias rotas’ (23.30 h). Seguindo as pegadas que amosa o romance ‘A balada do comandante Moreno’, a través de testemuñas directas e indirectas, o documental conta a historia dunha parte dos membros do Batallón Galicia que, tras defender a sangue e lume os seus ideais de liberdade na fronte de Asturias, terminaron torturados e executados no alto do Acevo por un grupo de falanxistas e gardas civís, un acto que uniría para sempre os habitantes da zona cos seus tráxicos protagonistas.

‘Memorias rotas’, dirixido por Manane Rodríguez, é unha das poucas crónicas audiovisuais existentes referidas á Guerra Civil española en Galicia. O documental tamén deixa constancia de que os crimes do Acevo nunca foron xulgados.

En outubro de 1937, Asturias cae en mans do exército franquista. Cercados, os combatentes republicanos intentan fuxir por mar. Un grupo de loitadores antifascistas galegos, pertencentes ao Batallón Galicia e liderados polo anarquista José Moreno Torres, fracasado o seu intento de fuxida, diríxese a Galicia perdéndose o seu rastro nos montes do Acevo, na fronteira entre Asturias e Galicia. Nin os seus familiares nin os seus compañeiros souberon nunca cal foi o destino do grupo. Con todo, e malia a represión instaurada durante o franquismo, nas localidades próximas ao Acevo comezou a circular un romance popular que daba conta dos últimos momentos deste grupo de homes.

Os nenos e nenas que foron testemuñas daqueles sucesos contan en ‘Memorias rotas’ o doloroso destino que sufriron o comandante Moreno e os seus compañeiros.

ler máis

As producións 'Entre pastores e lobos' e 'A poeta analfabeta', apoiadas pola CRTVG, galardoadas nos Premios MICE

12/04/2021

A primeira recibiu o Premio do Público, mentres que a cinta sobre a poeta Luz Fandiño recolleu o primeiro Premio CREA

O palmarés completo da mostra pode consultarse AQUÍ

As producións 'Entre pastores e lobos' e 'A poeta analfabeta', apoiadas pola CRTVG, galardoadas nos Premios MICE

Santiago de Compostela, 12.04.2021.- A Mostra Internacional de Cinema Etnográfico  Museo do Pobo Galego (MICE) pechou este domingo a súa 16ª edición coa resolución do xurado, en que foron premiadas dúas obras participadas pola CRTVG.

ler máis

Dous emigrantes retornados ao Carballiño porán a proba a capacidade e a paciencia do equipo do 'Galicia Bonita'

12/04/2021

Ramona e Jose son propietarios dun mesón, sen arranxar desde hai 40 anos, nos arrabaldes da vila ourensá (22.30 h)

Dous emigrantes retornados ao Carballiño porán a proba a capacidade e a paciencia do equipo do 'Galicia Bonita'

Santiago, 12.04.2021.-   Ramona e Jose, dous emigrantes retornados de Suíza, porán a proba a paciencia da arquitecta Rosa Facal e de todo o equipo de ‘Galicia Bonita’, programa do que a TVG ofrece este luns unha nova edición.

Os propietarios dun mesón, sen arranxar desde hai uns 40 anos, nos arrabaldes do Carballiño, porán en dúbida a capacidade do equipo de reformas liderado pola arquitecta e dos profesionais cos que contará para levar a cabo a reforma.

ler máis

Damián e Sofía intentan recuperar o control do clan en 'Método criminal', mentres fan fronte a un novo imprevisto

11/04/2021

O líder da mafia colombiana, abraiado con Sofía, poralles unhas condicións difíciles de cumprir

Damián e Sofía intentan recuperar o control do clan en 'Método criminal', mentres fan fronte a un novo imprevisto

Santiago, 11.04.2021.-  Despois de que Sofía expulsase a Alfredo e os seus homes da produtora a golpe de metralladora, o equipo de ‘Método Criminal’ (22.45 h) ten que facerlle fronte a un novo imprevisto. Os veciños da zona, alertados polos disparos que escoitaron, deron aviso á Garda Civil. Por este motivo, o sarxento Paulo Santiso comezou unha investigación para esclarecer o acontecido. Sen tempo que perder Sofía, Susana, Adrián, Cecilia e Luís preparan unha coartada para desviar a atención sobre eles.

Mentres tanto, Sofía e Damián intentan recuperar o control do clan, aínda que non teñen moito tempo para facelo. Alfredo, o líder da mafia colombiana, quedou abraiado coa forma en que Sofía lle fixo fronte e quere darlle ao clan dos Canosa unha nova oportunidade. Sofía e Damián non teñen máis remedio que acudir á reunión con Alfredo, aínda que as súas condicións non son doadas de cumprir.

Tras o secuestro de Tuco e de coñecer a verdade da relación entre Luís e Damián, Gaila está moi decepcionada co seu pai. Consciente de que pode perder a súa filla, Luís fará todo o posible por emendar o seu erro, aínda que o resultado non vai ser o que el agarda.

ler máis

Georgina, Xil Ríos e a orquestra La Ocaband presentan en 'Bamboleo' as súas novas propostas musicais

10/04/2021

O espazo converterase en toda unha festa tamén grazas ás intervencións dos seus colaboradores habituais: Tamara Pérez, Damián Cortés, Claudio Pan e Javi Varela

Georgina, Xil Ríos e a orquestra La Ocaband presentan en 'Bamboleo' as súas novas propostas musicais

Santiago, 10.04.2021.- A festa do ‘Bamboleo’ (22.00 h) acode esta noite á súa cita semanal. Xosé Manuel Piñeiro contará coa presenza de dous artistas consagrados: Georgina e Xil Ríos, que presentarán as súas novas propostas musicais. Completarán o festexo os colaboradores habituais do programa: Tamara Pérez, Damián Cortés, Claudio Pan e Javi Varela.

ler máis

As propostas musicais de éxito de Daniel Minimalia, Rosa Cedrón, Chenoa e Fetén Fetén, esta noite en 'Luar'

09/04/2021

En ‘O mellor DECADA casa’, Manuel Manquiña e María Mera poñen a proba as súas calidades vocais con cancións de éxito das décadas dos 60 e 00, respectivamente

As propostas musicais de éxito de Daniel Minimalia, Rosa Cedrón, Chenoa e Fetén Fetén, esta noite en 'Luar'

Santiago, 09.04.2021.-  ‘Luar’ (21.55 h) trae un venres máis un variado elenco de artistas de altura, hoxe liderado polos galegos Daniel Minimalia e Rosa Cedrón, pola tamén cantante Chenoa e polos coñecidos participantes de ‘O mellor DECADA casa’. O concurso telefónico parte esta noite cun bote de 5.500 euros.

O músico autodidacta Daniel Minimalia, cuxa música é protagonista esta primavera das cortinas de continuidade da TVG, interpretará a dúo con Rosa Cedrón ‘Olas del sur’, tema co que gañou en 2015 o seu primeiro Hollywood Music In Media Awards na categoría de mellor canción. O guitarrista e compositor ourensán, galardoado hai uns meses co Grammy Latino ao mellor disco instrumental co seu álbum ‘Terra’, acode a ‘Luar’ afianzado como un dos referentes musicais do país e tras gañar o seu segundo Hollywood Music In Media.

Chenoa regresa a ‘Luar’ cando fai vinte anos de traxectoria musical desde que saltara á fama en 2001, ao seu paso pola primeira edición de Operación Triunfo. Unha carreira en que a recoñecida cantante leva un millón de discos vendidos e se converteu nunha das voces máis populares de España e América Latina. A artista ofrecerá esta noite algúns dos seus éxitos máis recentes.

O grupo burgalés Fetén Fetén, formado por Jorge Arribas ao acordeón e Diego Galaz ao violín, sorprenderá tamén a audiencia da Galega co seu dominio instrumental e os seus ritmos.

Continúa esta edición a música galega coas propostas folk de Charamuscas, agrupación musical integrada na súa maioría por traballadores da Once. O grupo compostelán amosará o tema ‘A feira’, que recolle no seu primeiro álbum ‘Brincan no corazón’. A orquestra Mistura Son, banda cuxas artistas irmandan a música galega e a cubana, traerá o mellor dos seus sons. E completan as propostas de hoxe, os integrantes da agrupación A Rexionalista.

O concurso ‘O mellor DECADA casa’ porá en competición os actores Manuel Manquiña e María Mera, que cantarán o éxito dos anos 60 ‘A miña gran noite’ e ‘A maionesa’, da década dos 00, respectivamente. Os artistas Sergio Pazos, Luís Iglesia, Teté Delgado, Lucía Veiga, Isabel Blanco e o exdeportista Fernando Romay forman parte tamén do elenco de altura de participantes neste certame solidario.

Por outra parte, Xosé Ramón Gayoso, Patricia F. Santana e Rocío Rodríguez Padín darán paso a unha nova edición do certame de novos talentos ‘Recantos’, en que competirán Belehm, en representación de Lugo Sur, e Jioa, de Terras de Lugo. E, por último, Paco e Pepe achegarán unha semana máis unha boa dose do seu mellor humor.

ler máis