CRTVG

Buscar

CRTVG Viva

Novas TVG

Nace unha nova estrela e xorde o amor en 'Pratos Combinados', onde fai un cameo Manuel Manquiña

27/05/2020

A TVG ofrece esta noite unha nova maratón de catro capítulos da primeira telecomedia galega

Nace unha nova estrela e xorde o amor en 'Pratos Combinados', onde fai un cameo Manuel Manquiña

Santiago, 27.05.2020.-   O Paspallás, pintoresco personaxe do famoso Bar Suízo interpretado polo actor galego Serxio Pazos, e o tío Antón (Antonio Durán ‘Morris’) van ser os protagonistas destacados da primeira entrega deste mércores de ‘Pratos Combinados’ (22.25 h) Neste capítulo, que leva por título ‘Escola de sedutores’, o entrañable e ocorrente Paspallás, que tolea por unha rapaza, vaille pedir consellos ao tío Antón para que lle revele algúns dos seus segredos sobre como conquistar unha muller. Antón dáse por moi entendido na materia, pero un cúmulo de despropósitos vainos levar a unha situación ridícula.

O maratón desta noite continuará coa emisión de ‘Unha nova estrela’, onde o local familiar ten que pechar como consecuencia dunha inspección municipal. Con todo, o sempre ocorrente tío Antón vai saber converter esta desgraza nunha oportunidade para facer un bo negocio. Un produtor televisivo, interpretado polo coñecido actor Manuel Manquiña, alugará o local para rodar un anuncio, feito do que Rosalía sacará bo partido ao revelarse como unha auténtica estrela do espectáculo.

De seguido, en ‘Ola, Melanie!’, o Bar Suízo e a familia Pereira seguirán producindo os sorrisos dos espectadores. Miguel regresa dos Estados Unidos, onde realizou un curso de inglés, e chega acompañado dunha rapaza americana que coñeceu durante a súa estancia no estranxeiro. O contraste de costumes dará lugar a algunhas situacións cómicas, ao tempo que  Miguel descobre xunto a Melanie o amor.

A avoa Carme é a protagonista de ‘Adiviña quen vén cear’, a última entrega desta noite. A nai de Miro Pereira recibe a visita de Valentín, un antigo amor da mocidade, e con el veñen novas ilusións. Así que Carme decide preparar para el unha cea íntima no Bar Suízo e para poder quedar soa no bar terá que recorrer a algunhas pequenas mentiras que complicarán a situación ata límites insospeitados. Neste episodio, o artista Xulio Lago interpretará o namorado Valentín.

ler máis

Na reunión desta semana no 'Larpeiros Social Club', poranse en valor os produtos da horta

26/05/2020

Contarán coa presenza dun peixeiro que fará unha exhibición da súa arte preparando un mero, mentres que Merchi fará un pastel de figos asados e Adrián irá ata Lugo para facerse cunha fabas frescas de Lourenzá (22.25 h)

Na reunión desta semana no 'Larpeiros Social Club', poranse en valor os produtos da horta

Santiago, 26.05.2020.-    Hai hortalizas de froito, como os cabazos ou os pementos, e tamén de folla, como as espinacas ou os grelos. Non se deben esquecer as soterrañas, como as patacas ou allo porros, e os legumes, como as fabas...Hai zonas enteiras de Galicia famosas polas súas hortas, como o Salnés, Betanzos, as Mariñas ou as veigas da Ulla.

Hoxe, no ‘Larpeiros Social Club’, porán en valor todos estes productos e cociñarán xunto con Kike e mais Eloy un par de pratos con sabor a horta. Ademais, contarán coa visita dun peixeiro como quedan poucos, que fará unha exhibición da súa arte preparando un mero que fará as delicias de todos os ‘Larpeiros’.

Ademais, para que non falte detalle, Merchi preparará un deses pasteis que a fixeron famosa, con figos asados, requeixo e crema pasteleira, entre outras delicias. Pola súa parte, Adrián viaxará ata Lugo para levar ao club unhas fabas frescas de Lourenzá. Con Mari Carmen, aprenderá todos os segredos das nosas fabas máis famosas. E Leni irá ata A Estrada para coñecer a horta ecolóxica de Óscar, que ten unhas verduras de primeira. E, por suposto, na reunión desta semana non faltarán a música, as risas e a troula.

ler máis

'Cos pés na terra' compartirá unha xornada de traballo cun criador de galiñas en liberdade e cun produtor de arandos

25/05/2020

Ademais, recollerá diferentes tipos de follas para poñer en práctica unha técnica novidosa: o ‘ecoprint’ (22.30 h)

'Cos pés na terra' compartirá unha xornada de traballo cun criador de galiñas en liberdade e cun produtor de arandos

Santiago, 25.05.2020.-  Que foi antes: o ovo, a galiña ou a máquina clasificadora? Se alguén ten hoxe respostas no programa ‘Cos Pés Na Terra’, é Alberto, que coida a diario dunhas galiñas que viven en liberdade e que llo agradecen con resultados ben saborosos.

O programa desta semana tamén ten unha cita con Nuria, Uxía e Antía, coas que recollerá diferentes tipos de follas para poñer en práctica unha técnica novidosa: o ‘ecoprint’.

Ademais, os espectadores coñecerán a Marcos, un produtor de arandos en plena recolleita, que vai demostrar, nunha xornada de traballo, que non é necesario ser da aldea para ser de campo.

ler máis

Amplo dispositivo de busca para atopar a Raquel, esta noite nun novo capítulo de 'Serramoura'

24/05/2020

Teresa negocia con César a súa entrega, pero esíxelle que antes acabe con Evaristo Fiúza (22.35 h)

Amplo dispositivo de busca para atopar a Raquel, esta noite nun novo capítulo de 'Serramoura'

Santiago, 24.05.2020.-   Despois da fuxida de César do sanatorio, todos os efectivos do cuartel de ‘Serramoura’ son conscientes de que a vida de Raquel está en xogo, polo que Tomás non dubida e organizar un dispositivo de busca sen escatimar recursos.

No capítulo desta noite, tamén os veciños da vila se botan ao monte para atopar a Raquel, algo que Roi e Marga intentan evitar por todos os medios. Para evitar interferencias no seu traballo, os sarxentos non dubidan en reter no cuartel a Evarsito Fiúza, algo co que non estará moi conforme.

Mentres tanto, Teresa negocia con César a entrega de Raquel, pero introduce un novo punto no acordo: se César quere a Raquel, antes ten que acabar con Evaristo Fiúza.

ler máis

A G2 ofrece este domingo unha reportaxe sobre o 20 aniversario do título de Liga conseguido polo Deportivo da Coruña

23/05/2020

A través do testemuño dos integrantes daquel equipo histórico, o xornalista Alfonso Hermida reconstrúe as datas máxicas do 19 e 20 de maio de 2000, instaladas para sempre no olimpo deportivista

A G2 ofrece este domingo unha reportaxe sobre o 20 aniversario do título de Liga conseguido polo Deportivo da Coruña

Santiago, 23.05.2020.-     Baixo o título ‘Cando fomos os mellores’, a segunda canle da Galega ofrece este domingo á tarde (19.35 h) unha reportaxe coas voces dos integrantes do histórico equipo que logrou hai xusto 20 anos o primeiro título de Liga para o Deportivo da Coruña.

A través do testemuño do presidente da entidade naquel momento, Augusto César Lendoiro, do adestrador Javier Irureta e dos principais xogadores que contribuíron a ese éxito, como Mauro Silva, Fran, Donato, Manuel Pablo e Turu Flores, o xornalista Alfonso Hermida reconstrúe as datas máxicas do 19 e 20 de maio de 2000, instaladas para sempre no olimpo deportivista e na retina dos afeccionados.

A reportaxe inclúe tamén as mellores imaxes dunha retransmisión da TVG que se estendeu máis de nove horas durante a xornada en que o equipo coruñés derrotou o Espanyol en Riazor, que continuou co seguimento do festexo e que tivo o seu punto final na praza de María Pita.


ler máis

O grupo Café Quijano visita "Bamboleo" para presentar o seu novo disco

23/05/2020

Los Satélites, unha das orquestras galegas máis lonxevas, e a cantante cambadesa Pauliña tamén están convidados á velada musical deste sábado

O grupo Café Quijano visita "Bamboleo" para presentar o seu novo disco

Santiago, 23.05.2020.-    O grupo Café Quijano presenta este sábado en “Bamboleo” (21.55 h.) o seu novo sinxelo, “Mina”. Os irmáns leoneses Manuel, Óscar e Raúl interpretarán temas do seu disco : “La vida no es la, la, la”, un traballo que se centra no pop.

Los Satélites da Coruña, unha das orquestras galegas máis lonxevas, chegará con ritmos trepidantes e, no “Agora ou Nunca”, dúas voces realmente excepcionais, as de Julia Rodrigues e Marta Sanmartín, enfrontaranse no escenario, a primeira cantando “Miedo”, de M Clan, e a segunda facendo o propio con “There´s nothing holding me back”, de Shawn Mendes.

No apartado de música galega, a cantante cambadesa Pauliña presentará no programa da TVG “De-xeneración”, un disco en que aglutina os ritmos que a marcaron desde nena.

Unha parella de nenos portugueses, de Vilanova de Famaliçao, Rafael e Helena, van ser esta semana os protagonistas do “Dirtidansi”, bailando chachachá, mentres que Santi e Alicia formarán a parella de baile profesional da noite, interpretando desta volta o estilo slow fox.
    
Ademais, Lito de Arzúa e Víctor Bacoy serán protagonistas dun singular combate de chistes cun título que xa de por si dá que pensar: “De vacacións coa sogra e co cuñado”. E, para diversión máxima do público e da audiencia, chegarán “A ITV do amor”, unha das sección estrela do programa, e “A Jrileira”, en que Pilar e Marisol se enfrontarán ao karaoke cantando “Cuando me enamoro”, de Enrique Iglesias e Juan Luis Guerra.

ler máis

Xabier Díaz & Adufeiras de Salitre presentan novo disco en 'Luar', xunto á música de Cantigas e Agarimos e Fátima Pego

22/05/2020

Tamén subirán ao escenario do programa Tania Veiras, a orquestra Grupo Alma Latina, José Manuel Túñez e os humoristas Brandariz e Veiga

Xabier Díaz & Adufeiras de Salitre presentan novo disco en 'Luar', xunto á música de Cantigas e Agarimos e Fátima Pego

Santiago, 22.05.2020.-  ‘Luar’ (21.55 h) trae esta noite as novas propostas musicais de Xabier Díaz & Adufeiras de Salitre, que acaba de editar o disco ‘As catedrais silenciadas’, un proxecto que fala da Galicia baleira e de todo o patrimonio material e inmaterial en vías de desaparición. Esta noite presentarán unha delicia de canción ‘Unha, dúas, tres e catro’ e  ‘Illa de Sal’, unha xota que ten a súa orixe nun tema recollido en Corcubión polo etnomusicólogo Alan Lomax.

A brionesa Fátima Pego, cantante da orquestra Panorama  e tamén coñecida pola audiencia da Galega pola súa faceta como reporteira no programa ‘Fun polo Aire’,  interpretará o tema ‘Vivir’ e compartirá escenario a dúo con Tania Veiras, tamén moi versátil como cantante e reporteira na TVG.

A música galega seguirá sendo a gran protagonista de ‘Luar’ coas actuacións da agrupación folclórica Cantigas e Agarimos, da orquestra Grupo Alma Latina e do cantante José Manuel Túñez, que interpretará unha rancheira.

ler máis

Lito da Panorama e Isabel Blanco darán o cate nun 'Land Rober Tunai Show' en que os espectadores verán como acabou o floreiro de Gayoso

21/05/2020

Ademais, o programa (22.10 h) contará cunha nova entrega do ‘Quen vén sendo?’ e de ‘As mañás de Marilú’, a onde regresa o alcalde de Pazos na recta final da Fase 1

Lito da Panorama e Isabel Blanco darán o cate nun 'Land Rober Tunai Show' en que os espectadores verán como acabou o floreiro de Gayoso

Santiago, 21.05.2020.-    A comedia a domicilio que cada xoves ofrece o ‘Land Rober Tunai Show’  suma e segue e faino coa visita dun dos grandes da verbena galega: Lito, da Panorama. Con el estará pintando a mona a actriz e presentadora galega Isabel Blanco. Ambos os dous van mover o esqueleto coma nunca, nun show que vai dar que ver!

ler máis

Na maratón de 'Pratos Combinados' desta semana aparece, por primeira vez na serie, o querido Olveira 'Pico'

20/05/2020

A preparación de oposicións por parte de Rosalía e a ilusión do seu irmán Migueliño por ir estudar aos Estados Unidos, entre as tramas desta noite

Na maratón de 'Pratos Combinados' desta semana aparece, por primeira vez na serie, o querido Olveira 'Pico'

Santiago, 20.05.2020.-  Televisión de Galicia emite, de novo, este mércores catro divertidas entregas de ‘Pratos Combinados’ (22.25 h), a primeira comedia de situación galega, que segue acadando con éxito o respaldo da audiencia. As aventuras desta noite comezan co episodio titulado ‘Tódolos homes son distintos’, en que Rosalía prepara a súa oposición coa esperanza de se converter en profesora de instituto. Un antigo profesor -o coñecido catedrático Ramón Parga- promételle axuda. Trátase dun home abraiante que ademais sabe entender o papel da muller actual. Pero nada é como parece...

No segundo capítulo, ‘Cóctel’, entra en acción un personaxe que traerá moitas sorpresas. Trátase de Matías, interpretado polo querido Xosé M. Olveira ‘Pico’, un home encantador que aparece polo bar buscando unha antiga namorada. Ademais, como é todo un experto en preparar cócteles, Antón e Miro deciden aprender as súas boas artes de combinar. Pola súa parte, a filla Rosalía móstrase nerviosa pois está a piques de presentarse a unha oposición, pero as sorpresas que traerá Matías non serán para menos.

A continuación, en ‘A recomendación’, a filla maior da familia Pereira está vivindo uns días de gran intranquilidade debido ás súas oposicións, e o seu pai Miro, que é dos que aínda confían nas recomendacións, comeza a matinar algúns vellos métodos para superar os exames. Confiándose ao seu cuñado Antón, pídelle axuda para preparar unha estratexia que el cre infalible e na que intervirán lacóns, empanadas e viños do país.

A maratón desta semana despídese coa emisión de ‘América, América’, episodio en que o protagonista será Miguel, o pequeno do Bar Suízo. O fillo de Miro e Balbina séntese moi ilusionado polo intercambio que prepara o seu instituto cun colexio dos Estados Unidos pero o certo é que as posibilidades de viaxar ao outro lado do océano son escasas debido ás dificultades económicas da familia Pereira. O tío Antón, coma sempre, intenta aportar as solucións que ten ao seu alcance, pero todos os enredos que pon en marcha non fan máis que empeorar as cousas.

ler máis

Os 'Larpeiros' xúntanse este martes no 'Social Club' coa intención de buscar a mellor receita do mundo

19/05/2020

Nos ensaios, prepararán uns chocos da ría con patacas, ha crema de tirabeques con vieiras e unha torta de coco e piña

Os 'Larpeiros' xúntanse este martes no 'Social Club' coa intención de buscar a mellor receita do mundo

Santiago, 19.05.2020.-   No ‘Larpeiros Social Club’ (22.25 h) buscarán hoxe a mellor receita do mundo. Aínda que con estes cociñeiros ao carón das potas, todas poderían selo. Benigno será o máis madrugador de todos. Polo visto, recibiu a chamada dun dos moitos amigos que ten nos mercados e comprou uns tirabeques marabillosos. Con eles, non tardará en chegar a inspiración e a idea de xuntalos cun chocos da ría e unas patacas, emocionará a todos. Podería ser estaunha das mellores receitas do mundo? Haberá que velo...

De conseguir os mellores chocos encargarase Adrián. Por suposto, ir por eles a Redondela, unha visita case obrigada. Os que medran nas augas da enseada de San Simón, na ría de Vigo, son os que máis lles gustan aos ‘Larpeiros’.

E como dous quilos de tirabeques dan para moito, Merchi tirará de arte e sabedoría para argallar unha crema de tirabeques con vieiras. E para acompañar o café e facer soñar os máis lambóns do club, Carla Rivadulla presentará unha desas receitas que merecen aplausos e reverencias a partes iguais: unha torta de coco e piña. Tampouco faltarán a música, as risas e a boa conversa. Por iso cada día o ‘Larpeiros Social Club’ ten máis asociados.

ler máis