CRTVG

Buscar

CRTVG Viva

Novas RG

A actualidade e o entretemento tamén acompañarán os oíntes da Radio Galega esta Semana Santa

08/04/2020

Daralle prioridade á información de última hora e manterá os magazines e espazos deportivos habituais da emisora pública

A actualidade e o entretemento tamén acompañarán os oíntes da Radio Galega esta Semana Santa

Santiago, 08.04.2020.-  A Radio Galega desenvolverá unha programación de Semana Santa ao fío da actualidade e combinada con variadas propostas de entretemento. Dada a extraordinaria situación actual, os boletíns e os espazos informativos estarán ao tanto de calquera noticia ou comunicado relativo a crise sociosanitaria provocada polo covid-19. Amais, a emisora pública manterá os magazines e espazos deportivos habituais tamén durante a fin de semana.  

Por iso, o Xoves e Venres Santo emitirase o 'Galicia por diante' con normalidade. Entre as 06.00 e as 14.00 horas, estarán Xosé Valiñas e Kiko Novoa á fronte dos micrófonos do programa, co cometido de informar e entreter os oíntes da Radio Galega. Coma sempre, poderase gozar coa diversión que se desata na súa sección ‘A Bola Extra’.

Pola súa parte, 'A crónica' estenderá a súa duración a hora e media, desde as 14.00 horas; mentres que o magazine 'A tarde' estará cos seus seguidores no horario habitual.

Informativos especiais na fin de semana

A fin de semana contará cun informativo especial, de 08:00 a 15:00 horas, o sábado e o domingo, a cargo de Luis Ojea. A continuación, seguirá un magazine tamén especial, dirixido por Victoria Rodríguez, de dúas horas de duración. Os afeccionados aos deportes estarán de parabéns xa que tanto o venres coma o sábado e o domingo o 'Galicia en goles' ofrecerá as últimas novas do mundo deportivo.

E o veterano programa das madrugadas da Radio Galega 'Pensando en ti' acudirá puntual á súa cita os días festivos para intercambiar experiencias e testemuños cos seguidores máis noctámbulos da emisora pública.

ler máis

A Radio Galega narrará esta fin de semana o Torneo de Fútbol Virtual LFM, que se emite en 'streaming' por Twitch

02/04/2020
A Radio Galega narrará esta fin de semana o Torneo de Fútbol Virtual LFM, que se emite en 'streaming' por Twitch

Santiago, 02.04.2020.-    Adaptándose ás circunstancias e fiel ao seu compromiso de apoiar o deporte en todas as súas facetas, a Radio Galega segue a falar do deporte rei nestes días en que están suspendidas todas as competicións de fútbol. O programa Galicia en goles da Radio Galega narrará entre o venres e o domingo os partidos do torneo virtual organizado polo portal LFM Fútbol de Narón.

Este portal, que ofrece habitualmente resumos de Preferente Norte, Primeira e Segunda Autonómica galega, organizou un torneo concibido en principio para os clubs de Ferrolterra, o I Torneo Virtual LFM FIFA20, pero que desbordou todas as previsións de participación e ampliou fronteiras coa participación de equipos de toda Galicia e con preto de 90 clubs confirmados. Deste xeito, un futbolista de cada equipo collerá o mando da consola e xogará polo seu club. Poderase seguir en liña, pola canle de Twitch de retransmisión de videoxogos en directo, e tamén a través da Radio Galega.

Baixo a dirección de Xoán Galán, de venres a domingo, Raúl Villares e Roberto Carlos Carballo narrarán os partidos que coincidan coa emisión do ‘Galicia en Goles’, para o que contarán coa análise dos especialistas Peli Cantoná, Alfonso Núñez, Víctor López e Gonzalo Alonso, colaboradores da RG.

Ademais da práctica totalidade dos clubs de Ferrolterra, incluído o Rácing de Ferrol, o torneo contará con, entre outros moitos, o Coruxo C.F., que representará tamén a 2ª División B, mentres que C.D. Choco, Silva S.D., Ourense C.F., U.D. Ourense, C.D. As Pontes, Bergantiños F.C., C.D. Pontellas, U.D. Paiosaco, RCD Fabril, CSD Arzúa, Rápido de Bouzas e U.D. Somozas farano pola Terceira galega.

ler máis

A Radio Galega reforza a programación informativa e de directos para cubrir a actualidade do coronavirus en todo o país

20/03/2020

Radio Galega Música e Son Galicia Radio continúan coas súas emisións no horario habitual e Radio Picariña ofrece contidos musicais para os máis pequenos da casa, no portal www.crtvg.gal/rg

Todas as redes sociais, web, Whatsapp e as canles convencionais da CRTVG seguen a disposición das campañas #Coidémonos e #EstamosXuntosNisto para promover as recomendacións das autoridades sanitarias

A Radio Galega reforza a programación informativa e de directos para cubrir a actualidade do coronavirus en todo o país

Santiago, 20.03.2020.-   A Radio Galega amplía o horario e cobertura dos seus servizos informativos para atender a demanda informativa en Galicia nunha situación de excepción como a que vive o país. Grazas á súa capacidade de retransmisión en directo, a emisora pública está a adaptar a súa programación e cada día pon o foco na información sobre o coronavirus.

Este sábado e domingo, a Radio Galega ofrecerá un especial coronavirus de 08.00 a 14.00 h, seguido dun informativo de A crónica de 14.00 a 15.00 h. Pola tarde, emitirase en directo Galicia en goles, coas novidades do deporte galego no marco desta crise, de 15.00 a 20.00 h.

Ademais, durante estes días, o Galicia por diante está a adquirir un ton informativo ata as 14.00 h, con todas as novidades, as comparecencias e entrevistas arredor desta emerxencia sanitaria. O informativo A crónica amplía o seu horario e abrangue de 14.00 a 15.30, con Silvia Pereira. A tarde, ao igual que o Galicia por diante, inclúe contidos informativos e formativos sobre o coronavirus.

ler máis

Profesionais destacadas son protagonistas dos contidos especiais da Radio Galega para conmemorar o Día da Muller

05/03/2020

O domingo 8 de marzo, os espazos ‘Galicia por Diante’, ‘Diario Cultural’ e ‘Ferrado e Medio’ ofrecerán entrevistas e programas monográficos sobre a muller
  

Profesionais destacadas son protagonistas dos contidos especiais da Radio Galega para conmemorar o Día da Muller

Santiago, 05.03.2020.- A Radio Galega ofrecerá este domingo contidos específicos para celebrar o Día Internacional da Muller ao longo da súa programación. Así, o magazine matinal ‘Galicia por Diante’ achegará distintas perspectivas de muller, a través dunha serie de entrevistas a profesionais que destacan nas súas profesións nos distintos sectores.

Polos micros do ‘Galicia por Diante’ pasará a directora da Misión Biolóxica do Centro de Investigacións Agrarias do CSIC en Pontevedra, Carmen Martínez; a escritora Inma López Silva, a actriz Belén Constenla, a presentadora de ‘O Tempo’ na TVG Noelia Rodríguez; a presidenta da asociación Xiara de empregadas do fogar, Carmela Casal, e a cociñeira e propietaria de A Tafona, Lucía Freitas. O espazo incluirá hoxe tamén o testemuño de mulleres que superaron obstáculos por cuestión de xénero.

No tempo do ‘Diario Cultural’ falarase coa coruñesa África López Souto sobre o seu libro ‘Mulleres que (nos) dan que pensar’, que acaba de publicar a editorial Galaxia. Nesta obra, a autora rescata a historia de mulleres que foron agochadas, esquecidas e banalizadas, como é o caso da oceanógrafa Ángeles Alvariño; da primeira almiranta, Sabela Barreto ou da primeira farmacéutica galega, Manuela Barreiro, as primeiras universitarias.

'Ferrado e Medio’, o espazo máis madrugador do domingo, cuxos contidos están especializados no mundo do agro, ofrecerá unha edición monográfica sobre a muller, gravada na Granxa Maruxa de Monterroso, que contará coa participación da Granxa Maruxa, Premio Alimentos de España 2011 na categoría de Muller Emprendedora, e da cooperativa Milhulloa, Premio de Excelencia para Mulleres Rurais do Ministerio de Agricultura e integrantes do festival Agrogay.

Programación especial durante toda a semana

Amais, a Radio Galega está ofrecendo durante toda a semana, nos distintos espazos informativos e de entretemento, contidos e entrevistas especiais en conmemoración desta efeméride.

Neste senso, cómpre salientar que, no ‘Galicia por Diante’ do venres desenvolverase un especial da sección ‘O Miolo’ (13.30 h) polo Día da Muller, en que intervirán: Rebeca Lago, investigadora de I+D+i de ARVI; Zulema González, primeira colexiada galega internacional, e Chelo Loureiro, produtora de ‘Homomaquia’, candidata á mellor curtametraxe de animación nos Premios Mestre Mateo.

E na véspera do Día Internacional da Muller, o espazo deportivo ‘Galicia en Goles’ realizarase desde a cidade do Lérez, con motivo da celebración do Tour Universo Mujer Pontevedra, toda unha gran festa do deporte feminino.

ler máis

A CRTVG propón un debate a seis convidando as forzas políticas de acordo coa normativa electoral

05/03/2020

Terá lugar o 23 de marzo ás 21.30 h e retransmitirase pola TVG, a Radio Galega e en soportes dixitais, e será accesible en lingua de signos

A CRTVG propón un debate a seis convidando as forzas políticas de acordo coa normativa electoral

Santiago, 04.03.2020.- A CRTVG convida ao Debate Electoral do vindeiro luns 23 de marzo as seis formacións políticas que legalmente deben de estar representadas segundo os parámetros que marcan a LOREG e as instrucións da Xunta Electoral Central.

Os candidatos e candidatas do Partido Popular de Galicia (PPdeG), Partido Socialista de Galicia (PSdeG), Bloque Nacionalista Galego (BNG), Galicia en Común (GEC), Ciudadanos (C’s) e Vox nestes comicios poderán confrontar nos medios públicos as súas posicións sobre temas de máximo interese para a cidadanía. Os líderes políticos debaterán sobre a situación económica xeral, a evolución do emprego nos sectores máis relevantes da Comunidade e as políticas de benestar. Tamén confrontarán sobre as súas propostas de gobernanza e modelo institucional no contexto actual.

O debate estará moderado pola redactora xefa de Informativos de Televisión de Galicia, Marta Darriba Quitián, e o xefe de Informativos da Radio Galega, Alejandro López Carballeira. Celebrarase en horario de máxima audiencia, a partir das 21.30 h, e poderase seguir a través da Televisión de Galicia, a Radio Galega o os medios dixitais da Corporación.

A CRTVG empregará un amplo dispositivo de recursos humanos e técnicos para garantir a calidade e pluralidade que require un Debate Electoral de máximo nivel. O último debate organizado pola CRTVG no contexto das Eleccións Autonómicas de 2016 chegou a ser contactado por case medio millón de espectadores. O debate será accesible en lingua de signos. Ademais, facilitarase o sinal do evento a todos os medios interesados na súa difusión.

ler máis

A CRTVG interveu nunha xornada sobre a inclusión laboral das persoas con discapacidade no sector da comunicación

03/03/2020

Na mesa redonda, Alfonso Pardo, director do programa Convivir deportivo da RG, salientou a importancia da divulgación e a visibilidade para romper barreiras

A CRTVG interveu nunha xornada sobre a inclusión laboral das persoas con discapacidade no sector da comunicación

Santiago, 03.03.2020.-  A CRTVG participou esta mañá na xornada de presentación do Informe INCLUCOM, impulsado pola asociación de Directivos de Comunicación (Dircom), xunto ao Cermi (Comité Español de Representantes de Persoas con Discapacidade), Fundación Once e Down España, a Universidad CEU San Pablo, e coa colaboración do Ministerio de Traballo.

Na sesión, celebrada na Fundación Mª José Jove da Coruña, debateuse sobre a inclusión laboral e as capacidades do desenvolvemento profesional das persoas con discapacidade na mesa redonda Inclusión/Comunicación en Galicia: os expertos debaten, en que interveu o xornalista da Radio Galega Alfonso Pardo, director e presentador do Convivir deportivo da emisora pública.

O  programa Convivir deportivo pon o foco na realidade social do deporte, deportes minoritarios, deporte inclusivo e adaptado, como explicou Alfonso Pardo, quen tamén se referiu ao valor do espazo Convivir en igualdade dirixido por Clara de Sáa (Radio Galega, de luns a xoves ás 21.00h.) así como á importancia de que un espazo divulgativo sobre o eido social galego se emita no prime time para que a visibilidade da discapacidade e a inclusión real sexan posibles.

Tamara Vázquez, investigadora da Universidade CEU San Pablo, presentou o  informe, en que se destaca que cando se lles dá unha oportunidade, os profesionais da comunicación con discapacidade demostran que posúen os coñecementos e as competencias necesarias para achegar valor aos equipos de comunicación. O perfil das persoas con discapacidade que traballan no sector da comunicación é un técnico ou redactor con estudios superiores e cunha discapacidade física ou sensorial. O informe pon de manifesto tamén que só o 26% dos consultados traballan ou traballaron con persoas con discapacidade, e que as principais barreiras para a inclusión laboral son os prexuízos, o medo e o descoñecemento das persoas ao cargo da elección das persoas que deben cubrir vacantes laborais.
    
A mesa, moderada por Belén Rey, responsable de Comunicación da Fundación María José Jove e vicepresidenta de Dircom Galicia, contou tamén coa participación de Manuel Esmorís, presidente de Down Coruña; Irene Montero, xornalista e repersentante da asociación Asperga; María Acuña, directora de Comunicación de Cogami, e Lucía Fernández, redactora de contidos dixitais en Cinfo Company. Durante esta sesión, debateuse sobre a inclusión laboral e as capacidades do desenvolvemento profesional das persoas con discapacidade no ámbito da comunicación.

A Radio Galega emite Convivir en igualdade, dirixido por Clara de Sáa, de luns a xoves de 21.00 h a 21.30 h, e o Convivir deportivo, con Alfonso Pardo, os sábados de 13.00 a 14.00 h.

ler máis

Unha reportaxe da Radio Galega sobre o desabastecemento de fármacos, gañadora do 20º Premio Periodístico Albarelo

28/02/2020

Elaborada por Celia Díaz e Chus Silva, foi emitida en maio do ano pasado no programa ‘Panorámica’ e recibirá un galardón dotado con 3.000 euros

Esta iniciativa do Colexio Oficial de Farmacéuticos da Coruña outorgou tamén dous accésits a senllos traballos sobre a prevención do suicidio e os boticarios rurais

Unha reportaxe da Radio Galega sobre o desabastecemento de fármacos, gañadora do 20º Premio Periodístico Albarelo

Santiago, 28.02.2020.-    Unha reportaxe sobre a problemática do desabastecemento de medicamentos elaborada polos profesionais da Radio Galega Celia Díaz e Chus Silva e emitida o en maio de 2019 no programa ‘Panorámica’ foi a gañadora da 20ª edición do Premio Periodístico Albarelo.

Ademais do galardón ao traballo de Díaz e Silva, dotado con 3.000 euros, o xurado do premio, integrado por profesionais da farmacia e o xornalismo e auspiciado polo Colexio Oficial de Farmacéuticos da Coruña, decidiu outorgar dous accésits, de 1.000 euros cada un. Así, recoñeceu o traballo de Isabel Bravo polo programa radiofónico ‘La prevención del suicidio. Un problema de salud pública’, emitido en outubro do ano pasado en Radio Coruña Cadena Ser. O outro accésit recaeu en Carmen Torrente pola reportaxe titulada ‘Farmacéuticos rurales, ejemplos de supervivencia ante nuevos recortes’, publicado en xuño de 2019 en ‘Correo Farmacéutico’.

O Premio Periodístico Albarelo naceu hai 20 anos por iniciativa do Colexio Oficial de Farmacéuticos da Coruña para fomentar a elaboración e difusión de traballos xornalísticos relacionados coa saúde e, en especial, co mundo da farmacia. Desde a súa creación premiou 74 informadores, infografistas, cámaras e ilustradores, na súa gran maioría de medios de ámbito galego.

ler máis

O Granada-Celta e o Deportivo-Lugo, protagonistas esta fin de semana no 'Galicia en Goles' da Radio Galega

28/02/2020

O venres, a RG retransmite a LEB Ouro de baloncesto, a Liga de Hóckey sobre patíns e o fútbol sala masculino

No resto da xornada, o ‘Galicia en Goles’ seguirá de preto as ligas de fútbol, a ACB de baloncesto e o Campionato de España de atletismo

O Granada-Celta e o Deportivo-Lugo, protagonistas esta fin de semana no 'Galicia en Goles' da Radio Galega

Santiago, 27.02.2020.- A fin de semana deportiva comeza na Radio Galega o venres ás 20:30 horas, da man de Paco Santos. O ‘Galicia en Goles’ seguirá os partidos do Breogán e do COB Ourense na LEB Ouro de baloncesto, do Liceo na liga de hóckey sobre patíns e do Parrulo na competición masculina de fútbol sala. Ademais, o programa analizará a intensa xornada da fin de semana.

ler máis

O programa da Radio Galega 'Convivir Deportivo' chega este xoves a Rois e o venres, a Xove

27/02/2020

O espazo dirixido e presentado por Alfonso Pardo grava hoxe unha das súas emisións no Edificio Multiusos dos Dices, onde se realizará unha biografía do ex-ciclista Xesús Blanco Villar

Mañá, o destino será a localidade lucense, que acollerá unha edición dedicada a promover o fútbol gaélico, a partir da experiencia do equipo Britonia FG - A Mariña, recentemente creado

O programa da Radio Galega 'Convivir Deportivo' chega este xoves a Rois e o venres, a Xove

Santiago, 27.02.2020.-    O programa da Radio Galega ‘Convivir Deportivo’ segue a viaxar por toda Galicia na busca de historias relacionadas coa realidade social do deporte, con parada hoxe no concello coruñés de Rois e mañá na localidade lucense de Xove.

O espazo dirixido e presentado por Alfonso Pardo grava este xoves unha das súas emisións no Edificio Multiusos dos Dices, en Rois, onde a partir das 20.00 h se realizará unha achega á biografía do ex-ciclista profesional Xesús Blanco Villar, que estivo en activo entre os anos 1982 e 1998 e que foi un dos mellores deportistas galegos desta disciplina.

ler máis

Radio Galega Música emite en directo os concertos do Festival do Queixo de Arzúa

27/02/2020

Dentro do espazo ‘Estudio 3’, a canle ofrecerá o sábado (21.30 h) os concertos de El Capitán Elefante, Tequila e Novedades Carminha

O domingo (18.00 h.) retransmitirá en directo as actuacións de Luar na Lubre e Baiuca nunha edición especial de ‘Lume na Palleira’

Radio Galega Música emite en directo os concertos do Festival do Queixo de Arzúa

Santiago, 27.02.2020.-    Os concertos de El Capitán Elefante, Tequila, Novedades Carminha, Luar na Lubre e Baiuca chegarán en directo esta fin de semana aos ouvintes de Radio Galega Música. O programa ‘Estudio 3’, dirixido e presentado por Ricardo Alonso, emitirase desde Arzúa con motivo da celebración do Festival do Queixo de Arzúa.

ler máis