CRTVG

Buscar

CRTVG Viva

Novas RG

Celta-Valladolid, Almería-Lugo e a Terceira, no 'Galicia en goles'

25/02/2021

Fin de semana polideportiva na Radio Galega, en que tamén será protagonista das retransmisións o Obradoiro-Tenerife de baloncesto

Celta-Valladolid, Almería-Lugo e a Terceira, no 'Galicia en goles'

Santiago, 25.02.2021.- Febreiro remata con moito deporte na sintonía da Radio Galega. O venres, desde as oito e media do serán, Paco Santos analiza o calendario dos equipos galegos cos protagonistas dos partidos máis importantes ata as 12 da noite na primeira edición de 'Galicia en goles'.

O sábado, desde as 3, Xoán Galán conduce a retransmisión do encontro da Segunda División A entre o Almería e o Club Deportivo Lugo. Ademais, as ligas de baloncesto, fútbol sala e balonmán completarán a programación ata as 11 da noite.

Xa o domingo, o 'Galicia en goles' non descansará nin no xantar, xa que ás 2 da tarde xoga o Celta en Balaídos ante o Valladolid. Antes, desde as 12 do mediodía, o programa atenderá o fútbol de Terceira e o baloncesto, con atención especial ao Obradoiro-Tenerife da ACB. Pola tarde, máis fútbol autonómico ata que comece o faladoiro de especialistas, contra as oito e media do serán.

Durante a fin de semana, a Radio Galega ofrece outros espazos de temática deportiva. O sábado, á 1 do mediodía, Alfonso Pardo visita O Vicedo para presentar a Unión Deportiva Folgueiro. Ás 11 da noite, Rodrigo Pérez Pardo analiza a actualidade do motor no 'Gas a fondo', mentres ás once e media Toni López conversa co padexeiro Luis Fernández no 'Galicia en Toquio'.

Ademais, o domingo 'Ao contraataque' debate ás 11 da noite os resultados acadados polos nosos equipos durante a fin de semana.

ler máis

As radios públicas autonómicas reforzan o seu labor no mundo dixital

24/02/2021

Aumentan as visitas, número de descargas, usuarios únicos e reproducións dos seus programas de radio online e podcasts en 2020
 
A Radio Galega obtivo en 2020 a súa mellor marca histórica. As canles dixitais incrementaron máis dun 10 % o seu impacto global e a súa aposta polos podcast foron claves para acadar grandes datos de audiencia dixital

As radios públicas autonómicas reforzan o seu labor no mundo dixital

Santiago, 24.02.2021.-  As radios son unha parte fundamental dos servizos audiovisuais públicos autonómicos englobados na Federación de Oganismos de Radio e Televisión Autonómicos (FORTA). Nos últimos tempos, este medio tivo que reinventarse e ir adaptándose aos constantes cambios, á nova maneira de consumir e ao crecemento de Internet. Durante o 2020, as radios reforzaron a súa aposta polo mundo dixital, o cal se viu reflectido no éxito e crecemento dos seus contidos online.

2020 foi o ano da información de servizo público. No medio dunha pandemia sen precedentes, os medios públicos galegos responderon dando o máximo servizo público da súa historia, e este traballo viuse recompensado pola sintonía e fidelidade da audiencia. Todas as canles da Corporación melloraron a súa audiencia en 2020. CRTVG pechou o ano cunha cota media anual do 10,6 %, (TVG 9,9 % e a G2 0,7 %, un crecemento dun 6 % respecto de 2019). A Radio Galega obtivo a súa mellor marca histórica, e as canles dixitais incrementaron máis dun 10% o seu impacto global, cun crecemento interanual do portal crtvg.gal do 16 % no número de sesións.

Os cambios na programación de Radio Galega e Radio Galega Música (RGM), e a súa aposta polos destacados e podcast foron claves para lograr uns grandes datos de audiencia dixital en 2020.

En Radio, RGM creceu un 16 % con respecto a 2019 e os podcast de Radio Galega, un 9 %. Os directos disparáronse o catro últimos meses do ano, do mesmo xeito que o seguimento en redes sociais. E RGM iniciou 2021 con cifras altas de consumo, sen deixar de crecer desde abril de 2020 e un pico de consumo en novembro pasado (27.665 usuarios únicos).

Máis visitas, descargas e usuarios nas emisoras de Forta

Pola súa parte, Canal Sur Radio pechou o ano 2020 con 7.039.624 visitas na súa web (un millón de páxinas máis que o ano anterior) e 1,6 millóns de usuarios únicos, o que supoñen 600.000 usuarios máis que en 2019.  

Catalunya Ràdio obtivo 43 millóns de reproducións de audio, a través da súa web, app, podcast e asistentes de voz. Iso representa un incremento do 17 % respecto ao 2019.

Durante este ano, Onda Madrid logrou un crecemento, non só de usuarios, que ascenden a 3.455.141, un 59 % máis que o ano anterior. O número de páxinas vistas da emisora chega ás 7.255.171, o que supón un 41 % de crecemento fronte á tempada anterior.

300.000 persoas conectáronse á radio en directo de À Punt a través da web, as aplicacións móbiles ou dispositivos intelixentes, e consumíronse máis de 120.000 contidos á carta.

As radios do grupo EITB (Euskadi Irratia, Radio Euskadi, Radio Vitoria, Gaztea, Eitb Irratia e Euskal Kantak) continúan crecendo en Internet, con máis de 410.000 usuarios únicos ao mes e cunha audiencia nas súas emisións online de 50.000 usuarios únicos.

Os programas de Radio Castilla-La Mancha obtiveron máis de 350.000 visitas na súa web corporativa en 2020; case 1 millón de reproducións de podcast, como ‘El Dragón invisible’ ou o programa ‘808 Radio’, especializado en música electrónica, que aglutina preto de 300.000 reproducións.

Onda Regional de Murcia está en continua expansión en internet: durante o 2020 a súa web rexistrou unha media de 100.000 usuarios únicos por mes triplicando as cifras do ano anterior, e ao redor de 4,5 millóns de accesos, o que se traduce en máis de 16 millóns de clics entre visitas, descargas e reproducións dos seus contidos, un dato que supón dobrar a cifra de 2019.

Neste sentido, o impacto de Aragón Radio foi sobresaliente durante o último ano, ao superar os 4,5 millóns de audios descargados (o que supón un crecemento do 22 %), un millón máis que o ano anterior.

IB3 Ràdio incrementou a súa presenza online a través de diferentes formatos e canles. Así, a canle balear logrou que os seus usuarios consumisen máis de 234.131 contidos á carta a través das plataformas dixitais. Durante o 2020, un total de 162.697 persoas conectáronse á radio en directo a través da páxina web, a App e a plataforma de podcasting de Ivook e Spotify.

As emisoras en RRSS

Ademais, a presenza das radios públicas en redes sociais é cada vez máis notoria. As emisoras atoparon nas plataformas o aliado perfecto para achegarse ao público máis novo -e máis esixente- captando a atención de novos oíntes.

A Radio Galega obtivo un crecemento do 7 % en Facebook e do 17 % en Twitter, mentres que Aragón Radio conta cunha activa comunidade de seguidores en redes que ascende a máis de 145.000 persoas.

Canal Sur Radio aumentou a presenza das súas emisoras en RRSS: por exemplo, Canal Fiesta Radio ten 388.385 seguidores e é a emisora da casa con maior presenza, converténdose en TT todos os días en Twitter.

Catalunya Ràdio destaca a súa evolución no panorama dixital: entre as súas canles de Youtube, Instagram TV ou Spotify, o número de reproducións ascende a un total de 3 millóns.

As canles de EiTB teñen gran presenza en plataformas como Spotify, Ivoox ou iTunes, así como en Facebook, Twitter e Instagram. Os contidos de Radio Castilla-La Mancha, pola súa banda, superaron as 150.000 reproducións en Youtube durante o 2020. A presenza de ORM en redes sociais tamén creceu de maneira exponencial nos últimos anos, principalmente en Twitter e Facebook, onde a radio autonómica conta con preto de 50.000 seguidores.

As temáticas máis demandadas

Entre as temáticas de máis éxito para os oíntes das radios públicas autonómicas atópanse os programas informativos e os espazos deportivos, mantendo sempre unha presenza relevante os programas de humor e de música.

Entre os andaluces e os valencianos os programas máis destacados son os de humor. Destacan principalmente os programas de actualidade entre os cataláns, vascos e murcianos.

O deporte é outra temática moi demandada, exemplo diso son os programas de Castilla-La Mancha, Canal Sur, Radio Euskadi e Radio Galega. Precisamente, os eventos deportivos do último trimestre incrementaron considerablemente o número de usuarios únicos, tanto nas canles dedicadas ao deporte como na propia emisión de Radio Galega e Televisión de Galicia.

Tamén son os que máis crecen os programas deportivos de Onda Madrid, À Punt Aragón Radio. Ademais, os madrileños apostan por un novo contido que se consome maioritariamente a través da web, relacionado coas ofertas de emprego e que resolve dúbidas laborais por parte do SEPE.

ler máis

A Banda da Loba, protagonista dun novo concerto do ‘Galicia Emerxe’, esta noite na G2

24/02/2021

Xiana Lastra, Andrea Porto, Marcela Porto, Inés Mirás e Estela Rodríguez son as artífices deste grupo, que mestura pop, blues, folk, rock e sons tradicionais

A Banda da Loba, protagonista dun novo concerto do ‘Galicia Emerxe’, esta noite na G2

Santiago, 24.02.2021.-   A Banda da Loba é o novo grupo que se sobe esta noite ao escenario do ciclo ‘Galicia Emerxe’ e que ofrece a G2 a partir das 23.25 horas. Esta formación galega, integrada por cinco mulleres que uniron as súas traxectorias individuais para crear un proxecto colectivo, mestura nas súas propostas pop, blues, folk, rock e sons tradicionais, creando un estilo musical singular e heteroxéneo. Cunha duración de 40 minutos, este concerto estará dispoñible na web dos medios públicos galegos unha vez finalizada a súa emisión pola segunda canle da Galega e o sábado poderase ver na TVG (10.40 h) amais de escoitarse tamén en Radio Galega Música (22.00 h).

Xiana Lastra, Andrea Porto, Marcela Porto, Inés Mirás e Estela Rodríguez publicaron o primeiro e recoñecido álbum de A Banda da Loba, ‘Bailando as rúas’, en 2017. No seu repertorio, inclúen temas propios e outros baseados nas letras de autores galegos como Celso Emilio Ferreiro e Manuel María ou Rosalía de Castro, e os poemas contemporáneos de Rosalía Fernández e Celia Parra.

No ciclo ‘Galicia Emerxe’, conformado por un total de 50 concertos de destacados artistas e grupos galegos, gravados no Museo Centro Gaiás da Cidade da Cultura, contarase nas vindeiras semanas coa música de Sés, Luar na Lubre, Wöyza, Budiño, Rodrigo Romaní, Novedades Carminha, Triángulo de Amor Bizarro, Susana Seivane, Uxía, Eladio y los Seres Queridos e De Vacas, entre outros.

A CRTVG asinou un convenio coa Axencia Galega de Industrias Culturais (Agadic) para difundir o ciclo ‘Galicia Emerxe’ no exercicio do seu papel como servizo público e co afán de apoiar o sector musical e de contribuír a visibilizar o seu traballo.

ler máis

Este mércores, fútbol por radiogalega.gal

23/02/2021

A primeira cita deportiva que ofrece a emisora pública é o derbi galego entre o Rácing de Ferrol e o Celta B

Este mércores, fútbol por radiogalega.gal

Santiago, 23.02.2021.-  Outro mércores de fútbol o que poderán vivir os oíntes da Radio Galega a través da páxina web radiogalega.gal, aplicacións móbiles e tamén pola conta de Twitter galiciangoles. Desde as cinco menos cinco da tarde, Paco Santos presenta máis de cinco horas de retransmisións.

A primeira cita é na Malata, co derbi Rácing de Ferrol-Celta B da Segunda División B. Raúl Villares e Roberto Carlos Carballo trasladarán a emoción do fútbol nun encontro que afecta tamén aos outros equipos galegos implicados na pelexa por ascender ou permanecer.

Desde as sete e media, o interese pasará pola Terceira División con tres citas: o derbi local Fabril-Silva, o Bergantiños-As Pontes e o Paiosaco-Fisterra. Ademais, o programa estará pendente do balonmán feminino coa disputa do Guardés-Málaga da máxima categoría, no pavillón da Sangriña.

Na FM, os oíntes poderán estar informados do que pasa nesta xornada ás 20.30 horas no espazo de deportes de 'A Crónica' e, a partir das 23.00 horas, 'Ao contraataque' falará cos principais protagonistas.

ler máis

A CRTVG colabora co programa educativo '21 días co galego e +' para promover o galego fóra das aulas

22/02/2021

O magazine ‘Galicia por Diante’ da Radio Galega conversará cada día con alumnos e e profesores dun dos dez colexios participantes

O proxecto #DígochoEu visitará virtualmente eses centros de ensino, comezando este xoves co IES Taboada Chivite de Verín

'21 días co galego e +' é un programa de Política Lingüística, que busca favorecer o uso do galego oral entre a xente nova

A CRTVG colabora co programa educativo '21 días co galego e +' para promover o galego fóra das aulas

Santiago, 22.02.2021.- A CRTVG colabora desde hoxe no programa educativo ’21 días co galego e +’, que leva a cabo a Secretaría Xeral de Política Lingüística para promover o uso do galego oral entre a xente nova, dentro e fóra dos centros de ensino. Ata o 14 de marzo, o espazo da Radio Galega ‘Galicia por Diante’ e o proxecto #DígochoEu da CRTVG serán cómplices desta nova edición para favorecer o uso e perfeccionamento da nosa lingua en todos os ámbitos e, mesmo dun xeito divertido, mellorar o coñecemento sobre o galego. Nesta iniciativa, en que participan dez centros das catro provincias galegas da ESO, de bacharelato e de FP, o alumnado comprométese co seu profesorado a falar soamente en galego as 24 horas do día durante os 21 días de duración.

Cada día, o magazine ‘Galicia por Diante’ da RG (tamén nas fins de semana) acollerá unha sección con algún dos dez centros de ensino participantes, en que se tratarán temas relacionados coa lectura, a lingua e os colexios, entre outras cuestións. Desde o martes 23 e a partir das 13.00 horas, durante uns dez minutos, conversarase en directo cunha representación dun colexio, que estará formada por unha alumna, un alumno e unha/un docente. Na fin de semana, esta conversa desenvolverase ás 10.45 horas. A RG presentoulle esta iniciativa aos seus oíntes este luns, cunha entrevista conxunta coa promotora da mesma Pilar Ponte e o secretario xeral de Política Lingüística, Valentín García, e coa participación de Víctor F. Freixanes, presidente da Real Academia Galega.

Charlas virtuais do #DígochoEu nos dez colexios participantes

Pola súa parte, o proxecto #DígochoEu visitará virtualmente o xoves o IES Taboada Chivite de Verín, nunha sesión que atenderán arredor dun cento de estudantes. Os xornalistas Carlos Amado e Esther Estévez retoman, aínda que sexa virtualmente, os encontros cos centros escolares para difundir os obxectivos de #DígochoEu, espallar o uso do galego e promover o seu uso correcto. En total, realizaranse dez charlas ao longo das vindeiras semanas.

#DígochoEu é xa o proxecto sobre lingua máis seguido na historia dos medios públicos galegos. Con marcas de seguimento na web e nas redes sociais, o espazo chegou esta semana a máis de 10 millóns de visualizacións en TikTok, onde a seguen 80.000 persoas. Esta conta foi creada a finais de setembro e os seus vídeos acadaron desde entón 1,1 millóns de likes. Cun formato moi divertido e dinámico, a xornalista Esther Estévez convida a falar mellor en galego nun breve vídeo diario, de tan só 1 minuto. #DígochoEu naceu en xaneiro de 2020 dentro da web dos servizos informativos e hoxe pode verse na web crtvg.gal, en g24.gal, así como nas contas de Instagram (@g24noticias), Twitter (@g24noticias), Facebook (g24noticias), Youtube (youtube.com/tvg) e TikTok (tiktok.com/@digochoeu) e no Telexornal da TVG. Dirixido polo xornalista Carlos F. Amado, #DígochoEu conta coa revisión do servizo de asesoramento lingüístico da CRTVG da man de Rocío Pérez, quen tamén participará nas sesións.

Dez centros de ensino participan en ‘21 días co galego e +’

Este programa ten a súa orixe en ‘21 días co galego’, unha experiencia didáctica que botou a andar no IES da Pobra do Caramiñal no ano 2013, da man da profesora Pilar Ponte. A Secretaría Xeral de Política Lingüística quixo dar un paso máis e exportou a iniciativa a outros centros educativos, no marco do Plan de dinamización da lingua galega na mocidade. Na edición de 2021 son dez os centros de ensino galegos, que desenvolven os contidos do programa: IES Perdouro de Burela, IES As Mariñas de Betanzos, IES de Carral, CPR A Inmaculada de Lugo, IES Lamas de Abade de Santiago, IES Ramón Cabanillas de Cambados, IES Sánchez Cantón de Pontevedra, IES Lauro Olmo do Barco de Valdeorras, IES Santa Irene de Vigo e IES Taboada Chivite de Verín.


ler máis

Valencia-Celta, Lugo-Logroñés e a Segunda B, protagonistas do ‘Galicia en goles’ esta fin de semana

18/02/2021

Os afeccionados ao hóckey a patíns poderán seguir tamén, en directo, o partido que xogará este venres o Liceo contra o Voltregá

Valencia-Celta, Lugo-Logroñés e a Segunda B, protagonistas do ‘Galicia en goles’ esta fin de semana

Santiago, 18.02.2021.- O equipo deportivo da Radio Galega inicia a programación da fin de semana o venres ás oito e media da tarde coa análise do que serán os partidos destacados do sábado e domingo, ademais de seguir o Liceo-Voltregá de hóckey a patíns.

O sábado, desde as 3 da tarde, a atención estará centrada no Valencia-Celta, da Primeira División, e no derbi provincial Rácing de Ferrol-Deportivo da Coruña, da Segunda B, na Malata. Outro encontro de rivalidade, Ourense CF-Arenteiro, destaca na Terceira Galega.

Xa o domingo, ás 12, o interese pasará polo Celta B-Salamanca, de Segunda B, o Estradense-Ribadumia, de Terceira, e o encontro de fútbol sala entre o Parrulo e o Levante, na Malata. A partir das 3, o derbi de Segunda B entre o Pontevedra e o Compostela, en Pasarón, xunto á visita do Coruxo a Guijuelo e a xornada de Terceira centrarán a sesión de tarde. Desde as oito e media, o Lugo-Logroñés, de Segunda División A, ocupará a última faixa do ‘Galicia en goles’.
    
Durante a fin de semana, a Radio Galega emite outros espazos de temática deportiva. O sábado, á 1 do mediodía, Alfonso Pardo visita o concello coruñés de Coirós para dar voz no ‘Convivir’ ao taekwondo e o kick boxing. Ás 11 da noite, Rodrigo Pérez actualiza o mundo do motor no ‘Gas a fondo’, mentres ás once e media da noite Toni López conversa no ‘Galicia en Toquio’ coa tiradora de esgrima Judith Rodríguez.

O domingo, ás 11 da noite, os afeccionados ao fútbol teñen tamén unha cita con Pedro Pablo Alonso na mesa de debate de ‘Ao contraataque’.

ler máis

Novo concerto do ‘Galicia Emerxe’, esta noite na G2, con Boyanka Kostova

17/02/2021

A partir das 23.25 horas, poderase gozar na segunda canle da Galega dos ritmos hipnóticos do trap en galego que realiza este grupo compostelán

Novo concerto do ‘Galicia Emerxe’, esta noite na G2, con Boyanka Kostova

Santiago, 17.02.2021.-  A G2 ofrece esta noite un novo concerto do ciclo ‘Galicia Emerxe’, con Boyanka Kostova como protagonista. O grupo, formado por Cibrán García (Saibran Yiyi) e Chicho (Chicho do Funk), experimenta con subxéneros do hip hop, que conectan co trap e coas músicas urbanas actuais, e onde sobresaen unhas letras repletas de retranca galega. Considerados os impulsores do twerking rural e un dos grupos que conseguiron que o trap entrase con forza no panorama musical en galego, os espectadores poderán gozar dos seus ritmos hipnóticos e flow costumista a partir das 23.25 horas. Cunha duración de 40 minutos, este concerto estará dispoñible na web dos medios públicos galegos unha vez finalizada a súa emisión pola segunda canle da Galega e o sábado poderase ver na TVG (10.40 h) amais de escoitarse tamén en Radio Galega Música (22.00 h).

ler máis

Esta noite, Oviedo-Lugo, na Radio Galega

15/02/2021

Tras o partido, edición do programa 'Ao Contraataque', coa rolda de prensa de Mehdi Nafti e a opinión dos futbolistas máis destacados

Esta noite, Oviedo-Lugo, na Radio Galega

Santiago, 15.02.2021.-  A xornada para o fútbol galego remata esta noite co partido de Liga da Segunda División entre o Real Oviedo e o Club Deportivo Lugo, no estadio Carlos Tartiére. Desde as oito e media do serán, Paco Santos conduce a retransmisión, que contará con Roberto Carlos Carballo na narración, mentres Emilio González e Rafa Porto achegarán os comentarios especializados.

Catro puntos separan aos dous equipos, o Lugo está na zona intermedia con 32 puntos, mentres o Oviedo suma 28 e está fora dos postos perigosos.

A partir das once, o programa 'Ao Contraataque', que dirixe Pedro Pablo Alonso, ofrecerá a rolda de prensa de Mehdi Nafti e a opinión dos futbolistas máis destacados.

O mércores haberá outra edición especial de 'Galicia en Goles', pero desta volta a través de radiogalega.gal e aplicacións para o móbil. Desde as catro menos cinco da tarde, o protagonismo será para o Celta B-Guijuelo de Segunda B. A partir das oito menos dez, a Liga Asobal de balonmán co Cangas-Puerto Sagunto e a disputa de catro partidos da Terceira adiados hai semanas pola covid-19 serán o centro de atención ata as dez e media da noite.

ler máis

Cobertura especial da xornada electoral catalá, o domingo, na CRTVG

11/02/2021

Na noite electoral do 14-F, a TVG e a RG ofrecerán programas especiais, incluíndo resultados dunha enquisa realizada para FORTA, e a participación de analistas
 
O portal crtvg.gal e as redes sociais da CRTVG disporán tamén de información actualizada en tempo real

Cobertura especial da xornada electoral catalá, o domingo, na CRTVG

Santiago, 11.02.2021.-    Os medios públicos galegos informarán este domingo do transcurso da xornada electoral en Cataluña. Na TVG, a cobertura comezará ás 9.00 horas coa apertura dos colexios electorais e, ao peche das urnas, ofrecerase o programa especial ‘Eleccións Cataluña 14-F’, ás 19.55 h, coas primeiras reaccións políticas e os datos do escrutinio. Ao longo do día os espazos informativos da Televisión de Galicia e os boletíns da Radio Galega achegarán datos de ambiente, participación, e as votacións dos principais líderes políticos, con conexións en directo co xornalista Marcos Sueiro, á cabeza do equipo da TVG desprazado en Barcelona, no Centro de Datos do Parlamento de Cataluña.    

Na TVG, o ‘Bos días’ (09.00 h), presentado pola xornalista Pilar Landín, dará conta da constitución das mesas electorais e da apertura dos colexios. No serán, o especial ‘Eleccións Cataluña 14-F’ (19.55 h), presentado por Carlos Amado, ofrecerá os resultados dunha enquisa para FORTA sobre intención de voto, elaborada por GAD3.

No Estudio 300 de San Marcos, Carlos Amado contará coa participación da profesora María Bastida e do xornalista José Luis Gómez. En conexión en directo, conversarase tamén con María Martín Revuelta, directora de Comunicación de GAD3; con Matilde Massó, profesora de Socioloxía da Universidade da Coruña, e con Antón Costas, catedrático de Política Económica da Universidade de Barcelona. Para o remate do reconto, no ‘Telexornal noite’, a xornalista Irene Lourido volverá conectar ás 23.35 horas co Centro de Datos de Cataluña, e ofreceranse as primeiras comparecencias e reaccións dos principais líderes políticos.

Xornada electoral na Radio Galega

A Radio Galega ofrecerá este domingo un programa especial a partir das 20:00 horas. Desde o peche dos colexios electorais ata a publicación dos resultados, os analistas políticos Luis Pérez e María Cadaval compartirán mesa de faladoiro cos directores das cabeceiras máis destacadas da prensa galega e catalá.

Durante toda a xornada, o portal web crtvg.gal e os perfís nas redes sociais da CRTVG realizarán unha cobertura informativa especial, en que destacará a achega en tempo real dos resultados electorais a medida que se vaia producindo o escrutinio.

ler máis

A música de Xoel López, este mércores na G2, no marco do 'Galicia Emerxe'

09/02/2021

O coruñés súmase a este ciclo de concertos, que a CRTVG está ofrecendo, a través das súas canles, en apoio ao sector musical e ao traballo dos artistas galegos, afectados polas restricións sanitarias

A música de Xoel López, este mércores na G2, no marco do 'Galicia Emerxe'

Santiago, 09.02.2021.-  O coruñés Xoel López é o protagonista este mércores dun novo concerto do ciclo ‘Galicia Emerxe’, que a CRTVG está ofrecendo cada semana nas súas canles. A partir das 23.25 horas, os espectadores poderán gozar nas ‘Noites Temáticas’ da G2 dun recital de 40 minutos dun dos artistas galegos máis representativos da escena independente. Este novo recital estará dispoñible na web dos medios públicos galegos unha vez finalizada a súa emisión pola segunda canle da Galega e o sábado poderase ver na TVG (10.40 h) amais de escoitarse tamén en Radio Galega Música (22.00 h).

O indie-pop de Xoel López, que acaba de lanzar á rúa o seu quinto álbum en solitario ‘Si mi rayo te alcanzara’, soará a través dunha selección dalgunhas das cancións de máis éxito do seu universo musical propio. É o cuarto evento musical que a CRTVG ofrece dentro do ciclo ‘Galicia Emerxe’, conformado por un total de 50 concertos de destacados artistas e grupos galegos. Gravados no Museo Centro Gaiás da Cidade da Cultura, nas vindeiras semanas iranse ofrecendo recitais de Boyanka Kostova, A Banda da Loba, Sés, Luar na Lubre, Wöyza, Budiño, Rodrigo Romaní, Novedades Carminha, Triángulo de Amor Bizarro, Susana Seivane, Uxía, Eladio y los Seres Queridos e De Vacas, entre outros.

No exercicio do seu papel como servizo público e co afán de apoiar o sector musical e de contribuír a visibilizar o seu traballo, a CRTVG asinou un convenio coa Axencia Galega de Industrias Culturais (Agadic) para difundir o ciclo ‘Galicia Emerxe’. Esta iniciativa, que ten como obxectivo facer accesible a cultura a toda a cidadanía galega, cobra especial relevancia nas actuais circunstancias derivadas da covid-19, que limitan de xeito importante o normal desenvolvemento das actividades musicais con público en directo, e pretende ser un xeito alternativo de manter viva a oferta musical.




ler máis