CRTVG

Buscar

CRTVG Viva

Novas RG

A Radio Galega retransmite o Deportivo-Fuenlabrada

06/08/2020

Este venres, desde as oito menos cuarto da tarde

A Radio Galega retransmite o Deportivo-Fuenlabrada

Santiago, 06.08.2020.- O partido máis polémico da temporada, Deportivo-Fuenlabrada, debe disputarse este venres ás oito da tarde no estadio municipal de Riazor. A Radio Galega ofrecerá desde as oito menos cuarto unha edición especial de 'Galicia en Goles' para contar todo o que suceda sobre o terreo de xogo. Pedro Pablo Alonso dirixe a retransmisión, con Javi Torres na narración e os especialistas Alfonso Núñez e Peli Cantoná preparados para analizar os dous equipos.

Nun principio, a Liga fixara para o mércores ás oito este encontro que completa o calendario da última xornada na Segunda División, pero finalmente trasladouse ao venres. Faga o que faga o Deportivo, matematicamente non lle da para escapar dos postos de descenso, mentres o conxunto madrileño necesita polo menos o empate para subir á sexta praza e disputar a fase de ascenso á Primeira División. Así e todo, o final da temporada está tamén supeditado ás decisións dos comités deportivos e mesmo da xustiza ordinaria.

O ‘Galicia en goles’ deste venres tamén atenderá ata as doce da noite ao que suceda na Champions League, co Manchester City-Real Madrid de oitavos de final, ademais de analizar toda a actualidade do día no deporte galego. Durante a fin de semana, o programa conta no mes de agosto con dúas edicións informativas: de 14.15 a 15 horas e de 20.05 a 21 horas.

As emisións dos programas da Radio Galega poden seguirse a través da FM, TDT, radiogalega.gal, Radioplayer España e de altofalantes Alexa.

ler máis

A sesión constitutiva do Parlamento de Galicia, este venres na TVG e a Radio Galega

06/08/2020

Os programas 'A revista' e 'Galicia por diante' conectarán co hemiciclo galego entre as 11.00 e as 12.30 horas

A sesión constitutiva do Parlamento de Galicia, este venres na TVG e a Radio Galega

Santiago, 06.08.2020.- Este venres, 7 de agosto, celébrase a sesión constitutiva da XI Lexislatura do Parlamento galego, ás 11.00 horas. A TVG conectará co hemiciclo dentro do espazo matinal 'A revista' para emitir a constitución da Mesa da Idade e a constitución da Mesa do Parlamento. E desde alí, na rúa do Hórreo de Compostela, o xornalista especializado en información parlamentaria Xesús Fontenla explicará todo o que aconteza durante o acto.

ler máis

Desde o martes na Radio Galega hai un novo espazo: 'O buscador'

21/07/2020

O programa, presentado por Carlos Reboreda, indaga no arquivo da RG e axuda os oíntes a atoparen contidos a través da plataforma radiogalega.gal

Desde o martes na Radio Galega hai un novo espazo: 'O buscador'

Santiago, 21.07.2020.-    A Radio Galega inaugurou este martes, ás 22:00 horas, un novo programa, ‘O buscador’, dirixido por Carlos Reboreda. Este espazo, de emisión diaria, indagará no arquivo da RG e tamén nos mellores contidos ofrecidos esta temporada.

ler máis

Amplo despregamento da Radio Galega no final da Liga de Primeira División

18/07/2020

Este domingo remata a temporada e o Celta de Vigo xoga na derradeira xornada a permanencia na categoría

Durante a fin de semana, 'Galicia en Goles' tamén estará pendente das fases de ascenso de fútbol e fútbol sala

Amplo despregamento da Radio Galega no final da Liga de Primeira División

Santiago, 18.07.2020.- A derrota do xoves ante o Levante, unido á vitoria do Leganés en San Mamés, obriga ao equipo de Óscar García Yunyent a gañar na súa visita a Cornellá para non depender do resultado que se produza á mesma hora en Butarque. 

ler máis

Toda a información do 12-X, o domingo, na CRTVG, en tempo real e con puntos de directo en toda Galicia

10/07/2020

Os xornalistas Marta Darriba, Ana Celia Vázquez e Carlos F. Amado presentarán, a partir das 19.30 horas, un ‘Especial eleccións’

Ás 20.00 h a Galega ofrecerá os resultados dunha enquisa, realizada por GFK á pé de urna en 120 colexios electorais de Galicia

A RG realizará un amplo seguimento da xornada e, desde as 19.45 h, un especial que contará tamén co apoio de destacados analistas e colaboradores

Toda a información do 12-X, o domingo, na CRTVG, en tempo real e con puntos de directo en toda Galicia

Santiago, 10.07.2020.-  Os medios públicos galegos ofrecerán o domingo unha cobertura informativa especial con motivo das eleccións autonómicas en Galicia. Esta programación comezará na TVG xa ás 9.00 horas para informar da apertura dos colexios electorais. Durante toda a xornada haberá conexións en directo con puntos de toda Galicia e co Centro de Datos. A media tarde (18.30 h), ofrecerase un adianto informativo, e ás 19.30 horas comezará un ‘Especial eleccións’. Este espazo, presentado por Marta Darriba, Ana Celia Vázquez e Carlos F. Amado, achegará ás 20.00 h os resultados dunha sondaxe encargada pola Corporación a GFK, e elaborada cun mínimo de 14.400 enquisas a pé de urna en 120 colexios electorais e 1.400 consultas telefónicas. Desde ese momento, será o tempo para ofrecer datos do escrutinio en tempo real e unha análise dos mesmos por parte de expertos, nun espazo que se realizará desde o Estudio 5 de San Marcos.  

Ao longo das cinco horas previstas de duración do 'Especial eleccións' estableceranse roldas de conexións con xornalistas desprazados en 9 puntos de directo, entre as sedes das forzas políticas, o Centro de Datos e colexios electorais. Recolleranse tamén as reaccións no País Vasco, onde se celebran tamén eleccións autonómicas.

Para a análise da noite electoral, a TVG contará con dúas mesas de analistas formadas por: Arturo González (director de Quadernas Consultoría), Matilde Massó (profesora de Socioloxía da UDC), Nacho Capeáns (xornalista e director de Onda Cero Galicia), Miguel Anxo Bastos (profesor de Ciencia Política da USC), Ana Pardo de Vera (xornalista e directora corporativa de Público), Xosé Luis Gómez (xornalista e editor de Mundiario), María Cadaval (profesora de Economía Aplicada da USC) e o consultor político Santiago Martínez.

Radio Galega

ler máis

'Galicia en Goles' retransmite a antepenúltima xornada da Liga

10/07/2020

O Celta e o Dépor están cada vez máis preto de lograr a permanencia, mentres que o Lugo continúa nunha situación complicada

Este domingo, a Radio Galega comezará o Especial Informativo sobre as eleccións ás 19:45 horas

'Galicia en Goles' retransmite a antepenúltima xornada da Liga

Santiago, 10.07.2020.-  O final exprés da Primeira e Segunda divisións entra no último treito. No prazo de oito días vanse disputar tres xornadas. Os equipos galegos queren chegar cos deberes feitos canto antes e esta fin de semana o Celta e o Deportivo teñen a ocasión de alcanzar o obxectivo da permanencia, mentres o Lugo, de seguir nesta progresión, podería dar un paso adiante para continuar na categoría.

ler máis

A Radio Galega retransmite, o martes e o mércores, os encontros dos equipos galegos de fútbol profesional

06/07/2020

O Celta e o Dépor buscan a permanencia esta semana, mentres que o Lugo xoga en Ponferrada un partido clave

A Radio Galega retransmite, o martes e o mércores, os encontros dos equipos galegos de fútbol profesional

Santiago, 06.07.2020.-  Últimas dúas semanas de competición na Liga de Fútbol Profesional e catro xornadas por diante na Radio Galega. O martes, desde as 21.00 horas, Toni López conduce a retransmisión do partido da Primeira División entre o Celta de Vigo e o Atlético de Madrid, que se vai disputar no estadio municipal de Balaídos. A emisión prolongarase ata as 01.00 h para escoitar, despois dos 90 minutos, aos adestradores Óscar García e Cholo Simeone. A cita é, se cadra, a máis complicada que lle queda ao equipo vigués ata o remate da temporada e, de sumar os tres puntos, tería practicamente garantida a permanencia.

ler máis

A Radio Galega acolle este luns os seus catro debates electorais de cara ao 12X

06/07/2020

Complétase desta forma a serie de 9 debates en 15 días ofrecidos polos medios públicos de Galicia

A Radio Galega acolle este luns os seus catro debates electorais de cara ao 12X

Santiago, 06.07.2020.-  Este luns día 6 de xullo continúa a cobertura da campaña electoral para os comicios do 12 de xullo, coa quenda de debates electorais de carácter provincial na Radio Galega, que se emitirán simultaneamente nas súas desconexións territoriais e en horario de máxima audiencia. Ofreceranse o luns ás 21.00 horas, dentro do espazo ‘A Crónica’, entre os candidatos e as candidatas das sete formacións políticas seguindo os criterios de representatividade e significación establecidos no Plan de Cobertura.

Estes catro debates, cunha duración de 60 minutos cada un, configuraranse arredor de 4 grandes bloques: Galicia e a COVID: xestión, nova normalidade, reconstrución; Políticas económicas, industriais, orzamentarias e fiscais xerais; Políticas sociais e de benestar, educación, sanitarias e modelo institucional, pactos, gobernabilidade e encaixe de Galicia no Estado.

Realizados nos estudios centrais de San Marcos, pola provincia de Ourense, acudirán ao debate Marisol Díaz (PPdeG), Milagros Corral (Marea Galeguista), Marina Ortega (PSdeG), Noa Presas (BNG), David Bruzós (Galicia en Común), José Araújo (Cs) e María Jesús Fernández (VOX).

Pola provincia de Lugo, participarán Elena Candía (PPdeG), Iván Rodríguez Lombardero (Marea Galeguista), Patricia Otero (PSdeG), Olalla Rodil (BNG), Miguel Anxo Fernández-Vello (Galicia en Común), José Ángel Gómez (Cs) e Sonia Teijeiro (VOX).

No caso de Pontevedra, intervirán Corina Porro (PPdeG), Peque González Novoa (Marea Galeguista), Julio Torrado (PSdeG), Luis Bará (BNG), Eva Solla (Galicia en Común), Luis Miguel Lamas (Cs) e Antonio Ramilo (VOX).

Finalmente, no debate da Coruña os participantes serán Ángeles Vázquez (PPdeG), María Chao Martínez (Marea Galeguista), Pablo Arangüena (PSdeG), Xosé Luis Rivas ‘Mini’ (BNG), Martiño Noriega (Galicia en Común), Carmen Mahía (Cs) e Ricardo Morado (VOX).

ler máis

Os concursos e magazines do verán da TVG percorrerán Galicia na busca das mellores festas e novas voces

03/07/2020

A canle pública estrea a mediados de xullo os programas ‘Aquí Hai Verán’, que dará conta das festas e romarías que se celebren en Galicia, e o concurso de karaoke ‘Cantas ou Que?'

Estes novos espazos súmanse a ‘A Liga dos Cantantes Extraordinarios’, que cada xoves busca a mellor voz das orquestras galegas, e ao renovado magazine das tardes ‘Quen Anda Aí?', comandado estes meses por Marcial Mouzo

Os concursos e magazines do verán da TVG percorrerán Galicia na busca das mellores festas e novas voces

Santiago, 03.07.2020.-    Arrancou o mes de xullo e con el a programación de verán da Televisión de Galicia, que este xoves ofreceu como aperitivo a estrea da segunda temporada de ‘A Liga dos Cantantes Extraordinarios’, con máis tensión no concurso, máis música e máis humor. O programa, comandado por Paco Lodeiro, recrutará as mellores voces das orquestras galegas e aspira a converterse cada xoves nun grande evento musical e festivo.

A partir do 19 de xullo, ‘Aquí Hai Verán’ dará conta de canta festa, evento ou romaría se celebre en Galicia durante estes meses. Coa actividade recuperándose pouco a pouco nas rúas e en previsión de que volvan os eventos e as festas, que os galegos vaian de vacacións e que haxa concertos adaptados á ‘nova normalidade’, esta nova proposta retratará o ocio e o entretemento das vacacións de verán dos galegos.
    
A TVG estreará tamén ‘Cantas ou Que?’, un formato de entretemento de luns a venres baseado no karaoke, que será presentado por Fran Cañotas. O escenario móbil do programa instalarase cada semana nunha localidade costeira de Galicia, un lugar popular con veciños e turistas gozando do verán e da praia. Ao finalizar cada interpretación, os concursantes serán votados por un xurado popular e os/as  vencedores/as de cada día enfrontaranse o venres desa mesma semana na gran final.

Pero antes disto, cada tarde será o momento do ‘Quen Anda Aí?’, que non para durante o verán. Capitaneado por Marcial Mouzo, que estará acompañado por Rodrigo Vázquez, Inma Morandeira e Yolanda Vázquez, a partir do vindeiro luns converterá a terraza de verán do programa no estudio principal. Ademais de dar conta de canto aconteza nas rúas, vilas e localidades galegas, o magazine da TVG ofrecerá propostas adaptadas a esta época do ano, como unha rede de correspondentes a pé de costa ou nos espazos máis emblemáticos do verán galego, unha opción diaria para preparar pícnics e unha lembranza do que ocorreu en Galicia en veráns anteriores, entre outras.

No mes de xullo tampouco descansa o programa ‘Luar’, que chegará fiel á súa cita cada venres, a excepción do día 24, para o que a TVG prepara un programa en directo  co obxectivo de dar conta de todo o que aconteza nesa noite dos ‘novos’ Fogos do Apóstolo. O relevo do ‘Luar’ collerao no mes de agosto o espazo ‘Inimitables’, con especiais de música tradicional e de retrousos, entre outras temáticas.

O cine made in Hollywood será outro dos protagonistas do verán da Televisión de Galicia, que na noite dos mércores, despois dun novo capítulo de estrea da serie ‘Do Dereito e do Revés’, programará títulos coma ‘Sully’, ‘O contable’, ‘Animais fantásticos e onde atopalos’, ‘Escuadrón suicida’, ‘O francotirador’, ‘Os xogos da fame’, ‘Kong, a illa caveira’ e ‘Batman contra Superman’, entre outros. A continuación, tamén o mércores á noite, será o momento do cine galego, cos títulos máis destacados dos últimos anos.

Ademais, a canle autonómica manterá os novos programas que estreou o mes de xuño: ‘O sol sae para todos’, un espazo de reportaxes de actualidade, que conta diariamente como os galegos se adaptan á ‘nova normalidade’, e o magazine ‘Que nos pille rebolando!’, que seguirá enchendo de festa e diversión cada tarde de sábado.

A Radio Galega reforza as súas grandes marcas durante o verán

Na Radio Galega, o ‘Galicia por Diante’ manterá o seu formato e duración -de 06.00 a 14.00 h- e a súa dinámica. O tramo magazine contará con novas seccións e colaboradores de verán, entre os que figura a cantante Sabela Ramil e ‘A Profa’, coa sección ‘Curso para neofalantes’. Ademais, haberá puntos de directo en todo o territorio galego e unha hora de humor cada día.

O programa ‘A Tarde’, que manterá o espírito de puntos de directo con reporteiros/as por todo o territorio, colaboracións, humor e cultura, pasa a emitirse de 16.00 a 19.00 h. A esa hora arrancará o ‘Galicia en Goles’ cando haxa competicións de fútbol con equipos galegos durante o mes de xullo. O espazo ‘Pensando en Ti’ emitirase en directo todo o verán de luns a domingo no seu horario habitual, é dicir, de 01.00 a 06.00 h. Tamén continuará, de luns a venres, o ‘Diario Cultural’, con dúas edicións diarias, unha pola mañá e outra pola tarde.

Ademais, a canle pública galega afondará este verán nas sinerxías coa Televisión de Galicia, ao incluír na grella catro programas que foron emitidos no seu día na TVG: ‘Grandes Lugares’, ‘Náufragos’, ‘ADN Galego’ e ‘Tolemias’.

ler máis

As series da TVG 'Matalobos' e 'Hotel Almirante' chegan ao mercado internacional da man da plataforma Olympusat

03/07/2020

A emblemática ficción sobre o narcotráfico en Galicia e a miniserie de época veranse en lingua española nos Estados Unidos, Canadá, Porto Rico e América Latina

As series da TVG 'Matalobos' e 'Hotel Almirante' chegan ao mercado internacional da man da plataforma Olympusat

Santiago, 03.07.2020.-    As series da Televisión de Galicia ‘Matalobos’ e ‘Hotel Almirante’ chegarán ao mercado americano grazas a un acordo co distribuidor británico Videoplugger. A través da plataforma Olympusat, as dúas ficcións veranse en lingua española nos Estados Unidos, Canadá, Porto Rico e América Latina.

Considerada polos responsables de Videoplugger como “a resposta europea á serie ‘Narcos’”, a emblemática ‘Matalobos’, ficción producida por Voz Audiovisual, foi a primeira que tratou a realidade do tráfico de drogas en Galicia e xira arredor dun clan familiar na vila ficticia de Sardiñeira. É unha das series de máis éxito na historia da canle autonómica  e acadou grandes cotas de audiencia cando foi emitida orixinalmente en Galicia.

A miniserie de época ‘Hotel Almirante’, situada nos anos 50 e baseada na novela homónima de Marta Rivera de la Cruz, mestura amor, paixón, traizón e misterio. Esta ficción de Formato Producciones tamén tivo unha grande acollida na súa estrea na TVG.
    
Deste xeito, a Televisión de Galicia segue a estender a lingua e o audiovisual galego polos mercados internacionais, despois da chegada das series ‘Auga Seca’ e ‘Vidago Palace’ á plataforma HBO. Ademais, ‘Tres Camiños’, produción internacional participada pola TVG, poderá verse en Amazon Prime Video a comezos de 2021. E, no ámbito do público infantil, a serie ‘As aventuras de Minchi’ verase nunha plataforma OTT na China. Todas estas accións seguen a estela de ‘O sabor das margaridas’, a primeira serie en galego que chegou a Netflix, onde conseguiu un grande éxito.

ler máis