CRTVG

Buscar

CRTVG Viva

Nena Daconte e Pili Pampín porán a música no 'Bamboleo' deste sábado

27/02/2021

Ademais, a orquestra La Favorita traerá a festa ao estudio do programa cunha selección de temas moi verbeneiros

Nena Daconte e Pili Pampín porán a música no 'Bamboleo' deste sábado

Santiago, 27.02.2021.-   ‘Bamboleo’ (22.05 h) prepara para este sábado unha proposta moi entretida. Xosé Manuel Piñeiro contará nesta ocasión coa presenza de Nena Daconte, nome artístico da cantante madrileña Mai Meneses, que triunfara co éxito ‘Tenía tanto que darte’, un bombazo que interpretará sobre o escenario de ‘Bamboleo’.  Ademais presentará un novo sinxelo, ‘Hojas secas’, en que mestura pop con música electrónica, mentres prepara o seu próximo lanzamento discográfico.  

Tamén formará parte do espectáculo desta noite a cantante Pili Pampín, que levou e leva o nome de Galicia e as súas cancións polos escenarios de medio mundo. Hoxe interpretará entre outros, unha mesturanza dos seus temas máis recoñecidos.

Os colaboradores veñen con ganas de meter en apuros as dúas artistas, que competirán no ‘Sobes ou Baixas’ e nos xogos do programa. Tamara Pérez, Claudio Pan, Javi Varela e Damián están dispostos para todo e ese todo inclúe encontrarse con algunha trasnada do furacán de Arca: Isi.

Ademais, a orquestra La Favorita traerá a festa ao estudio de ‘Bamboleo’ cunha selección de temas moi verbeneiros, mentres que no ‘Dirtidansi’ os espectadores verán dúas exhibicións de jive e rumba-bolero a cargo dunha parella de bailaríns de Teo, campións do mundo: Manel e Bea.

Na sección musical do ‘Agora ou Nunca’ os participantes serán Nerea Iglesias e José Manuel García, que pasarán polo escenario para cantar ‘Proud Mary’, de Tina Turner, e ‘Solo te pido’, de Manolo Escobar.

O karaoke de ‘A Jrileira’ contará coa participación dos clubs deportivos Santiago Black Ravens e Voleibol Calasancias Coruña. Miguel e Jaime, representantes de ambas as dúas entidades, cantarán ‘Amante Bandido’, de Miguel Bosé, e adiviñarán intérpretes coa axuda de compañeiros.

Finalmente, na ‘ITV do Amor’, Ainara xogará contra Julián e tres amigas para intentar adiviñar quen é a súa parella e facerse co premio. Todo é posible na proba máis picante do programa, en que o falar non ten cancelas.

ler máis

Fin de semana polideportiva na CRTVG, con fútbol sala, balonmán, baloncesto, voleibol, hóckey e fútbol

26/02/2021

O sábado comeza a oferta deportiva na G2 e na páxina web co Zaragoza-Burela, da Primeira División de fútbol sala masculino

Fin de semana polideportiva na CRTVG, con fútbol sala, balonmán, baloncesto, voleibol, hóckey e fútbol

Santiago, 26.02.2021.-  Fin de semana polideportiva nos medios públicos galegos, con transmisións de equipos galegos de fútbol sala, balonmán, voleibol, baloncesto, hóckey e fútbol. O sábado, ás 17.00 horas, a G2 e a web da CRTVG achegarán a primeira proposta deportiva, entre o Fútbol Emotion Zaragoza e o Burela Pescados Rubén F. S., correspondente á xornada 22 da División de Honra de fútbol sala masculino. Ambos equipos, situados na parte baixa da táboa, xogarán con intensidade para facerse cos puntos do partido.

A continuación, ás 19.00 horas, ofrecerase unha nova cita de balonmán masculino na Liga Asobal co Frigoríficos Morrazo de Cangas e o C. B. Villa de Aranda como protagonistas. Unha vitoria imprescindible para os dous conxuntos. Mentres que o Cangas asiste a este encontro forte de moral tras vencer no último partido, o conxunto visitante é un rival angustiado por cambiar o seu mal momento e volver sumar.

A maiores, a web da CRTVG tamén transmitirá, ás 19.00 horas, un partido da Superliga masculina de voleibol, entre o Rotogal Boiro V. B. e o C. V. Teruel (en diferido, o domingo pola G2, ás 18.25 h).

O domingo, ás 12.30 horas, os medios públicos galegos volven mudar de disciplina para ofrecer un novo partido de baloncesto na liga LEB Ouro, que disputarán o líder da categoría, o Leche Río Breogán, e o Destino Palencia, tamén nos primeiros postos da táboa.

Pola tarde, o programa ‘A Liga das Cidades’ transmitirá o derbi provincial na Terceira galega, entre o C. D. Arenteiro e o U. D. Ourense (17.00 h). Os anfitrións reciben invictos na casa o equipo da capital, na que será a súa terceira saída seguida. O espazo realizará, amais, un carrusel polos campos da Terceira División galega.

A última transmisión en directo da fin de semana, ás 20.00 horas, corresponderá á OK Liga de hóckey, co partido que enfrontará o CH Palafrugell na casa cun Deportivo Liceo moi forte esta temporada.

ler máis

Melody celebra 20 anos na música con novas cancións en 'Luar', que trae os álbums dos galegos Joel Padín e TNT

26/02/2021

Padín, gañador en 2018 do ‘Pequenos Fenómenos’ na TVG, presenta o seu disco debut, nun espazo en que tamén actuará a orquestra Los Player’s, a Charanga Trébede, Abeleiras e o dúo formado por Christian Escuredo e Manuel DeAndrade

Melody celebra 20 anos na música con novas cancións en 'Luar', que trae os álbums dos galegos Joel Padín e TNT

Santiago, 26.02.2021.-  A música máis actual e os sons tradicionais máis festivos son protagonistas un venres máis en ‘Luar’ (21.55 h). Así, o programa da Galega trae esta noite as novas propostas de Melody, coas que a cantante celebra os seus 20 anos na música. A artista sevillana, que se dera a coñecer con ‘El baile del gorila’, interpretará entre outros temas ‘Las cosas del amor’, unha rumba flamenca e positiva coa que a coñecida artista volve situarse no panorama musical.

Desde Vilagarcía chega hoxe Joel Padín, para presentar o seu álbum debut ‘Aughas mortas’, un proxecto que se compón de 13 pezas tradicionais recollidas polo gaiteiro Carlos Rey e interpretadas por Padín, entre outros músicos. Padín, con só 15 anos, é xa coñecido pola audiencia da Galega tras proclamarse gañador hai uns anos do concurso infantil ‘Pequenos fenómenos’.

O redondelán Tanto Nos Ten (TNT) Música Tradicional Furtiva presentará esta noite en ‘Luar’ o seu novo traballo ‘Cortando fíos’. Este grupo folk, que converte nunha festa cada unha das súas actuacións, combina no seu repertorio temas propios con cancións populares, amais de mesturar pasodobres, muiñeiras, rumbas e outros ritmos bailables, que dan nome ao que a agrupación denomina música tradicional furtiva.
    
O versátil artista ourensán Christian Escuredo e o tamén artista e membro do xurado de ‘Recantos’ Manuel DeAndrade subirán hoxe ao escenario para interpretar a dúo ‘Ti cambiarás’. Amais, contarase coas intervencións da orquestra Los Player’s, da canguesa Charanga Trébede e da agrupación Abeleiras.

Xosé Ramón Gayoso, Patricia F. Santana e Rocío Rodríguez darán paso, amais, a unha nova edición do certame de novos talentos ‘Recantos’, en que competirán Chiña, en representación de Noia-Barbanza, e Fernando Hernández, de Terras da Coruña. Unha edición máis, Gayoso intentará que algún espectador sexa quen de facerse cos 2.500 euros do concurso telefónico. Completa o elenco de convidados o humor dos cómicos Paco e Pepe e os 3 Litos.

ler máis

Este sábado chegan á G2 'Os Bolechas no cole', novo programa para coñecer os proxectos máis sorprendentes e orixinais dos colexios galegos

25/02/2021

Os protagonistas serán os nenos e nenas de Educación Infantil e Primaria e os seus profesores, que amosarán o enorme esforzo que se está a facer nos centros escolares para seguir ensinando con seguridade, alegría e imaxinación

Cada semana Os Bolechas entrarán nas aulas, onde os propios alumnos explicarán o seu traballo, e a emisión rematará cun experimento científico adaptado ás idades do público

Este sábado chegan á G2 'Os Bolechas no cole', novo programa para coñecer os proxectos máis sorprendentes e orixinais dos colexios galegos

Santiago, 25.02.2021.-    Os Bolechas volven ás aulas de Educación Infantil e Primaria, pero este curso entran virtualmente para coñecer como están traballando neste ano tan singular diversos proxectos e temáticas ou celebrando datas significativas, como poden ser o magosto, o Nadal, o Entroido  ou o Día contra a Violencia de Xénero. A partir deste sábado, 27 de febreiro, esta nova aventura dos famosos personaxes creados por Pepe Carreiro, titulada ‘Os Bolechas no cole’, formará parte da faixa educativa matinal da G2 (arredor das 11.00 h).

Ao igual que ‘BraulioTuber,’ este novo programa ten como protagonistas absolutos as nenas e nenos de Educación Infantil e Primaria de toda Galicia e o profesorado, cuxa  participación é esencial para levar a cabo o programa. Grazas a eles poderase ver o enorme esforzo que se está a facer cada día nos centros escolares para seguir ensinando con seguridade, alegría e imaxinación.

A través da segunda canle da Galega, toda a comunidade educativa e as familias poderán ver o gran labor, vital para o noso futuro como sociedade, que se está desenvolvendo nas aulas e sorprenderanse coa cantidade e diversidade de proxectos que se están levando a cabo nas escolas sobre temas do máis variado, con extraordinarias doses de entusiasmo, innovación e enxeño. De aí a aposta dos Bolechas e a TVG por abrir unha canle directa co mundo escolar e amosar a relevante encomenda de quen está formando as futuras galegas e galegos.  

Cun formato moi sinxelo, rápido e fresco, cada aula presentará un tema elixido por eles, que exporán de forma natural, como se fosen auténticos profesionais da comunicación. O programa completarase e cun experimento de Braulio Bolechas, o personaxe máis ‘científico’ da familia, que nos minutos finais porá en práctica un experimento adaptado ás idades do público, co obxectivo de ensinar dunha forma práctica e divertida.

Máis de 20 anos cos Bolechas

Os Bolechas celebraron en 2020 o seu vixésimo aniversario. O primeiro libro da popular familia viu a luz no ano 2000. Desde entón, con case 700 títulos publicados e máis de 1.800.000 exemplares distribuídos, teñen unha verdadeira lexión de fans, que seguen con paixón as súas aventuras, ben sexa a través dos seus libros, da televisión, nas propostas escénicas ou nas saídas á rúa. Ademais, Os Bolechas falan sempre en galego, de forma que contribúen á divulgación e á formación da poboación infantil na lingua propia, sempre mediante o pracer e o divertimento.

ler máis

Celta-Valladolid, Almería-Lugo e a Terceira, no 'Galicia en goles'

25/02/2021

Fin de semana polideportiva na Radio Galega, en que tamén será protagonista das retransmisións o Obradoiro-Tenerife de baloncesto

Celta-Valladolid, Almería-Lugo e a Terceira, no 'Galicia en goles'

Santiago, 25.02.2021.- Febreiro remata con moito deporte na sintonía da Radio Galega. O venres, desde as oito e media do serán, Paco Santos analiza o calendario dos equipos galegos cos protagonistas dos partidos máis importantes ata as 12 da noite na primeira edición de 'Galicia en goles'.

O sábado, desde as 3, Xoán Galán conduce a retransmisión do encontro da Segunda División A entre o Almería e o Club Deportivo Lugo. Ademais, as ligas de baloncesto, fútbol sala e balonmán completarán a programación ata as 11 da noite.

Xa o domingo, o 'Galicia en goles' non descansará nin no xantar, xa que ás 2 da tarde xoga o Celta en Balaídos ante o Valladolid. Antes, desde as 12 do mediodía, o programa atenderá o fútbol de Terceira e o baloncesto, con atención especial ao Obradoiro-Tenerife da ACB. Pola tarde, máis fútbol autonómico ata que comece o faladoiro de especialistas, contra as oito e media do serán.

Durante a fin de semana, a Radio Galega ofrece outros espazos de temática deportiva. O sábado, á 1 do mediodía, Alfonso Pardo visita O Vicedo para presentar a Unión Deportiva Folgueiro. Ás 11 da noite, Rodrigo Pérez Pardo analiza a actualidade do motor no 'Gas a fondo', mentres ás once e media Toni López conversa co padexeiro Luis Fernández no 'Galicia en Toquio'.

Ademais, o domingo 'Ao contraataque' debate ás 11 da noite os resultados acadados polos nosos equipos durante a fin de semana.

ler máis

O actor Antonio Durán 'Morris' e o grupo Boyanka Kostova, protagonistas dun 'Land Rober Tunai Show' dedicado á rapazada

25/02/2021

Da man de dous expertos na materia, Pili Pampín e Octavio Villazala, os espectadores coñecerán os problemas que lle quitan o sono á Xeración Z

O actor Antonio Durán 'Morris' e o grupo Boyanka Kostova, protagonistas dun 'Land Rober Tunai Show' dedicado á rapazada

Santiago, 25.02.2021.-    Este xoves vén un dos grandes pintar a mona no ‘Land Rober Tunai Show’ (21.55 h): o actor Antonio Durán ‘Morris’, nun programa especial para a ‘juventú’. Os espectadores van saber que pasa coa rapazada nestes tempos, e para iso o programa contará con dous expertos na materia: Pili Pampín e Octavio Villazala. Cal dos dous coñecerá mellor os problemas que lle quitan o sono á Xeración Z?

Volve tamén o ‘Pasa pa casa’ especial rapazada. Por se fose pouco, o show presentado por Roberto Vilar pillará a Dosinda na allada, nun encontro cun pretendente no límite do peche perimetral. O garda civil vai ter traballo arreo.

O ramo porao o grupo de trap galego Boyanka Kostova. Quen mellor para marcar o ritmo deste ‘Land Rober’ especial ‘chavalada’?

ler máis

CRTVG.gal ofrece o regreso da Real Filharmonía de Galicia aos escenarios, nun recital con Nuno Coelho á batuta

25/02/2021

Tras a paréntese imposta polas restricións sanitarias, este xoves transmitirase en directo por streaming, ás 20.00 horas, un concerto homenaxe ao compositor Beethoven

CRTVG.gal ofrece o regreso da Real Filharmonía de Galicia aos escenarios, nun recital con Nuno Coelho á batuta

Santiago, 24.02.2021.-  O portal web da CRTVG retoma este xoves a transmisión por streaming dos concertos da presente temporada da Real Filharmonía de Galicia, suspendidos estas últimas semanas por mor das restricións sanitarias. Na sección ‘Fluxos G’, os usuarios de crtvg.gal poderán seguir en directo, a partir das 20.00 horas, o concerto ‘Viva Beethoven’ (http://www.crtvg.es/en-directo/fluxos-g-concerto-da-real-filharmonia-de-galicia), desde o Auditorio de Galicia. O director luso Nuno Coelho debutará coa orquestra galega á batuta, no que será un concerto homenaxe ao compositor Ludwig van Beethoven (1770-1827).

Baixo o título ‘Viva Beethoven’, o concerto comezará coa versión de 1943 de La Noche Transfigurada, de Arnorld Schoenberg (1874-1951), inspirada no poema homónimo de Richard Dehmel. A continuación, os músicos interpretarán a Sinfonía nº 5, unha das composicións máis populares da música clásica.

Nuno Coelho foi o gañador do Concurso Internacional de Dirección da Orquestra de Cadaqués en 2017 e é director convidado da Orquestra Gulbenkian. Nesta temporada, ademais dos concertos en Lisboa, debutará coa Staatsorchester de Hannover, coa Simfónica de Barcelona e Noord Nederlands.

Desde decembro e ata o mes de maio, o portal web da CRTVG está retransmitindo os xoves por streaming os concertos da presente temporada da Real Filharmonía de Galicia, cos que celebra o seu 25 aniversario. Estes recitais só poderán verse en directo, xa que non quedarán posteriormente gravados na web. As retransmisións están dispoñibles na sección ‘FluxosG’ do portal da CRTVG, destacada na súa portada.

ler máis

As radios públicas autonómicas reforzan o seu labor no mundo dixital

24/02/2021

Aumentan as visitas, número de descargas, usuarios únicos e reproducións dos seus programas de radio online e podcasts en 2020
 
A Radio Galega obtivo en 2020 a súa mellor marca histórica. As canles dixitais incrementaron máis dun 10 % o seu impacto global e a súa aposta polos podcast foron claves para acadar grandes datos de audiencia dixital

As radios públicas autonómicas reforzan o seu labor no mundo dixital

Santiago, 24.02.2021.-  As radios son unha parte fundamental dos servizos audiovisuais públicos autonómicos englobados na Federación de Oganismos de Radio e Televisión Autonómicos (FORTA). Nos últimos tempos, este medio tivo que reinventarse e ir adaptándose aos constantes cambios, á nova maneira de consumir e ao crecemento de Internet. Durante o 2020, as radios reforzaron a súa aposta polo mundo dixital, o cal se viu reflectido no éxito e crecemento dos seus contidos online.

2020 foi o ano da información de servizo público. No medio dunha pandemia sen precedentes, os medios públicos galegos responderon dando o máximo servizo público da súa historia, e este traballo viuse recompensado pola sintonía e fidelidade da audiencia. Todas as canles da Corporación melloraron a súa audiencia en 2020. CRTVG pechou o ano cunha cota media anual do 10,6 %, (TVG 9,9 % e a G2 0,7 %, un crecemento dun 6 % respecto de 2019). A Radio Galega obtivo a súa mellor marca histórica, e as canles dixitais incrementaron máis dun 10% o seu impacto global, cun crecemento interanual do portal crtvg.gal do 16 % no número de sesións.

Os cambios na programación de Radio Galega e Radio Galega Música (RGM), e a súa aposta polos destacados e podcast foron claves para lograr uns grandes datos de audiencia dixital en 2020.

En Radio, RGM creceu un 16 % con respecto a 2019 e os podcast de Radio Galega, un 9 %. Os directos disparáronse o catro últimos meses do ano, do mesmo xeito que o seguimento en redes sociais. E RGM iniciou 2021 con cifras altas de consumo, sen deixar de crecer desde abril de 2020 e un pico de consumo en novembro pasado (27.665 usuarios únicos).

Máis visitas, descargas e usuarios nas emisoras de Forta

Pola súa parte, Canal Sur Radio pechou o ano 2020 con 7.039.624 visitas na súa web (un millón de páxinas máis que o ano anterior) e 1,6 millóns de usuarios únicos, o que supoñen 600.000 usuarios máis que en 2019.  

Catalunya Ràdio obtivo 43 millóns de reproducións de audio, a través da súa web, app, podcast e asistentes de voz. Iso representa un incremento do 17 % respecto ao 2019.

Durante este ano, Onda Madrid logrou un crecemento, non só de usuarios, que ascenden a 3.455.141, un 59 % máis que o ano anterior. O número de páxinas vistas da emisora chega ás 7.255.171, o que supón un 41 % de crecemento fronte á tempada anterior.

300.000 persoas conectáronse á radio en directo de À Punt a través da web, as aplicacións móbiles ou dispositivos intelixentes, e consumíronse máis de 120.000 contidos á carta.

As radios do grupo EITB (Euskadi Irratia, Radio Euskadi, Radio Vitoria, Gaztea, Eitb Irratia e Euskal Kantak) continúan crecendo en Internet, con máis de 410.000 usuarios únicos ao mes e cunha audiencia nas súas emisións online de 50.000 usuarios únicos.

Os programas de Radio Castilla-La Mancha obtiveron máis de 350.000 visitas na súa web corporativa en 2020; case 1 millón de reproducións de podcast, como ‘El Dragón invisible’ ou o programa ‘808 Radio’, especializado en música electrónica, que aglutina preto de 300.000 reproducións.

Onda Regional de Murcia está en continua expansión en internet: durante o 2020 a súa web rexistrou unha media de 100.000 usuarios únicos por mes triplicando as cifras do ano anterior, e ao redor de 4,5 millóns de accesos, o que se traduce en máis de 16 millóns de clics entre visitas, descargas e reproducións dos seus contidos, un dato que supón dobrar a cifra de 2019.

Neste sentido, o impacto de Aragón Radio foi sobresaliente durante o último ano, ao superar os 4,5 millóns de audios descargados (o que supón un crecemento do 22 %), un millón máis que o ano anterior.

IB3 Ràdio incrementou a súa presenza online a través de diferentes formatos e canles. Así, a canle balear logrou que os seus usuarios consumisen máis de 234.131 contidos á carta a través das plataformas dixitais. Durante o 2020, un total de 162.697 persoas conectáronse á radio en directo a través da páxina web, a App e a plataforma de podcasting de Ivook e Spotify.

As emisoras en RRSS

Ademais, a presenza das radios públicas en redes sociais é cada vez máis notoria. As emisoras atoparon nas plataformas o aliado perfecto para achegarse ao público máis novo -e máis esixente- captando a atención de novos oíntes.

A Radio Galega obtivo un crecemento do 7 % en Facebook e do 17 % en Twitter, mentres que Aragón Radio conta cunha activa comunidade de seguidores en redes que ascende a máis de 145.000 persoas.

Canal Sur Radio aumentou a presenza das súas emisoras en RRSS: por exemplo, Canal Fiesta Radio ten 388.385 seguidores e é a emisora da casa con maior presenza, converténdose en TT todos os días en Twitter.

Catalunya Ràdio destaca a súa evolución no panorama dixital: entre as súas canles de Youtube, Instagram TV ou Spotify, o número de reproducións ascende a un total de 3 millóns.

As canles de EiTB teñen gran presenza en plataformas como Spotify, Ivoox ou iTunes, así como en Facebook, Twitter e Instagram. Os contidos de Radio Castilla-La Mancha, pola súa banda, superaron as 150.000 reproducións en Youtube durante o 2020. A presenza de ORM en redes sociais tamén creceu de maneira exponencial nos últimos anos, principalmente en Twitter e Facebook, onde a radio autonómica conta con preto de 50.000 seguidores.

As temáticas máis demandadas

Entre as temáticas de máis éxito para os oíntes das radios públicas autonómicas atópanse os programas informativos e os espazos deportivos, mantendo sempre unha presenza relevante os programas de humor e de música.

Entre os andaluces e os valencianos os programas máis destacados son os de humor. Destacan principalmente os programas de actualidade entre os cataláns, vascos e murcianos.

O deporte é outra temática moi demandada, exemplo diso son os programas de Castilla-La Mancha, Canal Sur, Radio Euskadi e Radio Galega. Precisamente, os eventos deportivos do último trimestre incrementaron considerablemente o número de usuarios únicos, tanto nas canles dedicadas ao deporte como na propia emisión de Radio Galega e Televisión de Galicia.

Tamén son os que máis crecen os programas deportivos de Onda Madrid, À Punt Aragón Radio. Ademais, os madrileños apostan por un novo contido que se consome maioritariamente a través da web, relacionado coas ofertas de emprego e que resolve dúbidas laborais por parte do SEPE.

ler máis

A gañadora de 'Come a Comarca. As Batallas' sairá esta noite da gran final entre Terra de Melide e a Terra Chá

24/02/2021

A maior competición gastronómica de Galicia despídese cun programa (23.30 h) cheo de emoción, cun menú propio dunha estrela Michelín e con esixentes retos culinarios

A gañadora de 'Come a Comarca. As Batallas' sairá esta noite da gran final entre Terra de Melide e a Terra Chá

Santiago, 24.02.2021.-     A final do norte entre os coruñeses da Terra de Melide e os lucenses da Terra Chá, pon hoxe o punto e final a ‘Come a Comarca. As Batallas’, a competición gastronómica que mediu 16 equipos comarcais, representados por cinco cociñeiros cada un, na Televisión de Galicia.

No programa desta noite haberá un menú propio dunha estrela Michelin, produtos tradicionais da nosa terra, retos culinarios, etc. Todo nunha proba contra o reloxo en que un xurado decidirá nunha cata a cegas cal é a comarca que mellor cociña nas provincias da Coruña e Lugo.

Pedro Coego, do Recuncho do Convento, á fronte dos melidenses, e José Luis Álvarez ‘Bouso’, de O Castro, na Pastoriza, liderando os chairegos, deixarán os seus restaurantes e porán o brazalete de capitán de equipo para conseguir xunto cos seus compañeiros o premio final. O orgullo comarcal está en xogo, pero tamén 20.000 euros, 15.000 para os gañadores e 5.000 para o equipo finalista.           

ler máis

A Banda da Loba, protagonista dun novo concerto do ‘Galicia Emerxe’, esta noite na G2

24/02/2021

Xiana Lastra, Andrea Porto, Marcela Porto, Inés Mirás e Estela Rodríguez son as artífices deste grupo, que mestura pop, blues, folk, rock e sons tradicionais

A Banda da Loba, protagonista dun novo concerto do ‘Galicia Emerxe’, esta noite na G2

Santiago, 24.02.2021.-   A Banda da Loba é o novo grupo que se sobe esta noite ao escenario do ciclo ‘Galicia Emerxe’ e que ofrece a G2 a partir das 23.25 horas. Esta formación galega, integrada por cinco mulleres que uniron as súas traxectorias individuais para crear un proxecto colectivo, mestura nas súas propostas pop, blues, folk, rock e sons tradicionais, creando un estilo musical singular e heteroxéneo. Cunha duración de 40 minutos, este concerto estará dispoñible na web dos medios públicos galegos unha vez finalizada a súa emisión pola segunda canle da Galega e o sábado poderase ver na TVG (10.40 h) amais de escoitarse tamén en Radio Galega Música (22.00 h).

Xiana Lastra, Andrea Porto, Marcela Porto, Inés Mirás e Estela Rodríguez publicaron o primeiro e recoñecido álbum de A Banda da Loba, ‘Bailando as rúas’, en 2017. No seu repertorio, inclúen temas propios e outros baseados nas letras de autores galegos como Celso Emilio Ferreiro e Manuel María ou Rosalía de Castro, e os poemas contemporáneos de Rosalía Fernández e Celia Parra.

No ciclo ‘Galicia Emerxe’, conformado por un total de 50 concertos de destacados artistas e grupos galegos, gravados no Museo Centro Gaiás da Cidade da Cultura, contarase nas vindeiras semanas coa música de Sés, Luar na Lubre, Wöyza, Budiño, Rodrigo Romaní, Novedades Carminha, Triángulo de Amor Bizarro, Susana Seivane, Uxía, Eladio y los Seres Queridos e De Vacas, entre outros.

A CRTVG asinou un convenio coa Axencia Galega de Industrias Culturais (Agadic) para difundir o ciclo ‘Galicia Emerxe’ no exercicio do seu papel como servizo público e co afán de apoiar o sector musical e de contribuír a visibilizar o seu traballo.

ler máis