CRTVG

Buscar

CRTVG Viva

No capítulo desta noite de 'Serramoura', Marga ten que vixiar na súa casa a Brais, a única testemuña do asasinato de Petrov

17/02/2019

Despois da insistencia de Hugo, Gloria volve á vila, pero o seu regreso coincide coa desaparición de Evaristo (22.00 h.)

No capítulo desta noite de 'Serramoura', Marga ten que vixiar na súa casa a Brais, a única testemuña do asasinato de Petrov

Santiago, 17.02.2019.-  A protección de Brais, a única testemuña que pode declarar contra Micaela polo asasinato de Petrov, é a prioridade para o cuartel de ‘Serramoura’ no capítulo desta noite. Por iso, Tomás non dubida en encargar a misión a Marga, que terá que vixiar a Brais na súa propia casa. Co que a Garda Civil non conta é con que Brais aproveitará a súa estancia na casa de Marga para facer negocios con Micaela e os seus.

Mentres tanto, Evaristo esperta no monte cunha ferida na cabeza e ao lado do corpo sen vida de Daniel. Sen tempo que perder, avisa a Tomás do acontecido, pero cando a Garda Civil chega ao monte non hai rastro de Evaristo, polo que o cuartel pon en marcha un dispositivo de busca.

A insistencia de Hugo para que Gloria volvese á vila fixo efecto. Gloria está de volta, pero o momento non é o mellor. Con Evaristo desaparecido, decide buscar pola súa conta e empeza por facer unha visita á casa de Teresa, onde atopará unha desagradable sorpresa de benvida.

ler máis

O ‘Aquí Galicia’ dá un salto ao Principado de Asturias para dar a coñecer a riqueza natural e cultural de Vegadeo

16/02/2019

O espazo (16.20 h.) continúa así a súa traxectoria viaxeira a vilas veciñas, que xa fixera anos atrás ás cidades portuguesas de Chaves, Valença do Minho ou Braga

 

O ‘Aquí Galicia’ dá un salto ao Principado de Asturias para dar a coñecer a riqueza natural e cultural de Vegadeo

Santiago, 16.02.2019.- Ao igual que xa fixera anos atrás visitando as cidades portuguesas de Chaves, Valença do Minho e Braga, o ‘Aquí Galicia’ dá agora un salto ás tamén terras veciñas do Principado de Asturias, máis concretamente, a Vegadeo ou A Veiga, como se coñece a localidade en lingua eonaviega -galego-asturiana-, separada polo río Eo dos municipios galegos de Trabada e Ribadeo.

Para coñecer mellor Vegadeo / A Veiga, ‘Aquí Galicia’, capitaneado por Lucía Rodríguez, Juan Fuentes e Bernardo Montaña, realizará un percorrido polo patrimonio turístico e cultural da zona. Visitaranse pazos e casonas, a súa casa consistorial e o Camiño do Norte, etapa do Camiño de Santiago que vai desde Castropol ata Trabada e atravesa a vila da Veiga, e que está declarada Patrimonio da Humanidade pola Unesco.

O río Eo, o auténtico protagonista destas terras, é tamén o centro do deporte local. Neste senso, o programa acompañará os regatistas do club de remo da Veiga, algúns deles astur-galaicos. O ‘Aquí Galicia’ tamén dará a coñecer a proposta para que a reserva da biosfera formada polo río Eo, Oscos e terras de Bourón, sexa declarada Patrimonio da Humanidade. Os espectadores quedarán abraiados polas espectaculares imaxes e pola riqueza natural, paisaxística e de flora e fauna que comparten os concellos de Ribadeo e A Veiga.

Un equipo do programa andará, por outra parte, tras as pegadas dos estraperlistas que pasaban os produtos de Galicia a Asturias evitando os camiños principais. Este percorrido pódese facer hoxe en día a través dunha ruta de sendeirismo circular que discorre polas beiras do río Eo. Contará, amais, con testemuñas da época que transportaban trigo e café.

Continuando a ruta por estas terras veciñas, o programa interesarase por unha das industrias máis potentes que houbo na zona, a da minería. Agora, un proxecto recupera once quilómetros do histórico trazado ferroviario vencellados a estas minas de ferro. Para percorrer esta denominada ‘Vía Verde do Eo’ comezarase nos altos fornos de limonita da Pontenova. No seu curso atravesaranse varios túneles húmidos e pontes colgantes ata chegar ao lugar do Cairo e San Tirso de Abres, meta da Vía Verde.

Outro dos temas que se abranguerán é a celebración do Festival Astur-Galaico, en que respectivas asociacións de Mondoñedo e de Castropol están metidas de cheo na organización da súa cuarta edición.

No apartado gastronómico, o espazo farase eco das Xornadas Gastronómicas da Faba da Veiga e dos doces e sobremesas máis representativas da zona.

Hoxe amenizará o tempo do ‘Aquí Galicia’ a orquestra asturiana Grupo Tekila; o ovetense Grupo Beatriz; a banda de gaitas O Penedón, de Castropol; a formación de música tradicional Marbadás, de Ribadeo, amais tamén dunha exhibición de bailes latinos a cargo da escola Hover Cross.

    


ler máis

Soraya, a raíña do pop-dance español, fará vibrar os espectadores de 'Bamboleo' coa súa potente voz

16/02/2019

O espectáculo conducido por Lucía Regueiro (22.00 h.) estará amenizado durante toda a noite pola orquestra Ciclón e recibirá a visita dos bailaríns portugueses Sergio e Rita

Soraya, a raíña do pop-dance español, fará vibrar os espectadores de 'Bamboleo' coa súa potente voz

Santiago, 16.02.2019.-  O programa ‘Bamboleo’ contará este venres coa presenza da cantante estremeña Soraya, a raíña do pop-dance español, que, tras unha dilatada carreira musical, presenta o seu último sinxelo, 'Yo brindo', unha canción chea de matices folclóricos que supón unha homenaxe á súa terra.

Ademais da potente voz de Soraya, o espectáculo da TVG conducido por Lucía Regueiro estará amenizado durante toda a noite pola orquestra Ciclón e recibirá a visita dos bailaríns portugueses Sergio e Rita, que realizarán unha exhibición.

Polo demais, 'Bamboleo' ofrecerá este sábado as súas seccións habituais, entre as que se atopan ‘Agora ou Nunca’, onde compiten dous cantantes noveis; ‘A ITV do amor’, onde un concursante terá que adiviñar cal é a verdadeira parella dunha persoa a partir de certas probas; ‘A Jrileira’, con dúas persoas competindo coas súas voces no karaoke, ‘Dirtidansi’ e ‘Sobes ou baixas’.

ler máis

Celta - Levante e Deportivo- Nástic, encontros máis destacados no deporte da Radio Galega esta fin de semana

16/02/2019

As ondas pública galegas tamén narrarán o Mallorca - Lugo e o derbi pontevedrés entre o Celta B e o Pontevedra

Celta - Levante e Deportivo- Nástic, encontros máis destacados no deporte da Radio Galega esta fin de semana

Santiago. 16.02.2019.-  O ‘Galicia en Goles’ comezará este sábado ás 12.50 horas. Desde Balaídos, a Radio Galega retransmite o partido de Primeira División entre o Celta de Vigo e o Levante. O equipo de Cardoso necesita a vitoria para escapar da zona perigosa, da que está a un só punto dos postos de descenso. O seu rival tamén pelexa polo mesmo obxectivo e na actualidade está situado  tres puntos por riba do Celta.

A partir das 15.00 h., o programa conectará coa sala de prensa e coa zona mixta para escoitar os protagonistas, antes de conectar con Riazor, onde continuará a sesión continua de fútbol profesional co Deportivo da Coruña - Nástic de Tarragona, de Segunda División. Na táboa clasificatoria hai un abismo entre un e outro equipo, xa que o Deportivo é terceiro e o Nástic é o pechacancelas. Así e todo, a mensaxe do vestiario é de prudencia para evitar ceder puntos como sucedeu hai dúas semanas ante o Tenerife.

ler máis

Sábado de fútbol sala na tvG2, que tamén ofrecerá o mellor fútbol de Segunda B o domingo

15/02/2019

O encontro polo liderado da Segunda División entre o Burela e o Betis e o Parrulo- Valdepeñas de Primeira División, principais oferta da xornada

Sábado de fútbol sala na tvG2, que tamén ofrecerá o mellor fútbol de Segunda B o domingo

Sábado, 16.02.2019.-   A CRTVG segue tendo unha fin de semana máis o mellor deporte entre as súas principais ofertas. O sábado manda o fútbol sala, con dous partidos consecutivos de Primeira e Segunda División.

A primeira cita será as 17.00 horas, en directo pola tvG2, co partidazo entre o Burela Pescados Rubén e o Real Betis. O equipo galego, líder da categoría, enfróntase ao segundo clasificado, con tres puntos de vantaxe na táboa. O pavillón de Vista Alegre acollerá o mellor partido da xornada, entre os dous principais candidatos ao ascenso.

A continuación segue o mellor fútbol sala, neste caso de Primeira División. A partir das 19.00 horas, Parrulo Ferrol – Viña Albali Valdepeñas, partido crucial para as aspiracións de ambos os dous conxuntos, situados preto da zona de descenso e pegados na clasificación. O encontro poderase seguir en directo na tvG2 e na web da CRTVG.

ler máis

Estreado con éxito nas redes sociais o proxecto Medio Bolo da RG, cun primeiro concerto de Baiuca e Aliboria

15/02/2019

A emisora difundirá un concerto ao mes baixo estar marca, ademais doutros concertos de longa duración dos programas ‘Estudio 3’ e ‘Notas de Jazz’

Esta primeira entrega foi seguida por 6.000 persoas

Estreado con éxito nas redes sociais o proxecto Medio Bolo da RG, cun primeiro concerto de Baiuca e Aliboria

Santiago, 15.02.2019.-     A Radio Galega estreou con éxito o mércores, Día Mundial da Radio, o proxecto Medio Bolo, co concerto do proxecto de fusión de Baiuca e Aliboria, que foi seguido nas redes sociais por case 6.000 persoas. Medio Bolo é un espazo de concertos de curta duración gravados no estudio de produción da emisora en San Marcos ou ben en salas de toda Galicia, e que se difunden nas redes sociais da emisora pública. Posteriormente son colgados na web da Radio Galega e en diariocultural.gal.

Así mesmo, as redes da Radio Galega emitirán proximamente o concerto de Heredeiros da Crus, gravado no estudio de produción da RG, baixo o paraugas do programa ‘Estudio 3’, de Ricardo Alonso.

Outra das liñas da estratexia musical da Radio Galega consiste na emisión de actuacións gravadas en salas, como serán as do grupo de jazz contemporáneo Sumrrá, o proxecto Valentín Caamaño Cuarteto e o guitarrista Marcos Teira.

A través de Medio Bolo e dos concertos dos programas ‘Estudio 3’ e ‘Notas de Jazz’, a Radio Galega quere crear mensualmente espazos de música en directo compartidos co público nas redes sociais e tamén xerar contidos para a canle dixital do ‘Diario Cultural’, en que se poden visionar todos os concertos unha vez estreados (diariocultural.gal).

#Cultura365 na Radio Galega

A Radio Galega emite información, cultura e entretemento a través de dúas canles analóxicas, Radio Galega e Radio Galega Música, renovada xustamente hai un ano, e dúas dixitais, Son Galicia Radio, de música galega, e Radio Picariña, de música infantil. A RG achégase á audiencia cada vez máis desde as súas novas canles dixitais, como a do ‘Diario Cultural’, www.diariocultural.gal, que desde a súa creación, en novembro de 2018, incrementou a audiencia da web da Radio Galega nun 279 % de páxinas vistas.

Desde setembro pasado, a Radio Galega acometeu unha remodelación da súa programación, con máis información, máis cultura e a renovación dos colaboradores e colaboradoras dos seus espazos. Ademais destes cambios, apoiados pola audiencia, é salientable a clara interactividade co resto das canles da Corporación, tanto na televisión coma en dixital, cunha renovada oferta de contidos á carta nesas canles dixitais e con plans integrais coma #Cultura365. Así mesmo, a RG renovou a súa páxina web en novembro de 2018.

ler máis

O venezolano Carlos Baute, un dos grandes da música latina, e o ourensán Cepeda, un dos novos valores do panorama español, convidados en 'Luar'

15/02/2019

O programa homenaxeará esta noite a súa colaboradora Áurea, recentemente falecida,  e contará tamén coas actuacións de Nerea, Leilía, a orquestra Triunfo e os Coribantes de Buchabade

O venezolano Carlos Baute, un dos grandes da música latina, e o ourensán Cepeda, un dos novos valores do panorama español, convidados en 'Luar'

Santiago, 15.02.2019.-    Na edición deste venres, o programa ‘Luar’ recibirá a visita dun dos grandes da música latina, o venezolano Carlos Baute, un dos artistas chegados da outra beira do Atlántico con máis éxito no noso país. Con preto de dous millóns de discos vendidos e unha morea de premios ás súas costas, é tamén un dos artistas máis queridos polo público galego.

Tamén estará hoxe no escenario o cantante e compositor ourensán Cepeda, coñecido pola súa participación en ‘Operación Triunfo’. Despois de lanzar o seu primeiro sinxelo e alcanzar o número 1 nas listas de vendas de España, disponse a publicar o seu primeiro álbum, que sairá á venda en xuño e que será un traballo prometedor, creativo e que permita comprender mellor a súa evolución artística. Conterá cancións propias e tamén composicións antigas que permitirán coñecer como era ese artista anónimo e tímido que escribía por puro pracer.

O espazo presentado por Xosé Ramón Gayoso e Patricia Fernández Santana contará coa presenza doutra artista xurdida da factoría OT: a cantante, compositora e actriz catalá Nerea Rodríguez.

Por outro lado, os espectadores de ‘Luar’ vivirán hoxe un momento moi emotivo, xa que o programa homenaxeará a súa colaboradora Áurea, falecida o pasado decembro, coa actuación de Dignas do Querer, grupo de pandeireteiras ao que pertencía.

Dentro do cartel de actuacións musicais tamén destacan o grupo de gaitas Coribantes de Buchabade, chegados dende Ponte Caldelas e con máis de 100 compoñentes; Leilía, popular grupo galego de seis voces femininas que cantan e tocan música tradicional coa pandeireta; a orquestra Triunfo; a Banda de Música de Vilaboa; o artista Ducho Vidal, e a formación Manteos y Monteras de Aliste, procedente dunha das comarcas de Zamora que garda un folclore máis rico e con máis personalidade.

Finalmente, no tempo de ‘Recantos’, chegará o momento de que María do Mar, representante da comarca Terras de Pontevedra, e Ena, procedente de Terras do Eume, demostren o seu talento no escenario.

ler máis

Luís Zahera vén esta noite dar a nota ao 'Land Rober Tunai Show' tras gañar o Goya

14/02/2019

A gaiteira Susana Seivane participará no ‘Quen vés sendo?’, mentres que Tony Lomba e Elio dos Santos poranlle ritmo a este Día dos Namorados

Luís Zahera vén esta noite dar a nota ao 'Land Rober Tunai Show' tras gañar o Goya

Santiago, 14.02.2019.-  Este xoves chega a revolución personalizada ao ‘Land Rober Tunai Show’ (22.15 h.). O actor Luís Zahera, que acaba de conseguir un Goya ao mellor actor de reparto por ‘El Reino’, vén dalo todo, tanto que os espectadores ata o verán nunha misión un pouco ilegal. Esta noite volve tamén un dos xogos máis perigosos: ‘Mira quen chama!’, en que tamén participará o actor. Despois da chamada de Isabel Pantoja... todo pode pasar! E, ademais, hoxe chega a edición ‘Mira quen chama! Celebrity!’.

Ao show únense tamén Tony Lomba e Elio dos Santos para poñer ritmo a este xoves, Día dos Namorados. O amor vai estar moi presente nunha noite en que David Perdomo terá que someterse a unha vacina un tanto especial. Ademais, chega unha nova entrega de ‘As mañás de Marilú’. Con que novidade sorprenderá desta vez o alcalde de Pazos?

Por se fose pouco, o programa da TVG ofrecerá unha nova edición do ‘Quen vés sendo?’, onde xogará con Susana Seivane. A gaiteira deberá enfrontarse ao castigo máis suculento do ‘Land Rober’: o ovo cru con vinagre. Quen será a señora que sorprenderá desta vez?

ler máis

O programa da TVG 'O Mellor Cocido do Mundo' gaña a XXV edición do Premio de Xornalismo Gastronómico Álvaro Cunqueiro

13/02/2019

Fai un completo percorrido pola historia desta preparación centenaria, os seus ingredientes, en que circunstancias hai que comelo e a festa que se forma arredor del

Os galardoados recollerán os premios no ‘Luar’ Especial do Cocido que a Televisión de Galicia ofrecerá en directo o 22 de febreiro

O programa da TVG 'O Mellor Cocido do Mundo' gaña a XXV edición do Premio de Xornalismo Gastronómico Álvaro Cunqueiro

Santiago, 13.02.2019.-     O programa gastronómico da Televisión de Galicia ‘O Mellor Cocido do Mundo’ proclamouse como a obra gañadora da XXV edición do Premio de Xornalismo Gastronómico Álvaro Cunqueiro, certame que organiza cada ano o Concello de Lalín como actividade complementaria da Feira do Cocido e que ten a finalidade de fomentar a difusión da cociña galega e da gastronomía en xeral.

Este programa de televisión, producido por Setemedia, forma parte dunha serie sobre algúns dos máis salientables pratos e produtos da gastronomía galega e que neste caso se dedicou de forma monográfica ao cocido. De maneira amena e didáctica, ‘O Mellor Cocido do Mundo’, emitido en febreiro de 2018, fai un completo percorrido pola historia desta preparación centenaria, en que circunstancias hai que comela, a festa que se forma arredor dun prato de cocido e os produtos que forman parte do mesmo, e fai especial incidencia en Lalín e na súa Feira do Cocido, declarada Festa de Interese Turístico Nacional.

Trátase dun entretido espazo que, ao longo dunha hora, viaxa por boa parte da xeografía galega para descubrir os segredos dun dos grandes emblemas da nosa cociña. Partindo do tradicional cocido galego, o programa permite coñecer as interesantes historias dunha chea de personaxes, entre os que se atopan gandeiros, agricultoras, cociñeiros, músicos, nenos e maiores, que van dando a coñecer cada un dos factores que teñen relación con este prato e os seus ingredientes.

O segundo premio recaeu no libro ‘Estrelas da despensa galega e 67 receitas con historia e sabor’, publicado pola editorial Galaxia e do que é autora Carina Regueiro. Na categoría académica, o xurado recoñeceu o proxecto ‘Raíces Doces’, presentado por cinco alumnos da Facultade de Ciencias da Comunicación de Santiago.

Nesta edición, o xurado do Premio de Xornalismo Gastronómico Álvaro Cunqueiro estivo composto por representantes do mundo do xornalismo de recoñecido prestixio, como os decanos das facultades de Comunicación de Galicia; o vicedecano do Colexio de Xornalistas de Galicia, Xosé Manuel Pereiro; a xornalista da revista especializada ‘La Alacena Roja’ Martina Vicente e o director do xornal dixital ‘Galicia Confidencial’, Xurxo Salgado.

Os galardoados recollerán os premios no ‘Luar’ especial do Cocido que a Televisión de Galicia ofrecerá en directo o venres 22 de febreiro.

ler máis

Carlos Blanco únese esta noite ao elenco do 'Malo será!' desde o Salón Teatro de Lalín

13/02/2019

Dúas novas horas de entretemento e humor coas que se achega a televisión aos teatros de todo o país, grazas á participación dos mellores cómicos da escena galega

Carlos Blanco únese esta noite ao elenco do 'Malo será!' desde o Salón Teatro de Lalín

Santiago, 13.02.2019.-  Un mércores máis, ‘Malo será!’ (22.05 h.) proponlles aos espectadores da Televisión de Galicia dúas horas de entretemento e risas ás gargalladas grazas a un novo espectáculo de humor, que se desenvolverá desde o Salón Teatro de Lalín. Esta noite, sumarase ao elenco de actores e actrices habitual do programa o coñecido cómico e actor Carlos Blanco.

O espazo itinerante que achega a televisión aos teatro de todo o país, baixo o liderado de Marta Doviro, ofrecerá na capital do Deza variados sketchs de humor protagonizados polos mellores cómicos da escena galega. Así, hoxe coñecerase como é unha gardería para adultos, asistirase a unha terapia moi particular ou a unha entrevista de traballo moi pouco común, e mesmo a audiencia será testemuña dun intercambio de parellas no Club Swinger.

Amais da colaboración especial de Carlos Blanco, ‘Malo será!’ conta coas interpretacións de Marcos Pereiro, Federico Pérez, Lucía Veiga, Cristina Andrade, Oswaldo Digón, Sara Fandiño e Sabela Hermida.

ler máis