CRTVG

Buscar

CRTVG Viva

Regresan os 'Recantos de Ouro' a 'Luar', nunha edición en que soarán os novos ritmos da gaiteira Susana Seivane

29/05/2020

A música galega é protagonista desta edición tamén coas actuacións de Acordeireta, de Ghaveta e Lagharteiras, de Chingla e do Grupo La Quinta Máquina-Riazor

Regresan os 'Recantos de Ouro' a 'Luar', nunha edición en que soarán os novos ritmos da gaiteira Susana Seivane

Santiago, 29.05.2020.-  Susana Seivane volve esta noite a ‘Luar’ cos temas do seu último disco, ‘Fa’. A gaiteira ofrecerá algunhas das propostas positivas que forman parte deste álbum, como ‘Souris à la Vie’, todo un canto á felicidade e á vida. Xosé Ramón Gayoso e Patricia F. Santana recibirán tamén sobre o escenario os concursantes de ‘Recantos de Ouro’ e aos dous recanteiros que intervirán hoxe: Maite, representante da zona Noia-Barbanza, e A China, procedente de Arousa.

A música galega continuará sendo protagonista desta edición, en que se poderá gozar cos sons de Acordeireta, dúo formado por Patricia González –voz e pandeireta- e Alejandro Balbuena –acordeón, bombo e voz-; de Ghaveta e Lagharteiras, coas súas interpretacións explosivas de música folk, e do focense Chingla, que cantará ‘Eu quixera’, tema dedicado á súa localidade. Completa o elenco o Grupo La Quinta Máquina, formación cunha gran traxectoria na verbena galega.

ler máis

Catro películas sobre peregrinos de toda condición, dispoñibles desde este xoves no ciclo en aberto 'Carteleira G'

28/05/2020

Durante os vindeiros sete días, poderán verse na páxina web da CRTVG os filmes ‘The Way / O Camiño’, ‘A rosa de pedra’, ‘A sinapse do Códice’ e ‘9 ondas’

Catro películas sobre peregrinos de toda condición, dispoñibles desde este xoves no ciclo en aberto 'Carteleira G'

Santiago, 28.05.2020.-    A páxina web da CRTVG propón esta semana un ciclo cinematográfico en aberto relacionado coa identidade persoal e a procura de camiños distintos aos que habitualmente seguimos na nosa vida cotiá. É lóxico que o cinema galego tratase con profusión o tema das peregrinaxes e por iso en ‘Carteleira G’ estarán dispoñibles desde este xoves e durante os vindeiros sete días catro películas sobre peregrinos de toda condición.

A primeira delas, como non podía ser doutro xeito, é ‘The Way / O Camiño’ (Emilio Estévez, 2010). Martin Sheen é o nome artístico de Ramón Estévez, actor americano de sona- coñecido por, entre outros éxitos, ‘Apocalypse Now’, ‘Wall Street’ ou a serie ‘El ala oeste de la Casablanca’, fillo de nai irlandesa e pai galego de Parderrubias (Salceda de Caselas). Sheen interpretou esta película como unha homenaxe aos seus devanceiros e contou co apoio dun dos seus fillos, Emilio Estévez, que conserva para a súa carreira artística o apelido do pai e do avó. De feito, ademais de contar a crónica do Camiño de Santiago, o filme fala tamén da relación paterno filial, pois narra a viaxe dun médico norteamericano para entender os motivos que impulsaron o seu fillo a emprender un camiño onde atopou a morte accidental. ‘The Way’, a máis coñecida das películas que se teñen feito sobre a peregrinaxe a Compostela, fixo moi popular o Camiño de Santiago nos Estados Unidos e moitos norteamericanos din telo feito tras descubrilo na película.

Tamén figura no ciclo desta semana ‘A rosa de pedra’ (Manuel Palacios, 1999), gravada para conmemorar o Xacobeo do 99. Está baseada nun relato de Manolo Rivas que o propio autor adapta nunha historia de auto coñecemento vivida por tres mulleres, unha executiva de moda -Marta Belaustegui-, unha fotógrafa -Paulina Gálvez- e unha modelo -Laura Ponte-, que ven como a cidade compostelá transforma a perspectiva das súas vidas. Quico Cadaval, Roberto Sánchez ‘Luna’, Vicente de Souza e Xosé Manuel Olveira ‘Pico’ completan o elenco. A música é de Berrogüetto e de Leilía.

ler máis

Volve o público ao 'Land Rober Tunai Show' para ser protagonista con Luís Iglesia, Antonio Resines e Roi Méndez

28/05/2020

Coa chegada dos 40 primeiros pintamonas ao estudio regresan tamén os retos disparatados do programa e, amais, unha nova historia dos mariscadores

Volve o público ao 'Land Rober Tunai Show' para ser protagonista con Luís Iglesia, Antonio Resines e Roi Méndez

Santiago, 28.05.2020.-   O ‘Land Rober Tunai Show’ prepárase este xoves para recibir, por todo o alto, os 40 primeiros pintamonas da nova normalidade. Volve o público ao estudio do programa, iso si, pouco, pero ansioso! Son os 40 da corentena! E con eles, regresan os retos de ‘Land Rober’, que sorprenderán aos espectadores con todo o que lles vai pasar.
 
Ao show únese o actor galego Luis Iglesia e tamén haberá novas doutro comediante bo, Antonio Resines. A saber que lle pasaría na corentena… vindo del, calquera cousa! E por se fora pouco, súmase á tolemia o cantante Roi Méndez, que presentará o seu novo tema ‘Aviones de papel’.
 
Nesta Fase 2 volven, ademais, as historias da familia de mariscadores máis disparatada. Ao parecer Josito tomou ao pé da letra o de ir á praia na desescalada… como acabaría este falcatrueiro?
 
Isto e moito máis con Roberto Vilar, Eva Iglesias e Luis Zahera este xoves, a partir das 22.15 horas na Televisión de Galicia.

ler máis

Os novos formatos creados polas autonómicas na corentena conquistan a audiencia

27/05/2020

Algúns espazos da programación dos medios englobados en FORTA que xurdiron durante o confinamento tiveron tan boa acollida que terán continuidade na grella

As radios e televisións públicas autonómicas seguen apostando pola innovación e adaptándose durante a desescalada para ofrecer o mellor servizo aos cidadáns

Os novos formatos creados polas autonómicas na corentena conquistan a audiencia

Santiago, 26.05.2020.- Un grande aumento de programas en directo, unha maior proximidade coa audiencia e a adaptación de programas e formatos existentes. Estes son algúns dos cambios que as radios e televisións públicas autonómicas, englobadas en FORTA, tiveron que realizar ante as novas necesidades de información e entretemento desencadeadas pola crise sanitaria da Covid-19.  

ler máis

Nace unha nova estrela e xorde o amor en 'Pratos Combinados', onde fai un cameo Manuel Manquiña

27/05/2020

A TVG ofrece esta noite unha nova maratón de catro capítulos da primeira telecomedia galega

Nace unha nova estrela e xorde o amor en 'Pratos Combinados', onde fai un cameo Manuel Manquiña

Santiago, 27.05.2020.-   O Paspallás, pintoresco personaxe do famoso Bar Suízo interpretado polo actor galego Serxio Pazos, e o tío Antón (Antonio Durán ‘Morris’) van ser os protagonistas destacados da primeira entrega deste mércores de ‘Pratos Combinados’ (22.25 h) Neste capítulo, que leva por título ‘Escola de sedutores’, o entrañable e ocorrente Paspallás, que tolea por unha rapaza, vaille pedir consellos ao tío Antón para que lle revele algúns dos seus segredos sobre como conquistar unha muller. Antón dáse por moi entendido na materia, pero un cúmulo de despropósitos vainos levar a unha situación ridícula.

O maratón desta noite continuará coa emisión de ‘Unha nova estrela’, onde o local familiar ten que pechar como consecuencia dunha inspección municipal. Con todo, o sempre ocorrente tío Antón vai saber converter esta desgraza nunha oportunidade para facer un bo negocio. Un produtor televisivo, interpretado polo coñecido actor Manuel Manquiña, alugará o local para rodar un anuncio, feito do que Rosalía sacará bo partido ao revelarse como unha auténtica estrela do espectáculo.

De seguido, en ‘Ola, Melanie!’, o Bar Suízo e a familia Pereira seguirán producindo os sorrisos dos espectadores. Miguel regresa dos Estados Unidos, onde realizou un curso de inglés, e chega acompañado dunha rapaza americana que coñeceu durante a súa estancia no estranxeiro. O contraste de costumes dará lugar a algunhas situacións cómicas, ao tempo que  Miguel descobre xunto a Melanie o amor.

A avoa Carme é a protagonista de ‘Adiviña quen vén cear’, a última entrega desta noite. A nai de Miro Pereira recibe a visita de Valentín, un antigo amor da mocidade, e con el veñen novas ilusións. Así que Carme decide preparar para el unha cea íntima no Bar Suízo e para poder quedar soa no bar terá que recorrer a algunhas pequenas mentiras que complicarán a situación ata límites insospeitados. Neste episodio, o artista Xulio Lago interpretará o namorado Valentín.

ler máis

Na reunión desta semana no 'Larpeiros Social Club', poranse en valor os produtos da horta

26/05/2020

Contarán coa presenza dun peixeiro que fará unha exhibición da súa arte preparando un mero, mentres que Merchi fará un pastel de figos asados e Adrián irá ata Lugo para facerse cunha fabas frescas de Lourenzá (22.25 h)

Na reunión desta semana no 'Larpeiros Social Club', poranse en valor os produtos da horta

Santiago, 26.05.2020.-    Hai hortalizas de froito, como os cabazos ou os pementos, e tamén de folla, como as espinacas ou os grelos. Non se deben esquecer as soterrañas, como as patacas ou allo porros, e os legumes, como as fabas...Hai zonas enteiras de Galicia famosas polas súas hortas, como o Salnés, Betanzos, as Mariñas ou as veigas da Ulla.

Hoxe, no ‘Larpeiros Social Club’, porán en valor todos estes productos e cociñarán xunto con Kike e mais Eloy un par de pratos con sabor a horta. Ademais, contarán coa visita dun peixeiro como quedan poucos, que fará unha exhibición da súa arte preparando un mero que fará as delicias de todos os ‘Larpeiros’.

Ademais, para que non falte detalle, Merchi preparará un deses pasteis que a fixeron famosa, con figos asados, requeixo e crema pasteleira, entre outras delicias. Pola súa parte, Adrián viaxará ata Lugo para levar ao club unhas fabas frescas de Lourenzá. Con Mari Carmen, aprenderá todos os segredos das nosas fabas máis famosas. E Leni irá ata A Estrada para coñecer a horta ecolóxica de Óscar, que ten unhas verduras de primeira. E, por suposto, na reunión desta semana non faltarán a música, as risas e a troula.

ler máis

Tras a parada polo confinamento, a serie 'Tres camiños', con participación da TVG, retoma a súa rodaxe

26/05/2020

Nunha semana está prevista a súa chegada a Galicia para gravar nas localidades do Cebreiro, Samos e Triacastela

A peregrinación a Compostela é o nexo desta produción internacional, que conta nos papeis principais con Álex González e Verónica Echegui e cuxa estrea na plataforma de Amazon será a comezos de 2021

Tras a parada polo confinamento, a serie 'Tres camiños', con participación da TVG, retoma a súa rodaxe

Santiago, 26.05.2020.-  A produción internacional Tres camiños, en que participa a Televisión de Galicia, subvencionada pola Xunta coa intención de fomentar e difundir o fenómeno xacobeo e os valores do Camiño de Santiago de cara ao vindeiro ano santo, reinicia esta semana a súa rodaxe en Pamplona tras o parón sufrido o pasado mes de marzo por mor do coronavirus. Esta serie orixinal de seis capítulos, producida pola galega Ficción Producciones e dirixida polo ourensán Norberto López Amado, verase na plataforma de Amazon a comezos de 2021.

O reinicio da gravación é todo un reto para a produción, xa que se deberán adaptar as xornadas da rodaxe ás fases de desescalada das comunidades por onde pasa o Camiño e ás medidas de seguridade e protocolo esixidas neste período. Tras retomar a súa rodaxe este martes en Pamplona, está previsto que Tres camiños chegue a Galicia nunha semana para gravar en localizacións do Cebreiro, Samos e Triacastela. A rodaxe da serie estenderase ata o 20 de xullo.

A peregrinación a Compostela é o nexo dunha serie con proxección internacional que narra a viaxe de cinco peregrinos a través de tres épocas da súa vida. Cinco personaxes con cadansúa lingua: alemán, italiano, coreano, portugués e galego. Entre os protagonistas que percorren estes Tres Camiños están caras coñecidas como a dos actores Álex González e Verónica Echegui, ademais dun elenco internacional encabezado por Andrea Bosca, Anna Schimrigk e Alberto Joo Lee. A serie gravouse xa noutras comunidades autónomas e en países como México, Alemaña e Corea do Sur, e viaxará tamén a Portugal para retratar o pasado e presente dos personaxes desta ficción.

A historia flutúa entre tres camiños diferentes, realizados en anos distintos: 2000, 2006 e 2021. Tres etapas das vidas dos protagonistas en que se verán moitos problemas, tensións e conflitos do mundo ordinario, que mostrarán o Camiño de Santiago non só como unha viaxe terreal senón tamén espiritual.   

ler máis

FORTA e APIA asinan un convenio de colaboración para unha maior difusión dos temas ambientais

25/05/2020

A Asociación de Periodistas de Información Ambiental promoverá a formación específica neste aspecto dos profesionais das canles autonómicas agrupadas en FORTA, entre as que se inclúe a CRTVG


FORTA e APIA asinan un convenio de colaboración para unha maior difusión dos temas ambientais

Santiago, 25.05.2020.-    A Federación de Organismos de Radio e Televisión Autonómicos (FORTA) e a Asociación de Periodistas de Información Ambiental (APIA) asinaron un protocolo de colaboración para impulsar unha maior difusión dos temas ambientais a través das canles autonómicas agrupadas en FORTA. Entre elas figura a CRTVG, que toca estes temas en moitos dos seus programas, tanto na televisión coma na radio.

A formación é un dos eixes básicos en que APIA leva traballando desde a súa creación, en 1994, e esta acción permitiralles aos membros de FORTA contar cunha formación específica en temas ambientais. Tamén se abre a posibilidade de contar cunha bolsa remunerada, dirixida a estudantes do último ano de Xornalismo, para realizar prácticas en medios de FORTA co obxectivo de tratar os temas vinculados coa natureza, no sentido máis amplo da palabra.

Para a presidenta de APIA, María García de la Fuente, a importancia desta sinatura radica en que “os medios que conforman a FORTA, se por algo se distinguen, é por tratar a información con proximidade ao cidadán e sempre pegada ao territorio”, algo que para García de la Fuente “é fundamental na información ambiental”.

Pola súa parte, o presidente de FORTA, Juande Mellado, puxo de relevo que “esta colaboración supón un reforzo cualitativo á aposta dos servizos audiovisuais públicos autonómicos por informar dunha maneira rigorosa e exhaustiva dos temas que afectan ao coidado do noso planeta”, un acordo que supón un apoio, engade Mellado, “para que os cidadáns teñan acceso a contidos de utilidade, cun enfoque preciso e divulgativo sobre os diversos aspectos ambientais”.

ler máis

'Cos pés na terra' compartirá unha xornada de traballo cun criador de galiñas en liberdade e cun produtor de arandos

25/05/2020

Ademais, recollerá diferentes tipos de follas para poñer en práctica unha técnica novidosa: o ‘ecoprint’ (22.30 h)

'Cos pés na terra' compartirá unha xornada de traballo cun criador de galiñas en liberdade e cun produtor de arandos

Santiago, 25.05.2020.-  Que foi antes: o ovo, a galiña ou a máquina clasificadora? Se alguén ten hoxe respostas no programa ‘Cos Pés Na Terra’, é Alberto, que coida a diario dunhas galiñas que viven en liberdade e que llo agradecen con resultados ben saborosos.

O programa desta semana tamén ten unha cita con Nuria, Uxía e Antía, coas que recollerá diferentes tipos de follas para poñer en práctica unha técnica novidosa: o ‘ecoprint’.

Ademais, os espectadores coñecerán a Marcos, un produtor de arandos en plena recolleita, que vai demostrar, nunha xornada de traballo, que non é necesario ser da aldea para ser de campo.

ler máis

Amplo dispositivo de busca para atopar a Raquel, esta noite nun novo capítulo de 'Serramoura'

24/05/2020

Teresa negocia con César a súa entrega, pero esíxelle que antes acabe con Evaristo Fiúza (22.35 h)

Amplo dispositivo de busca para atopar a Raquel, esta noite nun novo capítulo de 'Serramoura'

Santiago, 24.05.2020.-   Despois da fuxida de César do sanatorio, todos os efectivos do cuartel de ‘Serramoura’ son conscientes de que a vida de Raquel está en xogo, polo que Tomás non dubida e organizar un dispositivo de busca sen escatimar recursos.

No capítulo desta noite, tamén os veciños da vila se botan ao monte para atopar a Raquel, algo que Roi e Marga intentan evitar por todos os medios. Para evitar interferencias no seu traballo, os sarxentos non dubidan en reter no cuartel a Evarsito Fiúza, algo co que non estará moi conforme.

Mentres tanto, Teresa negocia con César a entrega de Raquel, pero introduce un novo punto no acordo: se César quere a Raquel, antes ten que acabar con Evaristo Fiúza.

ler máis