Acción, ciencia e intriga son tres dos ingredientes que definen esta serie, inspirada nos impactos que producen na sociedade as alertas alimentarias. Ambientada nunha empresa de alimentación e no seu laboratorio de biotecnoloxía,Gondar reflicte unha Galicia urbana, dinámica e, sobre todo, actual, xa que as novas sobre esta industria dominan os informativos e a preocupación relativa sobre os alimentos que inxerimos instalouse na nosa sociedade.

Ao fío desta temática de impacto social, os protagonistas da serie son investigadores e científicos capaces de solucionar as crises máis complexas, como son intoxicacións alimentarias de orixe descoñecida, asasinatos, pragas destrutivas e exóticos virus, sendo cada caso un reto á intelixencia de Luís Gondar e para o seu equipo, cunhas ferramentas de traballo que son a lóxica, o método científico e a curiosidade.