CRTVG

Cultura 10

En Cultura 10 recóllense desde as expresións máis clásicas como a arte ou a literatura, ata acontecementos como festivais de cine; novas formas de expresión como a vídeo creación ou manifestacións máis tradicionais, incluso a gastronomía e opcións de turismo.

Atopámonos ante un espazo de 30 minutos dividido en varias seccións, unidas por un grande eixe vertebrador, a actividade cultural galega no máis amplo sentido, con artistas galegos e de fóra, de tradición e de vangarda, de rock e de ópera. Con Luísa Castro coñeceremos a fondo a traxectoria profesional e persoal de xentes do mundo da cultura, para percorrer con elas a súa vida, a súa obra e a súa visión do mundo actual e do futuro.

En cada programa poderanse ver tres grandes reportaxes, dúas sobre acontecementos culturais que suceden en Galicia e a outra do reporteiro estranxeiro, que visita semana a semana diferentes localidades galegas, co que coñeceremos a nosa gastronomía, o noso patrimonio, as nosas festas, opcións de turismo, pero contado desde a óptica da persoa que nos visita de fóra. Á parte, o programa conta con unha axenda, un innovador sumario e varias seccións de pezas onde recollemos de xeito breve a actividade cultural da semana. Trátase dun programa fresco e dinámico, con un novo compoñente visual, tanto a través das imaxes de transición, coma na fotografía e na realización.

A web de Cultura 10 porá os contidos do programa a disposición dos internautas e será unha ferramenta para comunicarnos con eles e para difundir unha maior axenda cultural, a través do Newsletter do programa e das redes sociais.