CRTVG

Buscar

Zigzag Diario

Xesús Ron, Teatro Ensalle, DandyLady e A Panadaría

30/06/2017 21:00 h

“ZigZag Diario” despide a temporada cun programa temático centrado no mundo da escena que conta coa presenza no estudio de gravación de Xesús Ron, director artístico de Chévere, unha compañía que celebra os seus 30 anos recuperando tres das súas obras máis emblemáticas: “Río Bravo”, “Annus Horribilis” e “Ultranoite no país dos ananos”. Gañadora do Premio Nacional de Teatro en 2014, Chévere leva tres décadas de música, teatro, humor, irreverencia e compromiso.
O espazo da tvG2 tamén fala da compañía Teatro Ensalle, que presentou unha das montaxes máis arriscadas da temporada, “Después de Camarina”. A obra ofrece unha visión desde dentro e desde fóra da sociedade contemporánea e unha busca de respostas novas e diferentes.
Outra das protagonistas é Dandy Lady, que presenta a súa nova proposta de poesía escénica: un vídeopoema realizado por Iria Pinheiro para “Uralita”, o novo espectáculo desta formación. “Capitalismo” está inspirado no texto “O derradeiro poema do capitalismo serodio”, de Dani Salgado, e sitúa a persoa fóra de foco, fóra do que existe, dentro dun sistema artificial, cunha única saída.
Tamén coñecemos en que traballan os membros de A Panadaría. A súa nova obra, “Elisa e Marcela”, está inspirada na historia do primeiro matrimonio homosexual do que se ten constancia en España. Estas dúas mulleres son un símbolo do desafío ás regras do binomio de xénero e da defensa dos dereitos das parellas lesbianas.

Envía o teu comentario!.
Para poder comentar esta entrada debes estar rexistrado.
Introduce o teu usuario e contrasinal aquí

Atopar capítulo por: