CRTVG

Buscar

Aquí Galicia

II RaxoFesta de Barro

09/12/2017 16:30 h

“Aquí Galicia” desprázase á localidade pontevedresa de Barro, onde se celebra a segunda edición da RaxoFesta, un evento que mestura deporte e gastronomía. 

No apartado gastronómico, aprendemos diferentes xeitos de preparar o raxo: á pementa, ao allo, en empanada e petisco de raxo. 

A presentadora de “Aquí Galicia”, Lucía Rodríguez, fala cos directivos do Barro Club de Fútbol, Eva María Paredes e Ricardo Fernández, organizadores da RaxoFesta. Ademais, xa que Barro é un dos concellos que máis impulsan os deportes e as escolas deportivas, o programa comparte uns momentos cos equipos de fútbol sala, fútbol 11 e tenis.

Xa que o espazo da TVG vai pasar esta tarde de sábado en terra de muíños, acompaña un grupo de escolares que presencian unha recreación de como era a moenda tradicional nun dos muíños que se atopan no río Barosa e rematarán elaborando pan. O concello de Barro caracterízase tamén pola grande extensión de montes que alberga. O equipo de “Aquí Galicia” asiste, na compaña doutro grupo de rapaces, á plantación de diversas árbores.

O programa percorre o Camiño de Santiago, no seu ramal portugués, ao seu paso polo concello de Barro, terra natal do ilustre pensador, filósofo, lingüista e teólogo Amor Ruibal Tamén se coñece mellor a Denominación de Orixe Rías Baixas a través da visita a tres adegas.

E, como en toda festa que se prece, na RaxoFesta de Barro non podía faltar a música. Así, o programa ofrece as actuacións do grupo Fama; do cantante asturiano Jorge Menéndez, residente desde hai 13 anos en Barro; do grupo de danzas Amor Ruibal; da banda da escola de música de Barro e da academia de bailes de salón BTroula.

Envía o teu comentario!.
Para poder comentar esta entrada debes estar rexistrado.
Introduce o teu usuario e contrasinal aquí

Atopar capítulo por: