Antes de dar paso aos famosos para que amosen as experiencias vividas, os presentadores, Belén Xestal e Rafa Durán, abrirán o programa interpretando un tema alusivo a todos eles, esta vez “En que lea estou metido”, e de seguido actuará Lucía Pérez, a artista convidada de hoxe, que integrará o xurado para axudar a avaliar a misión de cada famoso.

As tarefas desta semana encomendadas aos impostores porán a proba a capacidade de adaptación a unha experiencia nunca vivida antes por eles. Así, verán a Pili Pampín como se integra na maxia do circo; un Óscar Pereiro aterrorizado que intenta fuxir do cemiterio onde terá que realizar unha dura proba; María Mera asustada polos ruídos das máquinas coas que terá que retirar a broza do monte; as aventuras de Xacobe Pérez cociñando e repartindo pizzas a domicilio, e Lito da Panorama tendo que cociñar e servir nun comedor escolar a nada menos que 130 nenos e nenas, que berran “Lito camareiro”.

Amais de ser avaliados na execución dos retos polo xurado, integrado por Paula Carballeira (actriz), Xavier Picallo (director e autor teatral) e nesta ocasión por Lucía Pérez, cada famoso terá que preparar outra dura proba no estudio do programa, unha interpretación musical alusiva á experiencia vivida. O impostor gañador de cada programa recibe un cheque cunha cantidade en metálico que destinará a unha ONG ou a unha causa benéfica concreta seleccionada por el.

“Onde o Mundo se chama Celso Emilio” é unha iniciativa de carácter cultural organizada pola Fundación Curros Enríquez arredor do centenario do nacemento do autor celanovés e en homenaxe tamén do 50 aniversario da publicación da súa obra máis recoñecida, “Longa Noite de Pedra”, no ano declarado polo Parlamento de Galicia de Celso Emilio Ferreiro.

Esta IV Xornada de Convivencia, na que participan uns cen alumnos do CEIP Curros Enríquez da Coruña, o CEIP Curros Enríquez de Celanova e o CPR Sagrado Corazón de Celanova, inclúe a realizacións duns concertos didácticos e xogos literarios pola mañá, dos que a Televisión de Galicia tamén dará conta en directo a través do espazo informativo “A Revista”, e do proxecto artístico “Onde o Mundo se chama Celso Emilio”, deseñada na Praza Maior da localidade para que a cámara web da CRTVG sirva de fiestra cultural da obra de Celso Emilio en todo o mundo.

Desde as 15.00h, os usuarios da web da CRTVG poderán seguir, en vivo, o desenvolvemento das distintas actividades programadas, que van desde a realización dunha pintura co logo do centenario de Celso Emilio, pasando por deseñar gráficos en carteis a través da interpretación do seu poema “O Reino” co que se ilustrará a Praza Maior, ata pintar un gravado que Picasso lle dedicou ao autor. En horario de tarde, o magacine da TVG “A Solaina” tamén seguirá de preto esta iniciativa.

Preguntada pola reacción dos mercado, Muñoz comentou que estes "reaccionan dun modo que é imprevisible para todos" e insistiu en que a reunión do xoves do Executivo central e as comunidades "foi moi importante para dar confianza, polo cumprimento dos obxectivos". "España está a facer un exercicio de transparencia cara ao exterior e, nese sentido, este Goberno está a dar esa idea de transparencia e realidade das contas", aseverou, para resaltar "a vontade" de "transmitir confianza" para todos.

Neste sentido, sobre o plan de reequilibrio de Galicia aprobado polo Goberno, a conselleira de Facenda aclarou que a redución de 69 millóns de euros correspondente a unha décima do PIB que ten que facer a Comunidade galega "non quere dicir que ten que haber medidas por 69 millóns". Deste modo, teimou en que Galicia "grazas a que leva un bo camiño" tras as iniciativas adoptadas nos últimos anos "só quedan uns axustes menores" porque no plan de reequilibrio xa se incluíron "todas as medidas que se foron tomando", entre as que se contempla o aforro coa Lei de medidas do emprego público, o Plan de optimización de gastos de persoal e o Plan de racionalización do sector público, entre outras.

PERSPECTIVAS

Sobre as perspectivas para o segundo semestre, a conselleira comentou que espera que "continúe a situación actual", pero matizou que "as previsións non duran moito máis dun mes". Non obstante, recalcou que a "previsión de crecemento para Galicia se estima será mellor que o comportamento que teña o Estado". "Confiamos que a evolución da economía galega sexa mellor que a do conxunto do Estado", abondou.

Preguntada pola posibilidade de novos axustes, Elena Muñoz recordou que Galicia ten "un camiño trazado" no Plan de reequilibrio. "Agora tócanos cumprir e ir polo camiño marcado. Se aparece algunha cuestión que pode alterar esa senda entón haberá que reaccionar en consecuencia", dixo, "para confiar en que se poderá sacar o plan adiante sen máis sobresaltos".

Tamén eloxiou a conselleira o apoio do Executivo de Mariano Rajoy ás comunidades en relación aos problemas de liquidez dalgunhas. "A diferenza de anos pasados, o Goberno está disposto a apoiar as comunidades autónomas", valorou. "España é un país serio, comprometido cos seus obxectivos", agregou, para matizar que a Unión Europea debe "estar tranquila" porque España está "unida" e as CCAA "na mesma liña que o Goberno central, dando as máximas garantías de cumprimento".

Sobre o próximo presuposto para Galicia, comentou que "en breve" se iniciarán os "trámites". Ao respecto, explicou que primeiro teñen que fixar todas as comunidades no Consello de Política Fiscal e Financeira "o obxectivo de estabilidade para 2013". "O Goberno vai convocar na primeira quincena de xuño o consello en que informará da proposta", comentou, para engadir que baseándose no obxectivo que se estableza empezarán a "facer os cálculos". "Nese momento poderemos planificar o ano 2013", sentenciou.

Pola súa banda, preguntada polo control do absentismo, informou de que a Xunta está a "analizar datos dos catro primeiros meses do ano" para ver como "afectou a Lei de medidas" que entrou en vigor en marzo, e precisou que cando o estuden levará un informe cos resultados ao Consello.

NOVAGALICIA

Por outro lado, en relación á situación de Novagalicia Banco, a titular de Facenda ratificou que "como transmitiu a entidade" o plan que "presentou no seu momento a través da entrada de investidores privados" a día de hoxe "segue vixente" e "despois do novo Real Decreto" está "en condicións con este plan de garantir a viabilidade en solitario". "Polo tanto esperamos que así sexa e presenten as súas dotacións adicionais no prazo establecido polo RD e sexan aceptadas", apostilou.

Sobre os investidores privados do exterior, Muñoz considerou que se trata de algo "moi importante" o feito de que "investimentos estranxeiros apoien o sector financeiro español" porque ofrece "unha imaxe de confianza fronte ao exterior" e "contribuiría a reforzalo". Tamén resaltou que as relacións coa dirección do banco galego "son boas". "Estamos todos no mesmo barco, co mesmo obxectivo de garantir unha entidade financeira radicada en Galicia", concluíu, para engadir que "conta co apoio da Xunta".

O Comité Europeo de Circom acordou tamén nomear o director de Comunicación da CRTVG, Fernando R. Ojea, vicepresidente da institución e membro do seu Comité Executivo, o órgano que xestiona regularmente Circom. Actualmente Ojea estaba a ser coordinador nacional da asociación para España.

Os asistentes ao Comité Europeo puideron ver un vídeo sobre os atractivos de Galicia e sobre a CRTVG e acolleron a noticia da celebración do cumio do próximo ano na nosa Comunidade con aplausos. O Congreso Anual desenvólvese normalmente no mes de maio, aínda que tamén no mes de novembro se levará a cabo en Santiago unha reunión do Comité Europeo de Circom. 

Circom, a asociación de televisións rexionais europeas, agrupa 260 canles de todo o continente, e conta para este gran debate anual do servizo público de televisión con delegados de 26 países. En base ao lema desta 30 edición, “alcance, relevancia e responsabilidade”, estase a prestar unha especial atención ao servizo público rexional no actual contexto de recortes orzamentarios, aos cambios derivados da innovación tecnolóxica, ao papel do xornalismo e á cooperación entre televisións.

Na presente edición, que se desenvolve entre o 17 e o 19 de maio na cidade sueca de Malmö, a directora da TVG, Rosa Vilas, participou o xoves na sesión de apertura do Congreso Anual, compartindo escena co presidente de Circom, o belga Jacques Briquemont, e responsables das televisións públicas de Suecia, Holanda, Grecia e Italia.

Tamén na xornada do xoves, Rosa Vilas recolleu no transcurso dunha gala o prestixioso premio Prix Circom á mellor ficción europea por “Matalobos”, serie producida por Voz Audiovisual e ambientada na loita entre clans de narcotraficantes, que constitúe o galardón máis importante recibido na historia da TVG. A gala transmitiuse pola canle sueca SVT ás 19.00h, online e en alta definición. O evento púidose seguir en directo por vez primeira en todo o mundo.

O venres á tarde, a directora de TVG, Rosa Vilas, e o director de Voz Audiovisual, Carlos Carballo,  realizaron a presentación ao resto das televisións europeas dos aspectos artísticos, técnicos e de produción da serie, e explicaron os seus elementos principais a través dunha proxección analizada das secuencias máis significativas. A sesión especial, moderada pola irlandesa Maire ni Chonlain, da televisión irlandesa en gaélico TG4, desenvolveuse dentro da sección Encontro cos vencedores, no marco do Congreso Anual das televisións públicas rexionais de Europa.  

Os gañadores dos premios nas diferentes categorías foron seleccionados entre preto de 200 producións procedentes de 23 países. France TV e a BBC foron as televisións que obtiveron máis galardóns nesta edición, con dous en cada caso.

Na foto superior, Carlos Carballo, Jacques Briquemont, Rosa Vilas e Fernando R. Ojea.

O xurado dos premios Circom, formado por 14 experimentados profesionais da televisión, produtores e executivos, concedeulle o premio a “Matalobos” por ter “todos os ingredientes dunha excelente produción: ben escrita, dirixida, editada e actuada”. Ademais, tívose en conta que a serie amosa a costa de Galicia, as grandes secuencias de acción no mar que inclúe e a elección da música desta ficción. Deste xeito, a canle pública galega comeza a recoller os froitos da política que vén desenvolvendo desde as súas capacidades como servizo público para achegar o traballo do audiovisual de Galicia a ámbitos exteriores aos que este non tería acceso de seu.

A gala foi transmitida pola canle sueca SVT, online e en alta definición. Foi a primeira vez que este evento se puido seguir en directo en todo o mundo e tamén a CRTVG ofreceu o acto a través da súa páxina web (www.crtvg.es).

Os gañadores dos premios nas diferentes categorías foron seleccionados entre preto de 200 producións procedentes de 23 países. Ademais do premio á mellor ficción europea recollido por “Matalobos”, tamén obtiveron recoñecemento a canle británica BBC, a francesa FR3, a norueguesa NRK, a alemá RBR ou a sueca SVT, nas categorías de deportes, vídeo xornalismo, documental, magacine, programa máis orixinal, espazo para minorías e xornalismo de investigación, respectivamente.  France TV e a BBC foron as televisións que obtiveron máis galardóns nesta edición, con dous en cada caso.

A obtención deste recoñecemento para a serie da TVG “Matalobos” inclúe a posibilidade de dar a coñecer polo miúdo a actividade do audiovisual galego, xa que lle permite á canle pública participar hoxe á tarde nunha sesión especial do Congreso para explicarlles aos representantes das demais televisións europeas como se fai e como funciona a serie. Neste senso, Rosa Vilas e Carlos Carballo, director de Voz Audiovisual, realizarán unha presentación dos aspectos artísticos, técnicos e de produción de “Matalobos”, a través da proxección analizada das secuencias máis significativas.

Circom está a desenvolver entre o 17 e o 19 de maio en Malmö a trixésima edición do seu gran debate anual do servizo público da televisión. Delegados de 26 países asisten ao evento, que ten por lema “alcance, relevancia e responsabilidade” e en que se lle prestará unha atención especial ao servizo público rexional no actual contexto de recortes orzamentarios, aos cambios derivados da innovación tecnolóxica, ao papel do xornalismo e á cooperación entre televisións.

Na foto superior, Rosa Vilas recolle o premio Prix Circom por "Matalobos".

Previo a esta gran cita, ás 17.55h, a Televisión de Galicia tamén ofrecerá en directo pola súa primeira canle o partido Celta– Alcoiano, na pugna polo ascenso á Primeira División do fútbol español. Desde o estadio de Balaídos, coa narración de Sergio Delpont e os comentarios de Manuel Canabal, o equipo galego terá que consolidar as súas aspiracións desde a posición que ocupa, como segundo na clasificación, por riba do Valladolid.

Os responsables destes entes amosaron que comparten problemas semellantes, como son os recortes orzamentarios e a dificultade para manter en toda a súa calidade o servizo público rexional, se ben con distintas intensidades, pero constataron que existe unha demanda crecente do mesmo por parte dos cidadáns, para o cal sinalaron a conveniencia de aumentar a cooperación entre elas, tal como concluíu Jacques Briquemont. Tamén están a prestar grande atención ao fenómeno emerxente da TV en mobilidade.

Na súa intervención, Rosa Vilas falou sobre como está a afrontar a TVG os actuais tempos de crise e abordou os próximos desafíos aos que se enfronta a TVG. “En primeiro lugar implementar unha lei que aprobou recentemente o Parlamento autonómico de Galicia, que nos transformará nunha corporación, dotándonos dunha estrutura que se supón nos dará máis marxe de manobra para xestionar a organización. Tamén afrontar unha renovación tecnolóxica básica e fundamental. A completa dixitalización permitirá optimizar os recursos e aumentar a produtividade. Pretendemos culminar ese proceso en 2013”, sinalou. 

A directora xerente da Galega defendeu a natureza e obxecto da CRTVG como servizo público “que goza do recoñecemento dos cidadáns, que asume os recortes económicos e que practicamente eliminou o seu endebedamento”, e engadiu que o futuro dos medios públicos galegos se sitúa na audiencia rexional, mantendo os sinais de identidade e continuando co labor de normalización lingüística e de cohesión social. 

Con relación ás televisións públicas europeas que participan neste Congreso Anual, que se desenvolve desde hoxe e ata o día 19, amosou o seu apoio ao labor da asociación Circom e sinalou que “a colaboración que ofrece unha organización como Circom é un apoio forte para lexitimar desde unha perspectiva europea o que facemos a nivel local”.

A directora xeral da SVT sueca, Eva Hamilton, subliñou que esta televisión está a facer os maiores investimentos non en estudios ou instalacións fixas senón en desenvolver a tecnoloxía en mobilidade e que esa é a vía que consideran necesaria, entre outras cousas, para achegarse ao público máis novo que non está a ser un gran consumidor de televisión convencional. Pola súa parte, o director das televisións rexionais holandesas, Gerard Schuiteman, abondou en que esa liña de traballo favorece algo que o público demanda, que é a interactividade. O director da canle rexional grega ERT3, Kostas Bliatkas, indicou que na actual forte restrición económica unha vía de adopción de contidos é a propia colaboración da audiencia e lamentou que “a primeira vítima” da crise é o xornalismo de investigación, mentres que Alberto del Copo, que dirixe a rede territorial da RAI italiana, confirmou que tamén a súa empresa busca na maior medida posible un servizo rexional multiplataforma.

Circom, a asociación de televisións rexionais europeas, agrupa 260 canles de todo o continente, e conta para este gran debate anual do servizo público de televisión con delegados de 26 países. En base ao lema desta 30 edición, “alcance, relevancia e responsabilidade”, estase a prestar unha especial atención ao servizo público rexional no actual contexto de recortes orzamentarios, aos cambios derivados da innovación tecnolóxica, ao papel do xornalismo e á cooperación entre televisións.

Ademais na conferencia farase un repaso sobre a relación entre a televisión rexional e as minorías, xa que precisamente a cidade de Malmö é un exemplo singular de multiculturalismo ao contar con poboación procedente de 131 países do mundo. Outros aspectos a tratar serán as olimpíadas ou os sucesos de Utoya. Os encontros celébranse nas instalacións da Universidade de Malmö, que colabora na elaboración da conferencia. 

Na foto superior, Rosa Vilas hoxe na sesión de apertura do Congreso Anual.

As tarefas desta semana encomendadas aos impostores porán a proba a capacidade de adaptación a unha experiencia nunca antes vivida por eles, como María Mera exercendo de matrona para presenciar en vivo e directo o maior milagre da vida, o nacemento dun bebé; as habilidades de Xacobe Pérez para estar á altura dun remeiro de elite; Óscar Pereiro, no papel de “supernanny” para atender os fillos dunha familia numerosa; a resistencia de Pili Pampín, nunha sala de despezamento de carne, e Lito, da Panorama, moi comprometido cun refuxio de animais, onde termina tan motivado como para converterse no líder da manda.

Amais de ser avaliados na execución dos retos polo xurado, integrado por Paula Carballeira (actriz), Xavier Picallo (director e autor teatral) e polo artista convidado, cada famoso terá que pasar outra proba no estudio do programa, unha interpretación musical alusiva á experiencia vivida. O impostor gañador de cada programa recibe un cheque cunha cantidade en metálico que destinará a unha ONG ou a unha causa benéfica concreta seleccionada por el.

O programa, que se ofrecerá a través da primeira canle, despois do “Telexornal Mediodía”, ás 15.25h, e tamén na tvG2 no seu horario habitual (16.30h), contará coa participación de intelectuais e personalidades de Galicia que explicarán a contribución do homenaxeado ao sentimento de galeguidade e que desenvolverán aspectos menos coñecidos da súa traxectoria humana.

Durante 30 minutos, “ZigZag Diario” abordará as facetas literaria, xornalística e empresarial de Paz Andrade. Os espectadores poderán coñecer o máis salientable da vida dunha personalidade intensa que traballou en todos os campos do pensamento e da empresa a prol de Galicia.

Para achegarse á súa figura, o espazo contará coas impresións e reflexións de seu fillo, Alfonso Paz Andrade; do presidente da Real Academia Galega, Xosé Luís Méndez Ferrín; de Xosé Díaz, fillo de Isaac Díaz Pardo; do presidente do Consello da Cultura Galega, Ramón Villares; do escritor Víctor F. Freixanes, gran coñecedor da súa obra; e de Xan Carballa e Pedro Feijóo, estudosos da súa biografía.

 O especial de “ZigZag Diario” neste Día das Letras Galegas rematará coa recuperación do arquivo da TVG dun documento histórico cunhas declaracións realizadas á canle autonómica por Valentín Paz Andrade pouco antes da súa morte.

Na foto superior, María Solar, presentadora de "ZigZag Diario".

Esta distinción, que se entregará no transcurso dunha gala que será emitida pola televisión pública sueca e que se celebra no marco do Congreso Anual de Circom, é o maior galardón internacional que o mundo da televisión lle concede á TVG na súa historia. Deste xeito, a canle pública galega comeza a recoller os froitos da política que vén desenvolvendo desde as súas capacidades como servizo público para achegar o traballo do audiovisual de Galicia a ámbitos exteriores aos que este non tería acceso de seu.

O xurado dos premios Circom, formado por 14 experimentados profesionais da televisión, produtores e executivos, concedeulle o premio a “Matalobos” por ter “todos os ingredientes dunha excelente produción: ben escrita, dirixida, editada e actuada”. Ademais, tívose en conta que a serie amosa a costa de Galicia, as grandes secuencias de acción no mar que inclúe e a elección da música desta ficción.

A gala será transmitida pola canle sueca SVT mañá ás 19.00h, online e en alta definición. Esta é a primeira vez que este evento se poderá seguir en directo en todo o mundo e tamén a CRTVG ofrecerá o acto a través da súa páxina web (www.crtvg.es).

Os gañadores dos premios nas diferentes categorías foron seleccionados entre preto de 200 producións procedentes de 23 países. France TV e a BBC foron as televisións que obtiveron máis galardóns nesta edición, con dous en cada caso.

A obtención deste recoñecemento para a serie da TVG “Matalobos” inclúe a posibilidade de dar a coñecer polo miúdo a actividade do audiovisual galego, xa que lle permite á canle pública participar nunha sesión do Congreso para explicarlles aos representantes das demais televisións europeas como se fai e como funciona a serie.

Circom, que agrupa 269 canles rexionais de toda Europa, desenvolverá entre o 17 e o 19 de maio en Malmö a trixésima edición do seu gran debate anual do servizo público da televisión. Delegados de 26 países confirmaron a súa asistencia ao evento, que ten por lema “alcance, relevancia e responsabilidade” e no que se lle prestará unha atención especial ao servizo público rexional no actual contexto de recortes orzamentarios, aos cambios derivados da innovación tecnolóxica, ao papel do xornalismo e á cooperación entre televisións.

A directora da Televisión de Galicia, Rosa Vilas, participará mañá xoves na sesión de apertura do Congreso Anual de Circom, onde falará de como está a afrontar a TVG os actuais tempos de crise, nun acto en que compartirá mesa co presidente de Circom, o belga Jacques Briquemont, e responsables das televisións públicas de Suecia, Grecia e Holanda.

Na foto superior, gala Prix Circom celebrada en Malta en 2010.

“18 Comidas” é un crebacabezas construído, nun único día de ficción, coas historias e anacos de vida que se desenvolven sempre arredor das comidas, momento en que os seres humanos se reúnen e se relacionan do xeito máis común. Todas as historias mestúranse nunha película de emocións servidas ao redor dunha mesa, unha viaxe polos sentimentos na máis universal de todas as loitas: a de ser feliz. O filme de Jorge Coira é un cruzamento constante de camiños ao longo de almorzos, comidas e ceas, cunha fronteira moi difusa entre a risa e o pranto, como a vida mesma.

De seguido, ás 01.30h, “Filmar Improvisando”, unha peza de Toño Chouza que mostra o making off de “18 Comidas”.

Na foto superior, os actores Sergio Peris e Víctor Clavijo nunha das secuencias de "18 Comidas".

A partir das 19.55h, a Galega ofrecerá o partido Deportivo da Coruña– Unión Deportiva As Palmas, na pugna polo ascenso á Primeira División, entre o líder de Segunda e o equipo canario, que actualmente ocupa a décima posición. O encontro, que será narrado por Sergio Delpont, cos comentarios de Manuel Canabal e a pé de campo en Riazor con Patricia Rodríguez Juste, supón un paso máis para acadar o obxectivo do equipo galego, ao que o separan tan só 8 puntos da Primeira División, a falta de cinco xornadas para o final da temporada.

As cámaras da TVG serán testemuñas de todo o ambiente de euforia que envolverá os afeccionados en Riazor, aínda que os canarios xa manifestaron que intentarán atrasar ao máximo o alirón do Deportivo ofrecendo unha boa imaxe como equipo, e tamén Valerón, líder do grupo, prefire non facer cábalas sobre o ascenso e xogar partido a partido. No que vai de temporada, o Deportivo gañou vinte e cinco partidos, empatou catro e  perdeu oito. 

Para poñer o broche final á sexta edición do certame, realizarase como en galas anteriores cun formato de espazo radioescénico, acollendo unha emisión especial do programa “Diario Cultural” da Radio Galega. Entrevistas cos premiados e finalistas, combinaranse coas  interpretacións de diferentes fragmentos das obras: xunto con "Poema sinestésico para tres voces e un can" e "Intercom-baby", subirán a escena "Ironías", de Carlos Losada Galiñanes, e "Quendas", de Zé Paredes.

O elenco de nove actores e actrices (Paula Buxán, Marcos Correa, Borja Fernández, Víctor Mosqueira, Rocío González, Nuria Sanz, Laura Ponte, Pilar Pereira e José Luis López Sacha), que Evaristo Calvo dirixira nas dramatizacións radiofónicas destas obras, será tamén o encargado da súa interpretación durante o evento. Contarase, ademais, co apoio musical de Ro Muñoz, percusionista de grupos como Di Elas, Mamá Cabra, Kentokakí ou The Groovefathers, entre outros.

No espazo radioescénico participará tamén o director de Edicións Xerais de Galicia, Manuel Bragado, que presentará o libro-CD coas obras desta sexta edición e que pasa a formar parte da colección do premio Diario Cultural de Teatro Radiofónico.

A directora da Radio Galega, Rosa Martínez, e o director da AGADIC, J. Carlos Fernández Fasero, farán entrega dos premios da Audiencia e do Xurado, dotado cada un con 3.000 euros de contía.

Convocado pola Radio Galega e o CDG co patrocinio da Agadic, o Premio Diario Cultural de Teatro Radiofónico pretende fomentar a escrita de textos dramáticos para a radio e contribuír á recuperación do formato de teatro radiofónico desde unha perspectiva contemporánea.

O acto é de acceso libre ata completar o aforo do Salón Teatro.

Na foto superior, interpretación por Laura Ponte dun dos textos na pasada edición do certame.

A través deste documental seu fillo Alfonso; o seu biógrafo, Tucho Calvo; Méndez Ferrín, presidente da Real Academia Galega; Luís Alfonso Girgado, asesor literario do Centro Ramón Piñeiro; Ramón Villares, presidente do Consello da Cultura Galega, e o escritor Salvador García Bodaño, achegarán o perfil biográfico e literario deste insigne galego.

Amais trátanse, entre outros aspectos, a relación de Paz Andrade con Castelao, as mutuas influencias no seu pensamento e as coincidencias políticas. O dramático exilio, o desterro en lugares inhóspitos de Galicia, así como a súa influencia política e a súa vertente no ámbito empresarial, destacando a rica personalidade deste intelectual galeguista.

O Festival de Animación de Stuttgart, que se desenvolveu entre o 8 e o 13 de maio, é un dos certames deste xénero máis importantes do mundo e o segundo máis relevante de Europa despois do Festival de Annecy, que terá lugar a principios de xuño e onde “Engurras” está seleccionada tamén en competición oficial. Este galardón vén a sumarse a outros recoñecementos prestixiosos obtidos, tanto internacionais coma nacionais, como o de Mellor Produción de Animación, no Cartoon Movie de Lión, ou mesmo dous premios Goya.

Baseada no aclamado cómic do mesmo título do propio Paco Roca, “Engurras”, dirixida por Ignacio Ferreras, supón unha reflexión sobre a soidade na vellez e mestura a tenrura, o sarcasmo e o humor para narrar a historia de profunda amizade entre Emilio, un director de banco xubilado enfermo de Alzhéimer, e o pícaro Miguel, dous anciáns recluídos nun xeriátrico que loitan por seguir activos e non rematar as súas vidas na temida planta dos asistidos.

A semana das Letras Galegas comeza hoxe na canle autonómica coa emisión do filme “O ano da carracha”, con Félix Gómez, Javier Veiga e Verónica Sánchez como protagonistas. A primeira película de Jorge Coira para a pantalla grande conta tamén coa presenza no reparto dos actores galegos María Vázquez, Camila Bossa, Mela Casal, Celso Parada e Olalla Salgado. A longametraxe, caracterizada polo sarcasmo e as referencias xeracionais, desenvolve a historia dun rapaz que acaba de licenciarse e que é instruído na arte de converterse nun parasito social.

O martes á noite a Televisión de Galicia ofrecerá a estrea do telefilme “Voltar á casa”, cun reparto encabezado por Santi Prego, María Salgueiro, Nerea Barros e Inés de Uña. O filme de Breogán Riveiro narra unha historia mil veces repetida: ante un acontecemento terrible, neste caso a desaparición dunha nena pequena, a sociedade busca as respostas máis rápidas e fáciles. Esta película para televisión nace así inspirada en acontecementos reais, os famosos casos que saltan aos medios de comunicación e que constitúen unha fonte de entretemento xornalístico durante días ou semanas.

Xa na xornada do mércores, na véspera do Día das Letras Galegas, a TVG programará a estrea en televisión de “18 Comidas”, unha das maiores sorpresas do cine galego dos últimos anos. Baixo a dirección de Jorge Coira, o filme conta cun reparto coral en que figuran unha boa lista de actores galegos, como Luís Tosar, Pedro Alonso, Federico Pérez, Víctor Fábregas, Camila Bossa, José Barato, Antonio Mourelos, María Vázquez ou Xosé Manuel Olveira “Pico”. A película supón unha viaxe a través de 18 comidas, entre almorzos, xantares e ceas, que nos fan partícipes deses momentos que poden cambiar unha vida. Unha ducia de historias ao longo dun único día que, como acontece na vida, teñen un percorrido imprevisible. Todas as historias se mesturan nunha película de emocións servidas arredor dunha mesa, unha viaxe polos sentimentos na máis universal de todas as loitas: a de ser feliz. Deste xeito, o filme é un cruzamento constante de camiños ao longo de almorzos, comidas e ceas, cunha fronteira moi difusa entre a risa e o pranto, como a vida mesma.

O propio Día das Letras Galegas o cine do noso país será protagonista por partida dobre, xa que a TVG ofrecerá unha sesión vespertina e outra nocturna. Na programación cinematográfica especial de tarde emitirase a tv-movie “Sinbad”, baseada na obra de Álvaro Cunqueiro, cuxo realismo máxico se fai evidente e onde o pasado e o presente se entrelazan constantemente. O argumento deste filme, dirixido por Antón Dobao e con Xosé Manuel Olveira “Pico” no papel de Sinbad, baséase en sentimentos como o amor, a amizade, a lealdade, a imaxinación ou a intelixencia.

Pola noite tocaralle a quenda a “O Club da Calceta”, adaptación da novela homónima de María Reimóndez, que supón un novo capítulo da serie “Un mundo de historias”, un proxecto creado e dirixido por Antón Dobao e centrado na adaptación de textos literarios galegos. Cun quinteto de mulleres interpretado por María Vázquez, Sonia Castelo, Mela Casal, Susana Dans e Camila Bossa, esta longametraxe para televisión explora o universo feminino a través da epopea de cinco persoas de diferente condición, idade e orixe social que viven as súas vidas ordinarias inzadas de conflitos e frustracións.

A sesión de cine galego do venres á noite terá como protagonista a película “O neno de barro”, dirixida polo realizador galego Jorge Algora, cun elenco encabezado por Maribel Verdú e ambientada no Bos Aires de comezos de século. O filme combina unha intriga criminal tan apaixonante como a de Jack o Destripador -pola atrocidade da súa trama e a súa ambientación- co relato da angustia dun neno atormentado polos seus propios medos e o seu illamento, na liña de “O sexto sentido”.

Na foto superior, Víctor Fábregas e Federico Pérez, nunha secuencia de "18 Comidas".

Este prestixioso premio, denominado Prix Circom, é o maior galardón internacional que o mundo da televisión lle concede á TVG desde os seus inicios, e resulta da política que a Galega vén desenvolvendo desde as súas capacidades como servizo público para achegar o traballo do audiovisual de Galicia ata ámbitos exteriores aos que este non tería acceso de seu. France TV e a BBC son as televisións que levan máis premios nesta edición, con dous en cada caso. A maiores, no transcurso da gala, desvelarase o premio principal ou Grand Prix, que se selecciona entre os gañadores dun total de dez categorías.

A obtención deste recoñecemento para a serie da TVG “Matalobos” inclúe a posibilidade de dar a coñecer polo miúdo a actividade do audiovisual galego, xa que lle permite á canle pública galega participar nunha sesión do Congreso para explicarlles aos representantes das demais televisións europeas como se fai e como funciona a serie.

A asociación de televisións rexionais europeas, Circom, que agrupa 269 canles de todo o continente, desenvolverá entre os días 17 e 19 de maio na cidade sueca de Malmö a trinta edición do seu gran debate anual do servizo público da televisión. Delegados de 26 países confirmaron a súa asistencia ao evento, que ten por lema “alcance, relevancia e responsabilidade” e no que se prestará unha especial atención ao servizo público rexional no actual contexto de recortes orzamentarios, aos cambios derivados da innovación tecnolóxica, ao papel do xornalismo e á cooperación entre televisións. 

Cómpre salientar que a directora da Televisión de Galicia, Rosa Vilas, participará o 17 de maio na sesión de apertura do Congreso Anual de Circom, onde falará de como está a afrontar a TVG os actuais tempos de crise, nun acto en que compartirá mesa co presidente de Circom, o belga Jacques Briquemont, e responsables das televisións públicas de Suecia, Grecia e Holanda.

Paralelamente á conferencia, levarase a cabo tamén un seminario para novos xornalistas de televisión procedentes de toda Europa, sobre as novas tendencias da produción.

Na foto superior, gala Prix Circom celebrada en Malta, en 2010. 

Santiago, 13.05.2012 (Europa Press).- O candidato do BNG á presidencia da Xunta, Francisco Jorquera, considerou que un adianto electoral en Galicia "suporía admitir" a "evidencia" de que o actual Goberno de Feijóo "está total e absolutamente esgotado". Fronte a iso, asegurou que a formación nacionalista "está preparada" para afrontar os comicios "celébrense cando se celebren".

Manifestouno nunha entrevista concedida á Radio Galega que recolle Europa Press, e na que o tamén voceiro do BNG no Congreso mostrouse convencido de que o presidente da Xunta, Alberto Núñez Feijóo "convocará as eleccións cando considere que lle beneficiarán ao Partido Popular" e "non á cidadanía".

"É evidente que Galicia necesita un cambio e que a sociedade galega desexa este cambio", expresou o dirixente nacionalista antes de recordar que "Feijóo herdou unha situación en que Galicia crecía por enriba da media estatal mentres que, agora, decrece" de forma moito máis acentuada".

Neste sentido, acusou o presidente da Xunta de "ter un gran problema" xa que "carece de balance que presentar" para afrontar os próximos comicios autonómicos e que, de non se adiantar, se celebrarán en marzo do próximo ano.

Expectativas electorais

Precisamente, preguntado sobre as expectativas do BNG de cara a estas eleccións tras a escisión de diversas correntes como Máis Galiza ou Encontro Irmandiño, Jorquera recoñeceu que "este proceso interno non foi bo para o BNG".

Malia iso, sinalou que a Convención Nacional que os nacionalistas celebraron este domingo "permitiu que a sociedade galega constatase que hai un BNG plural, forte e unido" que "salgue relanzado coa vontade clara de liderar a alternativa de goberno o Partido Popular".

"Polo tanto, desde a admisión de que todo este proceso non foi bo entendemos que temos forza, ideas e enerxía abonda para remontar esta situación e ser a alternativa que este país necesita", apostilou.

Enquisa do CIS

Na súa intervención, Francisco Jorquera tamén se referiu aos resultados do último barómetro de opinión do Centro de Investigacións Sociolóxicas (CIS), correspondente ao mes de abril que sinala que a fronte nacionalista perdería máis da metade do apoio electoral logrado nas eleccións xerais do pasado 20 de novembro.

A este respecto, o dirixente nacionalista considerou que "a marxe de erro" deste estudo "é total e absolutamente espectacular" pois, como indicou, "o tamaño da mostra destas enquisas significa que aplicadas a Galicia, na comunidade fixéronse pouco máis de 100 entrevistas telefónicas".

Carlos Aymerich

Por último, preguntado sobre o papel que desempeña Carlos Aymerich no seu proxecto para presidir a Xunta de Galicia, Jorquera explicou que este teña un papel relevante "dependerá da súa vontade" pois, como apuntou, "todas as súas achegas ao Bloque son absolutamente positivas".

"O que eu podo facer é verbalizar o meu desexo persoal de que continúe estando en primeira liña política no BNG porque entendo que é unha persoa enormemente valiosa", asegurou.

 A proposta da TVG artellarase principalmente arredor da emisión de documentais, de programas especiais e de longametraxes e tv movies con sinatura galega. Os próximos día 15 (martes) e 16 (mércores), a Galega ofrecerá despois do “Telexornal Mediodía”, en dúas entregas, o documental “Valentín Paz Andrade: Verbas e Feitos”, no que destacadas personalidades do mundo cultural analizan e destacan a rica personalidade do intelectual galeguista.

 Por outra parte, con motivo de que o vindeiro día 17 de maio se lle vai entregar ao espazo “Alalá” o premio que concede a asociación Castro Floxo (Ourense) a persoas ou entidades que colaboran coa romaría Raigame, a TVG emite nesta data pola tarde unha escolma dos mellores momentos que se puideron ver ao longo das 200 emisións do programa. Veranse os personaxes máis entrañables, as actuacións máis espectaculares, os momentos máis divertidos e curiosos e, por suposto, tamén se lembrará o capítulo dedicado á romaría Raigame de Vilanova dos Infantes.

Tamén o espazo cultural “ZigZag Diario” emitirá o Día das Letras, despois do “Telexornal Mediodía”, un programa especial en que realizará un percorrido vital sobre Paz Andrade para o que contará coa participación de intelectuais e personalidades de Galicia, que explicarán a contribución do homenaxeado ao sentimento de galeguidade e desenvolverán aspectos menos coñecidos da súa traxectoria humana. Durante trinta minutos darase a coñecer o máis salientable da vida dunha personalidade intensa que traballou en todos os campos do pensamento e da empresa a prol de Galicia.

Cine de estrea na TVG

Cada día da semana, incluso en dobre sesión, a TVG ofrecerá longametraxes e tv movies actuais con sinatura galega, algunhas delas estreas en televisión, como é o caso de “Voltar a Casa” (15 de maio) e “18 Comidas” (día 16), unha das cintas galegas con máis éxito dos últimos tempos. Entre outras achegas, os espectadores poderán gozar das emisións de “O Club da Calceta” (17), “O Neno de Barro” (18), “O ano da carracha” (14) e “Sinbad” (17), entre outras.

Cómpre salientar que, grazas á colaboración da Real Academia Galega, desde o 17 de maio, a Galega comezará a emitir microespazos diarios, titulados “Galicia, Letra a Letra”, onde cada día un académico contará o esencial da vida e da obra dun homenaxeado na historia das nosas Letras. Serán 50 microespazos en total cos que se realizará un esbozo de cada un dos 50 autores destacados desde o inicio da conmemoración da Festa das Letras, en 1963, ata o presente ano.

Especial de “Eirado”, esta noite na tvG2

A segunda canle da Galega, a tvG2, dedicará hoxe á noite un monográfico en “Eirado” á figura do ilustre intelectual. Polo programa pasarán seu fillo Alfonso, o xornalista Tucho Calvo na súa calidade de biógrafo, e Charo Portela, que recentemente publicou en Xerais unha biografía ilustrada do homenaxeado. No apartado musical, o programa contará coa presenza do dúo Doussenfronteiras, que interpretará dous poemas musicados de Paz Andrade. 

Amais, a tvG2 achegará o documental “Cantigas de Celso Emilio” (15 de maio) sobre a musicación dos poemas do autor de Celanova; as longametraxes galegas, “Frío” (día 12) e “Ilegal” (17), e o concerto de Berrogüetto, “O pulso da terra”.

A Radio Galega coas Letras

Os espazos radiofónicos da emisora pública galega tamén realizarán ao longo de toda a semana unha cobertura especial da efeméride. Así, “A Tarde” achegarase ao sentir da lingua galega fóra das nosas fronteiras cada día, a través de profesores de galego que desenvolven as súas profesións en distintas universidades de todo o mundo; “Diario Cultural” implicarase en cada edición coa celebración das Letras Galegas e dedicará, o propio 17 de maio, un programa especial ao autor homenaxeado; “Fondos Reservados” achegará especiais coa música galega máis destacada das últimas décadas; “Galicia por Diante” conversará con Valentín García, secretario xeral de Política Lingüística (día 14, 10.00h) e estará presente no Festiletras, no Couto (Ponteceso); “Convivir en Igualdade” realizará pílulas diarias con textos de Paz Andrade, e “Aquí Galicia” acudirá ao XI Maratón de Lectura en Galego e ao Xardín Desordenado, cuxo obxectivo é promover a poesía galega a través da música, ambos os dous desenvolveranse na Coruña.

Con motivo da celebración das Letras Galegas, os medios públicos galegos dispoñen tamén na súa páxina web dunha canle temática sobre Valentín Paz Andrade. Nesta sección os usuarios poden acceder a unha biografía sobre este político, xurista e escritor pontevedrés destacado, ademais de acceder aos vídeos e programas dos que dispón actualmente a Televisión de Galicia no seu arquivo.