CRTVG

Buscar

Zona Mixta

Chano Planas: "Moita xente non ten a confianza que teño eu en Enmanuel. Xa se vía que era un boxeador de elite"

27/07/2021 - 15:40 h

Triunfo hoxe de Enmanuel Reyes Pla en boxeo diante do subcampión mundial. Por Zona mixta pasou Chano Planas, que o coñece moi ben. Desde a súa saída de Cuba, Enmanuel viviu un periplo moi intenso de viaxes ata que acabou na Coruña, onde reside actualmente: "Parece que moita xente non ten a confianza que teño eu en Enmanuel. Desde que o vin no ximnasio xa sabía que era un boxeador de elite. A entrada que fixo hoxe xa é tendencia e varios patrocinadores nos EUA xa están interesados nel. Incrible o deste home".

Así nos contou as peripecias ata a súa chegada á cidade herculina: "Enmanuel tiña familia xa aquí. Un tío del veu polo ximnasio para falarme del, que daquela saíra desde Cuba a Rusia. Chegar a Coruña foi unha odisea. En Austria estaba nun campo de refuxiados e ao falar con el vin que pensabamos no mesmo. Cando lle deron a nacionalidade española xa fichou oficialmente polo noso club. A Enmanuel non lle fai falta que o adestres, xa vén adestrado de seu; só hai que telo contento e feliz".

E a repercusión internacional está a ser moi grande polo combate entre o cubano De la Cruz co representante español: "Tanto en Cuba como en Miami o é como unha película.Queriamos que lle tocase De la Cruz, claro. A Enmanuel non lle deron a oportunidade alá en Cuba. De la Cruz non está no seu peso ideal, xa comeza a súa costa abaixo, viuse hoxe co boxeador de Kenia. Enmanuel vai ir polo ouro, vai haber deporte e elementos de política. De la Cruz buscará o fallo e a provocación e Enmanuel vai escapar diso para gañar a medalla de ouro".

De luns a venres, ás tres da tarde, tes pase para entrar na Zona Mixta con Carlos Alonso