O 'Galicia en goles' da fin de semana comeza o venres ás oito e media do serán coa retransmisión do partido da Segunda División A entre o Málaga e o Club Deportivo Lugo. O empate do martes ante o Oviedo deixa o equipo de Mehdi Nafti na zona media, mentres o seu rival está nunha situación semellante, cun punto de vantaxe.

O sábado, desde as 3 da tarde, a emoción da xornada pasará polo Vero Boquete de Santiago, onde o Compostela e o Pontevedra disputarán un derbi de rivalidade que chega no mellor momento para o cadro granate, líder da Segunda B. No polideportivo destacan o Cangas-Nava, de balonmán, e o Parrulo-Peñíscola, de fútbol sala.

Xa o domingo, ás 12, o Coruxo e o Guijuelo protagonizarán o encontro destacado da xornada matinal, mentres pola tarde o interese estará repartido entre o Celta-Granada, da Primeira, e o derbi de proximidade Deportivo-Racing de Ferrol. O programa tamén estará atento ao Salamanca-Celta B e a toda a xornada da Terceira.

Ademais do 'Galicia en goles', a Radio Galega oferta durante a fin de semana outros espazos de temática deportiva. O sábado concentra un total de tres, sendo o primeiro 'Convivir deportivo' á unha do mediodía. Alfonso Pardo visita nesta ocasión Cariño para dar voz á disciplina da columbofilia. Pola noite, ás 11, Rodrigo Pérez resume a actualidade do motor no 'Gas a fondo' e a partir das once e media, Pedro Pablo Alonso presenta esta semana 'Galicia en Toquio', onde a nadadora Bea Gómez será unha das protagonistas.

O domingo, cando remata o día, 'Ao contraataque' chega ás 11 da noite coa mesa de debate máis entretida para analizar o sucedido cos equipos galegos.

Todas as emisións deportivas da Radio Galega chegan á audiencia a través da FM, TDT, radiogalega.gal, aplicacións como Radioplayer España e os altofalantes Alexa.