Noelia Sánchez foino todo no mundo do voleibol. Retirouse hai dous anos cun título (un máis) co Menorca e agora sorprendeu a todos volvendo ao club de Monforte, o Korbis: "Mordía as unllas vendo os streaming das miñas excompañeiras... Houbo chamadas durante este tempo, pero xa tomara a decisión de deixar o volei profesional"

Sorprende, en todo caso, ver unha xogadora como ela na 1ª Autonómica: "A algunhas das miñas compañeiras dixéronlles, que morro lle botades! Que abusonas, ter a Noelia con vós!!! Pero eu creo que non, sería abuso se volvese despois do Menorca. Son moi profesional, case 'rusa' no tema disciplinario"

A pesar de todo, a súa vida é tranquila e toma con calma o regreso ás pistas para gozar: "Teño unha vida relaxada. Gozo moito na aldea, esta mañá fun apañar castañas... Son adestradora persoal e quiromasaxista a domicilio. Vou compaxinando ser autónoma e agora teño as findes ocupadas co volei. Decidín retirarme do volei profesional hai dous anos e cun trofeo xogando unha final. Nunca podes dicir que é para sempre, pero os 40 están aí e cando volvín apareceron todas as dores de súpeto, xa esquecera que tiña un menisco roto"