Os empregados da planta de Alu Ibérica, a antiga Alcoa-A Coruña, propoñen que o Goberno cree un sistema provisional para axudar as fábricas a pagaren menos polo recibo da luz durante dous ou tres anos, á espera de que realmente se confirmen as previsións do propio Executivo central de que nese tempo empezará a baixar o prezo da electricidade, ao ir substituíndo as centrais térmicas de carbón, que producen a custos elevados, por enerxías renovables, moito máis baratas.

"Dá a impresión de que o Goberno non entende nada. Que non entende ou que hai moitas presións por detrás que eu non podo agora mesmo descifrar, pero paréceme que se está equivocando".

"Se o Goberno está dando uns datos, e incluso tamén a AEGE (Asociación de Empresas con Gran Consumo de Enerxía) di que o megawatt neste país vai baixar porque se están introducindo neste mercado as enerxías renovables, que vai facer que baixen os custos, e se se está sacando do sistema a xeración de electricidade con centrais térmicas, pode ser que ao mellor en dous anos baixe o recibo da luz, pero habería que velo".

"O Ministerio da Enerxía non se pode esquecer de que é o Ministerio de Transición. Ás empresas coma nós tennos que dar unha transición para crearmos un sistema ata que neses dous ou tres anos, cando se di que vai baixar o prezo da luz, se confirme".

"Non se pode estar pechando industrias coma as nosas porque esta industria, se se pecha, non volve implantarse nunca".