CRTVG

Buscar

Galicia por Diante

Joan Josep Nuet, deputado electo de ERC: "Os soberanistas temos os votos clave, sen os nosos votos non hai lexislatura"

19/11/2019 - 08:11 h

ERC avoga porque os partidos soberanistas que conseguiron representación no Congreso nas eleccións do 10 de novembro actúen de forma coordinada toda a lexislatura. Farano en grupos parlamentarios diferentes, pero cun obxectivo: influír na vida política. Dicíao no Galicia por diante Joan Josep Nuet, deputado electo de ERC.

"Imos actuar, non só na investidura, senón en toda a lexislatura, de forma coordinada. Vai haber un só voto. Témolo moi coordinado da lexislatura pasada cos compañeiros de EH Bildu. Espero que cos compañeiros do BNG, Junts per Cat e a CUP se poida producir un voto global. Estamos falando de influír con 35-36 votos que determinarán a lexislatura".

Nuet é contudente: "Temos os votos clave. Sen estes votos non hai lexislatura. Sen estes votos a lexislatura convértese nun camiño de espiñas para esta coalición que tenta camiñar, a do PSOE con Unidas Podemos. Por tanto, somos imprescindibles e o goberno de España, o PSOE e Unidas Podemos deben entender que o diálogo franco con estas opcións é indispensable, imprescindible e debe producirse si ou si".

ERC segue insistindo na necesidade de abrir unha mesa de diálogo bilateral que permita resolver o conflito catalán.

"Pensamos que é unha proposta de sentido común, o conflito que se vive en Cataluña é de natureza política e, por tanto, hai que buscar na política as solucións. Levamos demasiado tempo sen falar con sinceridade. Sen diálogo político as solucións non van chegar do ceo".

Nuet é flexible sobre a fórmula que se escolla para que se produza ese diálogo entre o Goberno español e a Generalitat, e matiza que a figura do relator xa non é indispensable.

"Se ten que haber a figura dun relator ou non, non é un factor indispensable. Se hai unha proposta técnica que mellore esa proposta, estudarémola e aceptarémola".

Para o deputado electo de ERC, o fundamental é desxudicializar a vida política: "Esa mesa do diálogo axudará a que non sexa só o calendario xudicial o que marque a política catalá e española, porque nós somos unha democracia parlamentaria e non unha democracia dos xuíces. Quen goberna este país non son os xuíces, non son eles os que teñen que facer política. Pensamos que é unha anomalía democrática e que hai que rervertela o máis axiña posible".

As claves informativas do día, con especial atención á actualidade de Galicia
Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí