Martiño Suárez e o seu #Bestiario desvelaron en Ao contraataque o pasado deportivo do presentador de Luar, Xose Ramón Gayoso, que chegou a ser bicampión de España de atletismo en idade xuvenil.

Explicouno o propio Gayoso: "Nun vestiario naceron das mellores cousas da miña vida. O deporte e ata a música. Fun campión de España de lanzamento de martelo en dúas ocasións. Campionatos galegos xa non conto os que gañei. A miña marca era 51,70 metros".

E contounos como chegou a ese deporte: "Comecei en campionatos escolares. Como era gordiño puxéronme primeiro a lanzar peso. Lancei tamén disco, pero a miña especialidade era o martelo. Dende os 12 ata o 18 anos vivía nas pistas de Riazor. E aí coñecín a Álvaro Someso, que saltaba altura, e logo montamos o dúo musical Keltia. Adestrábame todos os días. Non tiña parada. Eu son moi competitivo. Competía contra min, se gañaba e non superaba a miña marca non quedaba contento".