Uns traballos arqueolóxicos realizados no antigo poboado castrexo de Castrillón (Larouco) deron cunha ola de cerámica soterrada deliberadamente e acompañada de restos óseos. Martiño Xosé Vázquez Mato dirixe estas actuacións, aínda en fase inicial, e explica que “está claro que esta ola non tiña un fin funcional para almacenaxe”. As hipóteses apuntan a un posible soterramento infantil, algo que sería “un achado excepcional” en Galicia, ou ben a un obxecto fundacional.