Un gol que resume un partido. Un gol que vale tres puntos. Un gol que foi o único tiro do Deportivo entre os tres paus en todo o encontro.

Pedro Sánchez foi un heroe na Romareda, a que foi a súa casa. Entrou no campo no 81 para substituír a Carlos Fernández e tres minutos máis tarde marcou o tanto da vitoria.

Pedro Sánchez R. C. Deportivo: "A miña motivación é a mesma sexa o Zaragoza, na Romareda, ou en calquera campo. Sempre intento axudar o meu equipo no máximo".

Pero o encontro tivo outro claro protagonista, o salvador, Dani Giménez. No inicio do partido xa o probou Pep Biel neste lanzamento desde fóra da área. Na segunda parte o Zaragoza mandou e tivo varias ocasións para poñerse por diante pero topou sempre co gardameta vigués. A máis clara salvouna Dani cunha parada dobre, primeiro a Pep Biel e logo a Marc Gual.

Dani Giménez R. C. Deportivo: "Un despexamento, levanteime rápido tirei de reflexos, e volvín levantarme rápido ata que creo que foi Pablo que a volveu sacar".

No peor momento do Dépor chegou o gol da vitoria, asistencia de Edu Expósito para que Pedro Sánchez a puxera á perfección para bater a Cristian. O Deportivo aguantou o ataque maño no desconto nun partido que serve para volver reengarcharse á promoción de ascenso.

Dani Giménez R. C. Deportivo: "Quedan 5 partidos moi complicados e se conseguimos o obxectivo pois un play off. Para nós practicamente estes son partidos de play off, entón se chegamos o fin cunha boa dinámica podemos estar tranquilos porque imos competir"

A conta atrás xa comezou. Cinco finais que arrincan o vindeiro domingo en Riazor ante un rival directo, o Cádiz.