CRTVG

Buscar

Visto para sentenza o xuízo contra tres ex-xogadores do Arandina acusados de agresión sexual a unha menor

Publicado o 28/11/2019 14:20

Coa presentación das conclusións definitivas de todas as partes rematou na Audiencia Provincial de Burgos o xuízo contra os tres xogadores do Arandina acusados de agredir sexualmente unha menor.

As acusacións solicitan para cada un deles penas que van desde os 39 aos 43 anos e medio de prisión e as defensas a libre absolución. O rexistro de actividade dos móbiles dos acusados, que sofren un repentino apagón durante hora e media na tarde que ocorreu a suposta agresión sexual, é o dato clave esgrimido polas acusacións para pedir penas de cárcere para os tres ex-futbolistas do Arandina.

Desde os 39 anos que solicita a Fiscalía para cada un deles ata os 43 e medio da acusación particular polos delitos de agresión sexual e colaboración.

Nas súas conclusión finais, as tres acusacións coincidiron en destacar a coherencia do relato da menor diante do seu ámbito máis próximo, da policía e durante o xuízo, que rematou este xoves na Audiencia de Burgos.

As defensas dos tres ex-xogadores do Arandina mantiveron as súas peticións de libre absolución para os condenados ao considerar probado na vista oral que non existiu agresión sexual. 

Escoitadas as conclusións, o presidente do tribunal ofreceu aos acusados a quenda de última palabra e o xuízo quedou visto para sentenza.

Noticias web

28/11/2019