Dun tempo a esta parte, os parques urbanos teñen dúas caras: a diúrna e a nocturna. A primeira é moito máis amable, con usuarios que os utilizan para ler, camiñar, facer deporte, pasear o can ou para que desafogue a cativada, personaxes que pola noite desaparecen. Daquela, encontramos grupos de adolescentes con bolsas ata arriba de botellas, dispostos a alongar a noite á súa maneira, malia estar prohibido.

A veciñanza do parque lindeiro co Parlamento de Galicia recoñece que os botellóns van a menos, pero só, cren, porque a policía está cada vez máis enriba da rapazada. Como pasa nun parque santiagués da Constitución, lugar habitual de botellón, os servizos de limpeza encárganse de que á mañá seguinte non haxa rastro do que alí pasou a noite anterior. As papeleiras só conteñen pola mañá os restos dos paseos caninos.

Só a noite do sábado, fin das festas do Apóstolo, a Policía Local multou vinte persoas por beber na rúa, neste parque e en diferentes zonas do Campus Sur. As sancións están entre os 200 e 300 euros. 

As autoridades insisten en que o botellón está prohibido e volven apelar á responsabilidade da mocidade para evitar máis contaxios da covid nestas reunións en plena rúa.