Xa se poden contemplar os adiantados pasos de outono cara a un Nadal de grandes dimensións.

"Pero isto para que é? Para a iluminación?"

"É unha noria. Ou iso parece, non?"

Parece, a ollos de case calquera vigués, unha noria de máis de sesenta metros. Pregúntase un a onde vai chegar este Nadal.

"Ata onde escollera o señor Caballero."

"Está facendo cousas interesantes que poñen a cidade en órbita un pouco."

"62 metros... De aquí a pouco xa se vai poder tocar a lúa."

Devolvendo os pés á terra atopamos restricións de tráfico por causa destes traballos en pleno centro.

"Pero creo que o reordenamento que fixeron do tráfico non está nada mal."

"Non vivimos aquí, pero temos unha praza de garaxe aí, e non podemos pasar. É a primeira vez. Pero imaxino que o teremos que levar. Non queda outra!"

Prezos que pagar por un Nadal vigués máis ambicioso aínda este ano.

"A min é que me gusta moito todo o de Nadal. / A min éme un pouco indiferente."

As luces xa agardan a ser prendidas, postas contra un ceo que trae unha repentina sarabiada como anticipo da neve deste Nadal.

"Que vai ter unha máquina producindo neve, e imos ter neve."

E unha chea de actividades polas máis de 300 rúas iluminadas.

"Podían gastar os cartos en cousas máis importantes."

"Gastan moitos cartos, pero ao final equilíbrase no total."

"Isto trae xente e dá traballo."

Tamén a noria estará iluminada. Entre dez millóns de luces, aspira a ser a estrela.