Veciños do concello lugués de Muras denuncian os constantes ataques dos lobos ao seu gando. Nunha leira da parroquia de Irixoa mataron unha egua e o seu poldro e feriron outros catro. Os veciños quéixanse de que as poboacións de lobos non paran de medrar e reclaman medidas.

Nesta leira de Muras xuntan o gando para localizar os animais feridos e facerlles as curas. Desta volta quedaron danados catro poldros e non saben se sairán adiante. Peor parados acabaron esta egua e o seu poldro, que foron completamente devorados polo lobos.

Os veciños sinalan que os lobos se achegan ás casas e andan sen medo a calquera hora do día. Hai quen mesmo ten as vacas e becerros sen poder pastar libres por medo aos ataques.

Os afectados din que a situación é insostible. Reclaman axudas das administracións e tamén que se concedan máis batidas para tratar de frear o aumento das poboación de lobos.