Pouco antes das oito da mañá, Alberto, un veciño de Ourense, comezou a recibir numerosas chamadas de persoas descoñecidas para preguntarlle por unhas mensaxes dun servizo de paquetería enviadas dende o seu número. Ao longo de todo o día dende o seu teléfono saíron más de 2.700 mensaxes e recibiu máis de 100 chamadas telefónicas en que ata recibiu ameazas. 

Todo apunta a que foi vítima duns piratas informáticos que lle roubaron a través do método coñecido como phishing os seus datos persoais e agora están a usurpar a súa identidade para facerse cos datos doutros. Asocia está posible estafa a unha mensaxe similar á que se está enviando dende o seu número.

Xa interpuxo a denuncia correspondente e viuse obrigado a anular tanto o número de teléfono como as tarxetas bancarias porque detectou movementos raros e sospeita que os estafadores puideron acceder a estes datos. 

En caso de sermos vítimas dun destes calotes, o aconsellable é denunciar para que os investigadores poidan abrir novas vías para as súas pescudas.