CRTVG

Buscar

Unha vintena de neonazis irrompen na sede do PSOE, en Ferraz

Publicado o 09/01/2020 16:41
Unha vintena de neonazis irrompen na sede do PSOE, en Ferraz

Unha vintena de membros do colectivo neonazi Hogar Social Madrid irrompeu este xoves sobre as dúas da tarde na sede do PSOE, na rúa Ferraz, e durante algo máis de media hora fixeron unha sentada no vestíbulo, ata que os desaloxou a policía, que detivo unha persoa.

A protesta tivo lugar unhas horas despois de que a Policía Nacional desaloxara, sen incidentes, unha trintena de integrantes e simpatizantes de Hogar Social Madrid que mantiñan ocupado un edificio na praza Cristino Marcos da capital, antiga sede de Comisións Obreiras.

Durante algo máis de media hora, os congregados fixeron unha sentada no vestíbulo, no espazo previo ao control de seguridade, que non puideron traspasar, segundo explicaron fontes do partido. O PSOE publicou en Twitter un vídeo en que se recolle o momento de tensión vivido na sede coa irrupción dos membros do colectivo neonazi, xunto á mensaxe: "Fronte á intolerancia, máis forza e convicción dos nosos principios socialistas". "Non nos ides calar, non nos ides amedrentar. Somos e seguiremos sendo o dique de contención ante a extrema dereita", sinala no chío o Partido Socialista.

Tras a sentada, que estivo protagonizada polo berro "Axudas sociais para os nacionais" proferido polos membros do colectivo neonazi, a Policía Nacional desaloxounos sen que se rexistrasen incidentes relevantes.

A policía, que trasladou á sede do PSOE varias Unidades de Intervención Policial (antidisturbios), detivo unha muller e propuxo para sanción a outras tres persoas, segundo informaron a Efe fontes policiais.

Esta mañá, o desaloxo da antiga sede de Comisións Obreiras, situada no número 4 da praza de Cristino Martos, no distrito de Centro, levouno a cabo a Unidade de Intervención Policial (UIP) e contou coa colaboración da Policía Municipal. O Samur tivo que atender catro persoas que se atopaban enfermas, dun total de 26 que estaban no edificio, segundo fontes do colectivo Hogar Social, que ocupou este inmoble o 3 de novembro de 2018.

Trátase do noveno edificio que a agrupación neonazi ocupaba desde a súa constitución, en 2014. A antiga sede de CCOO en Madrid, de sete plantas e un soto, cunha superficie total duns 7.000 metros cadrados, permanecía baleira desde 2013, cando os empregados do sindicato foron trasladados a outras oficinas da capital.

Hogar Social Madrid deuse a coñecer en 2014 tras ocupar un edificio no barrio de Tetuán para repartir comida só a españois. Desde ese momento ocupou diferentes lugares da capital, que sempre foron desaloxados pola policía tras a correspondente orde xudicial.