CRTVG

Buscar

Unha moza denuncia que lle diagnosticaron como enfermidade a homosexualidade

Publicado o 07/10/2021 19:28
Unha moza denuncia que lle diagnosticaron como enfermidade a homosexualidade

EFE/Marcial Guillén

EFE

Alba Aragón, a moza de 19 anos de Llano de Brujas (Murcia) que viu reflectido nun informe clínico tras unha revisión xinecolóxica que a súa homosexualidade era unha enfermidade, aceptou as desculpas do xinecólogo que redactou o documento e revelou que a intención de facer público o seu caso é para axudar a afrontar esta situación a outras persoas que sexan "máis inseguras".

En declaracións a EFE, Aragón relatou que, durante a revisión efectuada no hospital Reina Sofía de Murcia o pasado luns, comentou ao seu xinecólogo que era homosexual porque pensaba que podía ser unha información relevante á hora do diagnóstico ou do tratamento.

Posteriormente, o facultativo preguntoulle se lle importaba que puxese no informe a súa orientación sexual, contestando que accedía a iso, sen saber que a incluíu no apartado denominado "Enfermidade actual".

A moza afirmou que se decatou deste feito cando xa chegara á súa casa, e móstrase "moi sorprendida" porque é un "insulto" e unha "inxustiza" que reflectisen a súa homosexualidade como enfermidade nunha revisión motivada por "outra cousa totalmente diferente", polo que presentou unha queixa no centro sanitario.

A pesar de que aceptou as desculpas do doutor e do hospital Reina Sofía, Aragón non cre na versión do centro sanitario, que achaca a situación a un erro á hora de recoller os datos, porque o xinecólogo tivo que "teclear a palabra". "Cada un ten os seus pensamentos; uns son mellores, outros peores e non hai que darlle máis voltas", apostilou.

A moza apuntou que optou por facer público o seu caso por se pode axudar a "outra xente que non o teña tan claro ou sexa máis insegura". "Esa é a intención, axudarlles e que pensen que a homosexualidade non é unha enfermidade, nin moito menos, nin está mal", engadiu.

Aragón declarou que o facultativo se puxo en contacto telefónico coa súa nai para concertar unha reunión, co obxecto de pedirlle desculpas persoalmente, pero indicou que non pode realizala porque tiña clases na universidade.

Noticias web

07/10/2021