Vanesa Enríquez é das Pontes, pero leva 16 anos vivindo en Nova Zelandia, onde traballa na Universidade de Auckland. Hai 15 días a vida deulle un revés. Sentiuse mal e ingresou en estado critico no hospital. Diagnosticáronlle unha enfermidade moi rara: síndrome urémica hemolítica atípica. Unha doenza xenética que provoca que o seu sistema inmunitario ataque e destrúa órganos sans.

No seu caso, os riles deixaron de funcionar. Precisa diálise e transfusións de plasma diarios e só hai un medicamento que a pode salvar, pero non está financiado pola sanidade neozelandesa.
Custa 20.000 euros semanais e precisa 4 meses de tratamento ata que poida viaxar a Galicia e recibilo aquí, onde si está subvencionado.

Para custealo, familia e amigos puxeron en marcha unha campaña de recadación de fondos a través dunha plataforma en Internet. Xa recadaron 126.000 dólares neozelandeses, pero precisan 70.000 mais para cubrir todo o tratamento.

O venres, o día do seu aniversario, Vanesa recibiu a primeira dose. Contounos ela mesma a melloría que experimentou e agradece o apoio á súa causa.