Esta tarde falamos co doutor en Bioloxía do Instituto de Investigacións Mariñas de Vigo, Ángel Guerra, para afondar un pouco nas causas do problema. Segundo o científico, a causa principal está na excesiva explotación desta especie en campañas pasadas, sobre todo no que se refire á captura de grandes exemplares.

Considera que as causas non son ambientais porque non lle constan cambios nas condicións oceanográficas. Tampouco que houbese unha baixada de salinidade, circunstancia que o polbo non atura ben. Para o biólogo, a escaseza vén da excesiva explotación en campañas anteriores.

Considera necesario respectar o tamaño mínimo das capturas e a cantidade máxima permitida para cada barco. Tamén cumprir de xeito rigoroso coa veda que o pasado ano foi máis cativa.

"Quizais o que está pasando co polbo non é unicamente consecuencia de facer o ano pasado unha parada pequena. Tamén se debe a condicións climáticas e a condicións biolóxicas da propia especie. Este episodio xa o vivimos en anos anteriores e o único que temos que ser é respectuosos coas normas e acreditar unha pesca sostible".

Outra das propsotas científicas é acoutar determinadas zonas onde os polbos adoitan facer as súas postas.