CRTVG

Buscar

Unha empresa galega produce tecnoloxía para xeolocalizadores de interiores

Publicado o 16/08/2019 12:21

Un hospital, un aeroporto, un recinto feiral, unha nave industrial ou un grande evento deportivo... Os espazos son cada vez máis grandes e dar coa porta de embarque, a tenda ou a consulta que nos toca pode ser complicado... Por iso é cada vez máis habitual que nestes lugares se instalen sistemas de posicionamento e guiado semellantes ao GPS que empregamos para movernos no exterior.

Baixar á planta 1 e na planta 1 baixar á cero... indica unha aplicación baseada no xeolocalizador de interiores de Situm.

En calquera país do mundo en que atopemos un xeolocalizador deste tipo é moi probable que sexa obra dunha empresa xurdida no Centro de Investigación de Tecnoloxías Intelixentes da Universidade de Santiago.

Victor Álvarez Conselleiro delegado de SITUM : "Aquí no CITIUS faise tecoloxía punta moi, moi boa. Moitas veces falta dar o paso que demos nós, que é saltar ao mercado"

Ese salto ao mercado de tres novos enxeñeiros especializados en robótica móbil e intelixencia artificial foi espectacular. En só cinco anos pasaron de 3 a 20 traballadores e adaptaron o seu sistema en máis de catro mil recintos e instalacións industriais de todo o mundo.

A súa tecnoloxía conxuga os parámetros de xeolocalización dos propios edificios cos dos teléfonos móbiles e non require ningún tipo de instalación a maiores, o que supón unha vantaxe fronte ás aplicacións que ofrecen as empresas da competencia.

Victor Álvarez: "Ainda que xurdiran noutros paises como Finlandia ou Estados Unidos que a xente pensa que traballan moi ben, que fan tecnoloxía punta a nosa tecnoloxía está agora mesmo un paso por diante.

Esa vantaxe nótase nos seus resultados. Do 2017 ao 2018 multiplicaron por catro a sua facturación e prevén que de aquí ao 2021 terán que duplicar o cadro de persoal para atender novos proxectos coma os xogos olímpicos de Toquio.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

16/08/2019